Manurere

Manurere Ua haamauhia o Manurere no te ôpere i te parau a te Atua na nia i te nati reva...

02/07/2026

Amota 5.18-27
Faraite 3 no PARORO MUA (tiurai) 2026.
[E te Tumu Nui, hô mai i te paari e te mataāra no te tītīà i te mea maitai, e Atua noa ai oe]
E tano ia haamanaohia, i te tau o te hui arii to Amota mauraa i to na tiàraa perofeta i roto i na ôpu hoê ahuru o Iteraèra. E taata haehaa teie, te paari e te papu to na tiaturi i te Tumu Nui. I roto i ta na mau aoraa, ua noaa ia Amota i te tītīà i te mea maitai, e Atua noa ai te Atua.
Mai te taote e hiopoa i te taata maī, ua hiohio o Amota i te huru o te mau taata no to na tau e ua ite o ia i te nünaa i te taamino noaraa i roto i te ôpape no te rave peu noaraa i te ohipa aita hoê aè tiaturiraa papu, aita atoa hoi e tatarahapa to roto i te âau.
Ua hinaaro te nünaa ia oioi mai te mahana e tahoohia ai te mau enemi o Iteraèra. Ua parauhia taua mahana ra : >.
Ia hiohia ta te nünaa tiairaa e te ohipa i tupu, mea taa ê roa ia. Eere te enemi tei pohe, o Iteraèra iho ra tei tairihia. E pau te ape, te horo e te taponi, eita e ora no te mea tei te mau vahi atoà te pohe i te tiairaa mai i te taata.
Ua vai noa te mau peu e te haamoriraa a te taata i mua i te mata maramarama o te Atua. Ua haamori te nünaa i te Atua o to ratou mau tupuna, te ôroa ra, te pehe ra, te pupu ra i te tutia, i pihai i te reira, ua tamau noa ratou i te haamori i te mau atua tapiripiri hâ noa no Aifiti mai.
Ia hiohia, ua ère te taata i te paari e te mataāra no te tītīà i te mea maitai e te mea ino, no te oreraa e noaa i te tītīà i hitihia te taata i te mau parau i muri nei >
I te tau o Amota, o Iteraèra tera e parauhia ra, i teie ra mahana, ua riro teie parau, ei faaararaa ia tätou : Haapao maitai, e e ani i te Atua horoa mai i te paari e te mataāra i te rave peu noa tätou i te ohipa, e aita hoê aè initi tatarahapa...i roto i te mau ohipa ta tätou e rave noa nei i roto i to tätou oraraa nünaa no te Tumu Nui.
I roto i ta tatou mau haamoriraa, te vai ra te tuhaa e faahaehaa ai te taata tatai tahi i mua i te Atua no te tatarahapa. Mea faufaa roa ia haapao maitai tatou i te reira.
A pae

27/06/2026

Mataio 10.37-42
Tapati 28 no APAAPA ( tiunu) 2026
E tano te taioraa no teie mahana ia faahohoahia i te hoê èà tei faatià-hia i mua ia tätou.
E tauturu te èà ia tätou i te tii i te mau taihaa i faauta-hia i te vahi teitei no te haapou mai i raro.
Ua riro te mau haapii-raa e te mau parau ta Ietu i vai-iho mai mai te hoê èà tei haafatata atu ia tatou i te Atua.
Ia hio tatou i te parau ta Ietu i faahiti i te ir 37, ua faaohipa o ia i te taò e te < iti > no te tauturu ia tätou ia faaâpi i te i roto ia tätou e te Atua, tatou te mau metua e te mau tamarii.
Teie mau i roto ia tätou e to tätou mau metua e te mau tamarii, eere teie i te hinaaro no tatou noa, na te Atua teie ôpuaraa, to na teie hinaaro ia tatou ia papu to tatou mau te tahi i te tahi.
E tano ia parau, mea nehenehe ia rave te taata i te ohipa ta to na here i faarave ia na no te mau metua, te tamarii, te vahine e te tane.
Te mea nehenehe roa atu ra ia rave te taata i te ohipa ta to na here i te Atua i faarave ia na.
Te nehenehe no teie ohipa, to tätou ia tuu-raa i te Atua ei matamua i roto i te mau ohipa ta tätou e rave atu.
Eere i te mea ôhie i te vai iho i te Atua ia aratai ia tätou. Teie ra, mai te peu, o te Atua te Varua o ta tatou ohipa, mea papu, ua ineine o ia i te apee e te turu ia tatou i te rave i te mau ohipa e hanahana ai to na ioà.
I te mau vahi atoà e faaite-hia ai te aroha e te here o te Atua tei reira atoà te Tamaiti e te Metua < o tei ite mai ia outou na, ua ite mai ia ù, e o tei ite mai ia ù nei, ua ite ia i tei tono mai ia ù nei ra >.
Te haapapu nei teie parau ia tatou > no te mea, te mau ohipa atoà e rave-hia i roto i te taata e te taata, ua ite te Atua i te reira.
Te mau ohipa tei maraa aore tei ore i maraa ia tätou i te rave no te tahi, ua ite te Atua i te reira.
I roto i te taioraa ua hiti te parau no te utuà, eiaha tatou e maere no te mea, te ohipa ta te here o te taata i te Atua i faarave ia na, eita te reira e moè-hia i te Atua.
E tano e faaau i te utuà mai te hoê haamauruuru-raa na te Atua i te taata.
No reira, i mua i teie mau parau, mea maitai te taata ia ite i to na paruparu e ia ani tamau i ta te Atua tauturu, ia aratai-hia ta tätou mau ohipa e te Varua o te Atua.
A pae

