21/09/2026
ALABEL, GISUGDAN ANG MUNICIPAL PCSA SPORTS FEST 2026 PINAAGI SA PLEDGE OF COMMITMENT UG SPORTSMANSHIP
ALABEL, Sarangani Province — Pinaagi sa panumpa sa Sportsmanship and Camaraderie ug pagpirma sa Pledge of Commitment, pormal nang gisugdan sa Lokal nga Panggamhanan sa Alabel ang Municipal Philippine Civil Service Anniversary (PCSA) Sportsfest 2026, Lunes, Setyembre 21, 2026.
Gipangunahan ni Mayor Lilibeth “Ybing” J. Salarda, kauban si Municipal Administrator Vic Paul “Nonoy” M. Salarda, mga miyembro sa 15th Sangguniang Bayan sa Alabel, mga opisyal ug empleyado sa munisipyo, ang opening activity sa maong Sportsfest isip kabahin sa pagsaulog sa Philippine Civil Service Anniversary karong Setyembre.
Kauban usab sa pagpahigayon sa kalihokan ang Alabel Local Government Employees Association (ALGEA) nga gipangunahan ni Bryan Benedick L. Mendoza, ug ang Human Resource Management Office (HRMO) ubos sa pagpangulo ni Human Resource Management Officer Jocelyn Tenchavez, MPA.
Ang Municipal PCSA Sportsfest naglangkob sa nagkalain-laing ball games, traditional games o Larong Pinoy, academic events, ug parade, nga gitumong dili lamang sa pagpalambo sa kahimsog ug talento sa mga empleyado, apan ilabina sa pagpalig-on sa teamwork, camaraderie, friendship ug unity taliwala sa nagkalain-laing opisina sa LGU Alabel.
Pinaagi sa mga sports competition, gihatagan og higayon ang mga government employees ug officials nga makigkompetensya sa maayong paagi, makaila ug makig-uban sa ilang mga kauban gikan sa ubang opisina, ug mapalambo ang pagsinabtanay nga importante sa usa ka organisasyon nga nag-alagad sa katawhan.
Sa iyang mensahe, nagpahayag si Mayor Ybing Salarda og positibong pagtan-aw sa umaabot nga mga kalihokan sa Municipal PCSA Sportsfest. Gilauman sa Mayor nga ang matag kompetisyon mahimong oportunidad dili lamang aron ipakita ang abilidad ug talento, kondili aron mas mapalig-on pa ang relasyon ug panaghiusa sa mga empleyado ug opisyal.
Gipasiugda usab nga bisan adunay kompetisyon taliwala sa mga team, ang tinuod nga tumong sa maong kalihokan mao ang pagpalambo sa sportsmanship, mutual respect ug camaraderie, diin ang matag partisipante makatagamtam sa kalihokan ug makadala og positibong kasinatian balik sa ilang tagsa-tagsa ka opisina.
Samtang, gipahinungod ni HRMO Jocelyn Tenchavez, MPA ang iyang mensahe sa mga importanteng norms of conduct nga kinahanglan kanunay nga giya sa mga government employees ug officials sa ilang pag-atiman sa serbisyo publiko.
Lakip niini ang Commitment to Public Interest, diin ang interes ug kaayohan sa publiko kinahanglang unahon; Professionalism, o ang pagpakita og kahibalo, kahanas, respeto ug maayong pamatasan sa trabaho; ug Justness and Sincerity, nga nag-awhag sa patas ug matinud-anong paglihok sa pag-atiman sa mga transaksyon ug responsibilidad.
Gipasiugda usab ang Political Neutrality, diin ang mga empleyado sa gobyerno kinahanglang magpabiling patas ug dili magpahimulos sa ilang posisyon alang sa politikal nga interes; Responsiveness to the Public, pinaagi sa tukma ug matinagdanong pagtubag sa panginahanglan sa katawhan; ug Nationalism and Patriotism, nga nag-awhag sa pagkamatinud-anon ug dedikasyon sa nasud ug sa katawhan.
Lakip pa niini ang Commitment to Democracy, nga nagpalig-on sa pagtahod sa mga prinsipyo sa demokratikong pagdumala, ug Simple Living, nga nag-awhag sa mga public servants nga magkinabuhi nga yano, responsable ug nahiuyon sa ilang katungdanan isip mga nag-alagad sa gobyerno.
Ang pagpanumpa sa Sportsmanship and Camaraderie ug pagpirma sa Pledge of Commitment nagsimbolo sa hiniusang pasalig sa mga partisipante nga magpadayon sa pagpakita og respeto, integridad, fairness ug maayong pakig-relasyon, bisan taliwala sa kompetisyon.
Ang Municipal PCSA Sportsfest 2026 kabahin sa mas lapad nga selebrasyon sa Philippine Civil Service Anniversary, nga nagtumong sa paghatag og pag-ila sa kontribusyon sa mga kawani sa gobyerno ug pagpalig-on sa ilang kahimsog, morale, teamwork ug relasyon isip kabahin sa civil service. (ALABEL INFORMATION OFFICE)
