02/09/2026
MGA ARTISTA NG BAYAN NG GITNANG LUSON, TUTULAN ANG PAX SILICA! TUTULAN ANG MGA HUWAD NA PROYEKTONG "PANGKAUNLARAN"!
Mariing kinukundena ng Panday Sining - Pampanga ang imperyalistang US sa kanyang pandarambong at paghihigpit sa kaniyang galamay sa ekonomiya at pulitika ng Pilipinas, kabilang dito ang Pax Silica at Luzon Economic Corridor.
Ang Pax Silica ay isang global supply chain sa kumpas ng Estados Unidos na nakapokus sa manufacture para sa semiconductors at artificial intelligence, sa pangakong industriya at trabaho para sa mga mamamayan. Ngunit sa likod ng mga pangakong ito ay ang higit na malalim na layunin ng imperyalistang US na tiyakin ang kontrol at seguridad ng sarili nitong supply chain at mga estratehikong industriya sa harap ng tumitinding tunggalian nito sa China.
Sa katwiran na pagsalag sa monopolyo ng China sa global supply ng Heavy Rare Earth Elements (HREE) at Critical Minerals, ang Pax Silica ay binuo noong Disyembre 2025 kabilang ang mahigit 25 na bansa, tulad ng Japan, Republic of Korea, United Kingdom, Israel, atbp. sa iba't ibang takdang kasunduan. Malaon ay isinama ang Pilipinas noong Abril 2026, na kung saan balak itayo ang mga data centers at ibang pasilidad ng Pax Silica sa New Clark City (NCC) sa Capas, Tarlac na may laking 1,618 ektarya ang sasakupin.
RENEWABLE ENERGY ANG PAGKUKUHANAN?
Kasabay ng pagpapalawak ng mga industrial at high-tech facilities ay ang lumalaking pangangailangan sa enerhiya. Ang mga data center, semiconductor facilities, advanced manufacturing plants, at iba pang imprastraktura ng digital economy ay nangangailangan ng napakalaking suplay ng kuryente.
Ipinapangalandakan ang renewable energy bilang pagkukunan ng proyekto na ito, kabilang dito ang MTerra Solar sa Nueva Ecija, ACWA Solar Plant sa NCC, at iba pang proyekto tulad ng windmills at hydropower. Ngunit hindi dapat gamitin ang salitang “renewable” upang pagtakpan ang mga epekto ng malalaking proyekto na ito sa lupa, tubig, agrikultura, pangisdaan, at kabuhayan ng mga katutubo at magsasaka.
NO 'PAX' IN PAX SILICA!
Dapat nating itanong: Para kanino ang kaunlarang ipinapangako? Sino ang tunay na makikinabang? At sino ang magbabayad nang kapalit nito?
Ang Pax Silica ay hindi lamang usapin ng teknolohiya, pamumuhunan, at industriya. Bahagi ito ng mas malawak na tunggalian ng mga makapangyarihang bansa para sa kontrol sa semiconductors, artificial intelligence, critical minerals, at iba pang estratehikong teknolohiya.
Habang ipinapangako ang “economic security” at “peace” sa pamamagitan ng Pax Silica, lalong inilulubog ang Pilipinas sa estratehikong interes at gerang paghahanda ng Estados Unidos.
Kaya walang tunay na kapayapaan kung ang Pilipinas ay ginagamit bilang piyesa sa estratehikong tunggalian ng malalaking kapangyarihan. Hindi dapat maging tagapag-suplay ng teknolohiya, enerhiya, likas-yaman at murang lakas-paggawa ang Pilipinas para sa imperyalistang interes.
Ang tunay na kapayapaan ay nakaugat sa pambansang kasarinlan, lupa para sa magsasaka, disenteng trabaho para sa manggagawa, at mga demokratikong karapatan para sa kapakanan ng sambayanan!
Kaya ang panawagan sa lahat ng artista ng bayan, magkaisa't lumaban para sa pambansang demokrasya't kasarinlan! Lumikha ng sining na mapaglilingkod sa bayan!
STOP US WAR AND AGRESSION!
LUPANG NINUNO, DEPENSAHAN!
TUNAY NA REPORMA SA LUPA, IPAGLABAN!
ISULONG ANG PAMBANSANG INDUSTRIYALISASYON!
REJECT PAX SILICA! DEFEND CENTRAL LUZON!
LIPUNA'Y PANDAYIN, ARMAS ANG 'YONG SINING!