25/06/2026

Hotea 13.1-16.14-1
Mpae 26 no APAAPA (tiunu) 2026
[ O vau ra to oe Atua...o tei aratai mai ia oe...]
E tano teie parau no te mau tau atoa, e e tano hoi no te mau nünaa e no te mau taata atoa.
I roto i te taioraa, o Efaraima teie e parauhia nei, Efaraima, na ôpu hoê ahuru o Iteraèra i taa è i te Atua o te mau tupuna e tei haamori i te mau atua rii tapiripiri hâ noa.
I teie nei, o tatou ta te Atua e parau nei [ O vau ra to oe Atua, o tei aratai mai ia oe...] Eita e ore te haamori atoa nei tatou i teie mahana i te mau atua rii tapiripiri hâ noa.
I raro aè i te aratairaa a te mau tahuà, ua haamori o Efaraima i te mau atua rii ta ratou i hamani. A hio ra te Atua i to ratou atea ia na e to ratou hoi au oreraa i te Atua o te mau tupuna. Ua parau mai te Atua [ o vau ra to oe Atua, o te Tumu Nui, o tei aratai mai ia oe mai te fenua ra mai Aifiti, e aita hoi o oe Atua i ite maori ra o vau, aita atu hoi e Ora è maori ra o vau]. No te oreraa e roaa i te taata i te rave i te ohipa i orahia mai i te tau o te mau tupuna, te faaiho nei teie Reo nui o te Atua, eere e piti, e e toru atu atua, ôtahi te Atua, ôtahi to na huru i nanahi ra, e i nanahi atu ra...
Tatou ra o >, te fanau mai nei tatou e te pohe atu ra, te tià mai ra te tahi ui, e te monohia mai ra e te tahi atu, ta tatou hioraa i te oraraa, tae noa atu i ta tätou hioraa i te Atua, te taui atoa ra ia.
Ua taui roa o Efaraima, noa atu te hape e te tano ore ua taamu o ia i to na here i nià i te mau atua rii no te po taòtaò.
I te tahi aè nei tau, ua mumu, oia hoi ua âmui te tahi pae o te nünaa maohi i mua i te mau itoro no te muhumuhu i to ratou here i teie mau taihaa i faaatuahia.
No te here o Efaraima i te mau taihaa i faaatuahia, ua pohe noa o ia ia na iho. Te taatoa o te nünaa tei naeahia e te pohe. Hiohia atu ra te reira mai te hoê faautuaraa na te Atua i te taata.
Ua hio mai ra te Atua ia Efaraima e ua hio mai ia tatou.
Noa atu ua mā roa to na ioà i te tāmāhia, te parau faahou mai nei te Atua : O VAU ra to oe Atua...o tei aratai mai ia oe...E parauraa teie no te haapapu i te taui ore te huru o te Atua. E aroha e e here mutumu ore to na e te tupu tamau. Eere te aroha e te here o te Atua i te tahi àamu tahito no te mea e ore te reira e taui, ôtahi to na huru i nanahi ra, i teie mahana e a muri noa atu.
Te auraa faaea i te haamaau no te mea, eita tatou e ora ia tätou iho, e pohe ra tatou ia tatou iho.
Te na ô ra Ietu [ e ore te taata e tià ia faaroo i te fatu toopiti e riro o ia i te au ore atu i te hoê e te here atu i te tahi]. Mataio 6.24
No reira aita atu e ùputa e ora ai tatou maoti e niu i to tätou oraraa i nià i te aroha e te here o te Atua ia noaa ia tatou te hoê pūai âpi.
A pae

