21/04/2025
Nailian a kombension dagiti mannurat nga Ilokano, sangailien ti Santa Teresita, Cagayan
Angayen ti GUMIL Filipinas, ti gunglo dagiti mannurat nga Ilokano, ti “Dap-ayan 2025: Nailian a Kombension Dagiti Mannurat nga Ilokano” inton Abril 26-27, 2025 iti Santa Teresita, Cagayan babaen ti panangsangaili ti LGU Santa Teresita (Cagayan) nga idauluan ni Mayor Rodrigo P. De Gracia ken iwardas ti GUMIL Cagayan babaen ti pannakitinnulong ti Bannawag, kas impakaammo ni Ariel Sotelo Tabag, presidente ti gunglo.
Babaen ti tema a “Ni Mannurat kas Mangmangged,” matratar iti dua nga aldaw a kombension dagiti nadumaduma nga aspekto ti kinamannurat ken oportunidad para kadagiti mannurat tapno ad-adda pay nga agbalinda nga epektibo a mannurat iti agduduma a kapasidadda kas makipagili iti kagimongan Ilokano. Malaksid a ma-update dagiti mannurat maipapan iti panagsurat kadagiti nadumaduma a babasaen ken iti radio ken telebision, maidiaya kadakuada dagiti oportunidad iti panagipatarus ken no kasano a maaramat ti kinamannurat iti bukod a propesion. Maiwardas pay dagitoy no kasano ti agbalin nga epektibo a vlogger, autor ti libro, ken mannurat ken/wenno direktor iti pelikula.
Tampok pay iti nasao a taripnong ti pannakayalnag dagiti baro a libro nga Ilokano, pannakapadayaw dagiti nangabak kadagiti salip iti panagsuratan, ken dagiti naisangsangayan a mannurat a nakaipaay iti kontribusion iti literatura nga Ilokano, ken iti GUMIL Filipinas. Iti kakaisuna a rabii ti Dap-ayan. agsapata dagiti baro a kameng ken opisial dagiti nadumaduma a chapter ti gunglo.
Iti maikadua nga aldaw, maangay ti eleksion ti GUMIL Filipinas tapno mapili dagiti agserbi iti gunglo iti sumaruno a dua a tawen.
Kadagiti kameng ti GUMIL Filipinas ken kadagiti interesado nga agkameng, makiuman kadagiti presidente dagiti chapter maipapan iti itatabuno iti Dap-ayan 2025.
Kadagiti mannurat iti Cagayan, makiuman ken ni Rolando A. Seguro Jr., outgoing president ti GUMIL Cagayan babaen ti mobile number 09950021291. Sangaribu (PhP1,000) ti bayadan a registration fee ngem maibalakad kadagiti interesado a maisapa ti panagrehistro ken makompirmar apno maibilang nga opisial a delegado. (Dap-ayan Secretariat)
