31/05/2026
🙏❤️ ऐतिहासिक हिलेखर्क घाँटु भोज-२०८३: हार्दिक धन्यवाद, आभार तथा क्षमा याचना ❤️🙏
छ्याजलो, जय तमू तथा हार्दिक नमस्कार ! हाम्रो सिङ्गो तमू (गुरुङ) समुदायको मौलिक पहिचान, परम्परा र ऐतिहासिक सांस्कृतिक धरोहरको रूपमा रहेको वैशाख पूर्णिमा घाँटु उत्सव तथा परम्परागत घाँटु भोज (घाँटु खोई)-२०८३ यस वर्ष तनहुँको ऐतिहासिक हिलेखर्क गाउँमा भव्यताका साथ सफलतापूर्वक सम्पन्न भएको छ। "संस्कृति संरक्षणमा हाम्रो ऐक्यबद्धता" भन्ने मूल भावनालाई आत्मसात् गर्दै, हाम्रो निमन्त्रणालाई स्वीकार गरी टाढा-टाढाका विभिन्न जिल्ला र गाउँहरूबाट आफ्नो अमूल्य समय, स्रोत र साधन खर्चिएर हिलेखर्कको आँगनमा आइपुग्नुभएका सम्पूर्ण आदरणीय पाहुना टोलीहरू, सांस्कृतिक समूहहरू, अग्रज व्यक्तित्वहरू, दर्शक तथा कलाकार ज्यूहरूमा हिलेखर्क गाउँबासी, स्थानीय तमू समाज तथा मूल आयोजक समितिको तर्फबाट हार्दिक कृतज्ञताका साथ मुरी-मुरी धन्यवाद ज्ञापन गर्दछौँ। यहाँहरूले प्रस्तुत गर्नुभएको उत्कृष्ट मौलिक कला र खैंजडी-चुड्काको अभूतपूर्व रौनकले यस वर्षको उत्सवलाई इतिहासकै अद्वितीय र गौरवमय बनाउन ठूलो ऊर्जा प्रदान गरेको छ। यसका साथै, हिलेखर्क आउने क्रममा यहाँहरूले बाटोमा भोग्नुपरेको विभिन्न यात्रागत असहजताप्रति हामी आयोजकका तर्फबाट क्षमाप्रार्थी छौँ भने स्थानीय सीमित साधन र रैथाने स्रोतका बाबजुद खानपान तथा उचित व्यवस्थापनमा रहन गएका कतिपय कमी-कमजोरीहरूलाई गाउँलेको खुला हृदय र आत्मीयता ठानेर स्विकारिदिनुहुन विनम्र अनुरोध गर्दछौँ। यस्ता कमीकमजोरी र व्यावहारिक चुनौतीहरूलाई सिकाईको रूपमा लिँदै आगामी वर्षहरूमा अझ बढी व्यवस्थित र सुदृढ बनाउने प्रतिबद्धता व्यक्त गर्दै आगामी दिनहरूमा पनि हाम्रा सांस्कृतिक कार्यक्रमहरूमा यहाँहरूको यस्तै निरन्तर साथ, सद्भाव र भाइचारा कायमै रहनेछ भन्ने पूर्ण विश्वास लिएका छौँ। अन्त्यमा, यहाँहरू सम्पूर्ण टोली र पाहुनाहरूको उत्तरोत्तर प्रगति, सुस्वास्थ्यको कामना गर्दै आ-आफ्नो गन्तव्यतर्फको यात्रा सुखद रहोस् भन्ने हार्दिक शुभकामना व्यक्त गर्दछौँ।
"हाम्रो कला, हाम्रो संस्कृति - हाम्रो गौरव"
धन्यवाद, जय तमू !
तपाईँकै,
हिलेखर्क समाज
(तथा हिलेखर्क गाउँबासी एवं मूल आयोजक समिति)
हिलेखर्क, तनहुँ, नेपाल
मिति: २०८३ जेठ