18/06/2026

Hotea 6.1-6
Mpae 19 no APAAPA (tiunu)2026
No te tauturu ia tätou i te hioraa i te Hotea no teie mahana, e tano tatou e tatuhaa i teie taioraa mai teie i muri nei :
Te faatià nei te ir hoê e tae atu i te toru i te manao aore ra i te ôpuaraa a Iteraèra raua o Iuta.
Te faaite ra te ir maha e tae atu i te ono i to te Atua manao e to na hinaaro i te taata.
Ia hiohia e au ra ua ineine o Iteraèra raua o Iuta i te haere na nià i te èà hoiraa i te Atua o to ratou mau tupuna.
Tona tanoraa mau e faatano te taata i to na hoiraa i nià i ta te Atua faanahoraa.
I ônei, ua faanaho te taata i to na hoiraa ia au i to na manao e ta na faanahoraa.
I te ir piti tatou e ite ai i te faanahoraa a te taata >
Ia hiohia, no te papu ore o te here o te taata i te Atua ua manao o ia e, ta na i ôpua e ta na i faaoti ua au atoa te reira i te Atua.
Ia tae tatou i te ir maha e haere atu i te ono, i reira e papu roa ai te manao e te hinaaro o te Atua.
Ia au i te faanahoraa o te taioraa, ua iritihia teie tuhaa na roto i te hoê uiraa. E uiraa teie na te hoê Atua tei ite i te mau manao e te mau ôpuaraa i hunahia i roto i te ôpu o te taata.
Ua heheu mai te Atua ia Efaraima raua o Iuta i te faito no to raua maitai aore ra no to raua here.
Mai te mea e aroha, e here e e maitai rahi to te Atua i nià i te taata area to te taata maitai e to na here i te Atua mea poto roa ia. E here i te poipoi e ua ahiahi anaè ua pau roa te here. No te poto o te maitai e te here i te Atua rahi faahou te faarore i te mau perofeta ta te Atua i tono. Te perofeta o te vaha ora teie o te Atua i te taria turituri e te faaroo ore o te taata.
No te taata turituri e te faaroo ore, no te taata poto poto te maitai e te here ua haapapu faahou mai te Atua i to na >. I te onoono o te taata i te aro e te patoi i ta te Atua mau ôpuaraa, ua ta-hitihia te taata i te teitei no te aroha o te Atua e ora te taata.
E aroha te Atua. Aita atu e èà e ite ai te taata i te Atua maori ra ia farii o ia i te aroha o te Atua. Na te aroha e tauturu ia na i te ite i te huru e te hinaaro o te Atua. No te mea e aroha te Atua, aita atu to te Tumu Nui hinaaro i te taata maoti ra, ia riro atoà te aroha ei ohipa tumu na na i to na oraraa i te ao nei.
I roto i te pupuraa tutia ua faatiaturihia te taata e na te toto o te animara e faaora ia na.
I ônei, ua hinaaro te Atua ia tiaturi te taata : na te aroha e faaora ia na. Aita atu e titauraa maoti ra, ia vai iho te taata e na te aroha e te here o te Atua e turama e e aratai ia na.
A pae

13/06/2026

Hotea 2.16-25
Monire 15 no APAAPA ( tiunu) 2026.

E turamaraa âpi e te au maitai ta Hotea e hohora nei i mua ia tätou. E turamaraa no te tūàtiraa i rotopu i te taata, te rahu e te Atua.
E tano e parau, ua haa te perofeta eiaha ia tupu te faataaèraa i roto i te taata hara e te Atua no te aroha roa e te here roa.
No te hohonu e te roa no te aroha e te here o te Atua, ua pūehu te patu no te mataêraa e te haavahavaharaa. Haapapuraa, eere roa atu teie i te ôpuaraa na te taata tei teiaha i te viivii ereere rau, no te mamae rā o te ôpu metua o te Tumu i te hioraa mai i te paruparu o te taata i te faaora ia na iho, ôha mai nei te aro o te Metua > tar 85.10-11.
E tià ia tatou ia parau, te nehenehe o te taioraa no teie mahana, ua papaihia ia i nià i te aroha e te parau mau e i nià i te parautià e te hau.
Ua toriri mai te aroha e te parau mau, te parautià e te hau mai te raì hamama noa, rari roa te fenua, te rahu e te taata i te rari o te aroha roa e te here roa o te Tumu Nui.
Mai te rari pape e tāmā, ua tāmāhia te vaha e te âau reporepo o te taata e ore roa atu ai o ia e faahiti faahou i te ioà o te mau atua èè, e parau ra to na vaha i te Atua >.
Aore tatou e parau nei i te Atua e turamaraa teie no te tūàtiraa i roto i te Atua e te nünaa. Mai te vahine i here i te tane ôtahi, ia here te nünaa o te Atua i to na Atua mai te vahine e here i ta na tane.
Ia au i te faaiteraa a te perofeta Hotea , ua faaâpi te Tumu Nui i te Faaauraa i roto ia na e te nünaa. Paèpaèhia te reira i nià i te aroha rahi, te hamani maitai rahi o te Tumu Nui.
Hotu, ruperupe, heeuri to te raì e to te fenua. Hotu te parau mau i roto i te taata ua maraa ia na i te parau i te Atua >.
Te mea ta teie mau parau e faaiho faahou mai nei i roto i to tätou âau teie ia : Ia rave tatou i te mau ohipa atoà, ia riro, o te Atua aè te matamua e o ia anaè ta tatou e here e ta tatou e faahanahana, e o ia ta tätou e haamori...
A pae

11/06/2026

Hotea 2.1-3
Mahana pae 12 no APAAPA (tiunu) 2026

I te pae hopea o te pene hoê, te na ô ra te parau < Eere outou i to ù ra taata...ei reira ratou e parauhia ai >.
I te haamataraa o te pene piti tei nià te parau i te mau ohi âpi e tu mai, oia hoi, tei nia te tiaturiraa i te mau tamarii tamaroa e te mau tamarii tamahine, tei riro ei ananahi no Iuta e no Iteraèra.
Ua piihia te ohi âpi ia tuu mai i te mea âpi, ia fâ mai te hoê ao âpi.
E piiraa teie, ia tutahi te ohi âpi, ia riro ratou ei tuaana e ei tuane te tahi no te tahi no te faatià i te nünaa ia haamori faahou te taata i te Tumu Nui.
Eere teie ohipa i te mea ôhie no te mea, te oraora noa ra te hoê tuputupuā âau ètaèta e te haamori itoro.
Ia au i te taioraa, o Iteraèra teie tuputupuā, i teie ra mahana, te vai ra i roto ia tätou tera mau tuputupuā, haamori itoro.
E faautuaraa huru teiaha tei faautahia i nià i te feia tei pio i mua i te itoro tarai. Te na ô ra te parau < o te taratara vau i to na àhu e vai tahaa noa iho ra o ia ... e faariro vau ia na mai te fenua mārō e pohe o ia ia ù i te poihā >.
E tapao te àhu no te tura. Ia taratarahia te àhu, e tapao no te haamā.
No reira mea faufaa ia tutahi te ohi âpi, ia pū mai te hoê ao âpi, ia hoi mai te tura e te moà.
E tano teie mau parau no te ohi âpi maohi,...faaitoito no te faatià i te hoê oraraa tura e te mā, no te ohi âpi e fâ mai nei e no te ui ruau e moèmoè rii noa atu ra.
No reira ia ara noa eiaha e piko no te mea ua haatihia tatou e te mau tuputupuā, haamori itoro.
Apae.

11/06/2026

Hotea 1.1-9
Mahana maha 11 no APAAPA (tiunu) 2026

Noa atu te teiaha o teie parau, e tano ia tatou ia haapapu : e parau teie na te hoê metua i te mau tamarii.
Mai te tamarii faaroo ore e te faatura ore i te metua, ua tae roa to Iteraèra faaroo ore e ta na faatura ore i mua i te Atua.
I roto i te taioraa no teie mahana, ua faahohoahia o ia i te vahine e te tamarii i mataro i te taiata. (ir 2)
Teie taiata e faahiti hia nei, tei roto te reira i te taata e te Atua, oia hoi, tei roto ia Iteraèra e te Atua o to na mau tupuna.
Ôtahi Atua, oia hoi Hoê anaè Atua e tià i te taata ia haamori.
Ua haamori atoà ra o Iteraèra i te mau atua èè e ua pio i mua i te mau itoro tarai.
Ua taahuri te taata i te tahi pae o te reni uteute i tuuhia e te Atua. Ua faito noa te auraa o te ioà o te tamarii e te huru o te taata paari.
>. "" E ere hoi outou i to ù ra mau taata, eere hoi au i te Atua no outou ", te faito teie i te taata aore ra i te nünaa i pio i mua i te itoro tarai e i mua i te mau atua èè.
I roto i te ino, te atea o te taata i te Atua, te vai ra o Hotea.
Te tià nei o ia i ropu i te taata e te Atua, i ropu i te ino, te pohe e te here e te aroha.
Te faatea nei te ino...e te pohe...
Te faahau nei te here e te aroha.
Aita atu e èà e tano i te taata ia rave oia hoi, e haapae i te ino, e te haamori itoro...haapapu faahou atu ai i te here i te Atua Metua.
Apae.

03/06/2026

Hepera 12.18-24
Faraite 5 no APAAPA (tiunu)2026
I mua i te taioraa no teie mahana e hurihuri tatou i teie mau parau no te imi i te raveà ia maramarama tatou i te mau parau moè, te mau parau àro no te ao o te Atua.
Te mau parau ta te taata papai Hepera e hohora nei i mua ia tätou, ua tupu te tahi tuhaa o teie mau parau i te tau i ora ai o Iteraèra i raro aè i ta Mote aratairaa.
I muri iti noa atu, ua puoi te taata papai i ta na parau i nià i te mau tauiraa i tupu na roto ia Ietu Metia.
I raro aè i ta Mote aratairaa, eere i te mea ôhie no te nünaa i te haafatata i te Atua. E au ra ua moè te Atua i muri i te mau peu e te mau faanahoraa i tuatapapa hia e te taata. Riro ai teie mau faanahoraa mai te auahi ura, mai te ata ereere e te pouri, mai te vero i faataa ê i te taata i te Atua. Mea na roto i te mataù ia haamori te nünaa i te Atua. E tano e haapapu, te taata iho te tumu matamua i moè ai te Atua i muri i te ata ereere e te pouri. E tau teie i faatumu hia i nià i te hoê mau tiaturiraa e moremore roa ai te oaoa, te ièiè e te oraora.
Ore noa atu ai teie mau ohipa i tupu i te tau i mutaa iho ra, ua ite faahou hia taua mau haamaitairaa i te tau o Ietu Metia.
O Tiona e o Ierutarema, aore ra te pupu merahi eita e hope ia taio, te mau matahiapo i papai hia te ioà i te ao Atua e te mau varua o te feia parau tià o te ore e pohe faahou, e hohoa aore ra e hioraa teie no te hoê ao tei faaâpi hia, tei tāmā hia.
Ia hio hia atu, tei pihai iho e tei roto te Atua i te taata i te oraraa. I ônei e tano ai te parau a tera ruau >.
Aore teie manao i faatumu hia i nià i te Faaauraa tahito, ua tanu hia ra i nià i te Faaauraa Âpï ta Ietu i faatià, turu hia e te hotu e te horoa a mama fenua : A rave a àmu, a rave a inu o Vau tena. O Vau tena, o te Metua tena,
Maua tena i pihai iho e i roto ia oe...
Te ièiè, te oraora e te oaoa tei ite hia i roto i te mau merahi, te mau matahiapo e te feia parau tià o te ao Atua, eita e ore te hinaaro nei te Atua ia ite atoa hia teie ièiè, teie oraora e te oaoa i roto i te oraraa o te Maohi, ia ora hoê noa o ia e te Atua Metua, ora i roto i te tura, te parau tià e te here te tahi i te tahi. Mea rahi te mau ata ereere e te pouri e faaapiapi nei ia tätou i te haafatataraa atu i te Atua. No reira te tāmā, te faaâpiraa e ohipa teie no te mau mahana atoa oia hoi, e ohipa e tià ia rave e tae noa atu i te hopeà....ia ora noa mai te Metua i roto ia tätou, e tatou i pihai iho ia na.
A pae

31/05/2026

7 no Tiunu 2020

Adresse

Pirae

Site Web

Notifications

Soyez le premier à savoir et laissez-nous vous envoyer un courriel lorsque Manurere publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager