08/08/2026
🌟 पूर्व बाल क्लब सदस्यहरू संगठित हुँदै, कर्णालीमा पहिलो ऐतिहासिक भेला सम्पन्न
सुर्खेत, २०८३ श्रावण २३ ।
कर्णाली प्रदेशमा विभिन्न समयमा बाल क्लबमा आबद्ध भई बालअधिकार, बाल सहभागिता तथा सामाजिक रूपान्तरणमा महत्वपूर्ण योगदान दिएका पूर्व बाल क्लब सदस्यहरूको प्रथम ऐतिहासिक प्रदेशस्तरीय भेला सुर्खेतमा सम्पन्न भएको छ।
बाल अधिकारका लागि साझा अभियान कर्णाली प्रदेश (सिसिआर–कर्णाली) को आयोजना तथा सेभ द चिल्ड्रेन, युनिसेफ र प्लान इन्टरनेशनल नेपालको साझेदारीमा सम्पन्न भेलाले पूर्व बाल क्लब सदस्यहरूलाई संगठित गर्दै आगामी दिनमा बालअधिकारको क्षेत्रमा थप प्रभावकारी योगदान गर्ने आधार तयार गरेको छ।
कार्यक्रमको अध्यक्षता सिसिआर–कर्णालीका अध्यक्ष टीकाराम आचार्यले गर्नुभएको थियो भने कर्णाली प्रदेश सभा सामाजिक विकास समितिका सभापति मा. पूर्णबहादुर खत्रीको प्रमुख आतिथ्यता रहेको थियो। कार्यक्रममा मा. कल्याणी खड्का, मा. उर्मिला विश्वकर्मा, मा. कलबहादुर हमाल, प्रदेश बाल क्लब सञ्जालकी उपाध्यक्ष अनुराधा चौलागाईं, क्याक्मा सुर्खेतकी संयोजक पवित्रा शाही, सेभ द चिल्ड्रेनका रत्नराज ओझा, युनिसेफका दीपक श्रेष्ठ, प्लान इन्टरनेशनलका दीक्षा भाटलगायतको आतिथ्यता रहेको थियो।
पूर्व बाल क्लब सदस्य **शर्मिला वि.सी.**को संयोजकत्वमा गठित कार्यदलको सक्रियतामा भेलाको व्यवस्थापन गरिएको थियो। कार्यक्रममा शर्मिला वि.सी.ले कर्णाली प्रदेशमा बालबालिकाको अवस्था, तथ्यांक तथा प्रमुख सवालहरू प्रस्तुत गर्दै विषय प्रवेश गराउनुभएको थियो। कार्यक्रमको सहजीकरण पूर्व बाल क्लब सदस्य तथा सिसिआर–कर्णालीका कार्यकारी निर्देशक टेकराज आचार्यले गर्नुभएको थियो।
🏅 बालअधिकारका अभियन्तालाई सम्मान
भेलाका अवसरमा बालअधिकारको क्षेत्रमा अतुलनीय योगदान पुर्याउने सुर्खेतका नागरिक समाजका अगुवा पिताम्बर ढकाल, टीकाराम आचार्य, रमा भण्डारी, तत्कालीन जिल्ला बाल कल्याण समितिका बाल प्रतिनिधि टेकराज आचार्य तथा नेपालमा बाल क्लब दर्ताको कानुनी अधिकार स्थापित गर्न महत्वपूर्ण भूमिका निर्वाह गर्नुभएका तिलोत्तम पौडेललाई सम्मान गरिएको थियो।
त्यसैगरी, सुर्खेतमा स्थापना कालदेखि निरन्तर बालअधिकारको क्षेत्रमा योगदान पुर्याउँदै आएका सेभ द चिल्ड्रेन र स्याक नेपाललाई समेत सम्मान गरिएको थियो।
💬 “बाल सहभागिता हिजो, आज र भोलि”
“बाल सहभागिता : हिजो, आज र भोलि” विषयक प्यानल छलफलमा पूर्व बाल क्लब सदस्य तथा हाल गुर्भाकोट नगरपालिकाकी उपप्रमुख मैना वि.क., पूर्व बाल क्लब सदस्य तथा हाल युनिसेफमा कार्यरत प्रेम चन्द र सफल युवा उद्यमी दीपक बुढाले आफ्ना अनुभव तथा विचार प्रस्तुत गर्नुभएको थियो। छलफलको सहजीकरण पूर्व बाल क्लब सदस्य राकेश पौडेलले गर्नुभएको थियो।
त्यसैगरी, वर्तमान बाल क्लबमा आबद्ध सदस्य र पूर्व बाल क्लब सदस्यबीचको अन्तरक्रिया रमा भण्डारी, बाले विश्वकर्मा, तारा प्रसाद पौडेल, अनिता नेपाली र हिमा उपाध्यायले संयुक्त रूपमा सहजीकरण गर्नुभएको थियो।
🤝 पूर्व बाल क्लब सदस्यहरूको प्रदेशस्तरीय सञ्जाल गठन
भेलाले पूर्व बाल क्लब सदस्यहरूलाई संगठित गरी बालअधिकारको क्षेत्रमा योगदान पुर्याउने उद्देश्यले कार्यविधि पारित गरेको छ। कार्यविधिअनुसार एक वर्षे कार्यकाल रहने १५ सदस्यीय समिति गठन गरिएको छ।
कर्णाली प्रदेशका १० वटै जिल्लाबाट एक/एक जना प्रतिनिधिका साथै महिला, दलित, अपाङ्गता भएका व्यक्ति, यौनिक तथा लैङ्गिक अल्पसंख्यक र सदस्य–सचिवसहित समावेशी प्रतिनिधित्व सुनिश्चित गरिएको छ।
कार्यविधिअनुसार संयोजकमा सुर्खेतका तेज सोनाम र उपसंयोजकमा जुम्लाकी अनिता वि.क. चयन हुनुभएको छ। सदस्यहरूमा दैलेखबाट हरिकला खड्का, कालिकोटबाट बाले विश्वकर्मा, मुगुबाट अनिता भियाल, डोल्पाबाट रणबहादुर कार्की, जाजरकोटबाट जयन्ता खत्री सुधा तथा सल्यानबाट प्रकाश नेपाली चयन हुनुभएको छ।
📜 १२ बुँदे “कर्णाली घोषणा–पत्र” जारी
भेलाले बालअधिकारको संरक्षण, प्रवर्द्धन र सुनिश्चितताका लागि १२ बुँदे कर्णाली घोषणा–पत्र समेत जारी गरेको छ।
घोषणा–पत्रमा पूर्व बाल क्लब सदस्यहरूलाई सञ्जालमा आबद्ध गराउने, सञ्जाललाई संस्थागत तथा सुदृढ बनाउने, बाल संरक्षणसम्बन्धी संरचनालाई सहयोग गर्ने, सीप तथा क्षमताका आधारमा जिम्मेवारी बाँडफाँट गर्ने, आत्मनिर्भरता प्रवर्द्धन गर्ने, विविधताको सम्मान गर्दै गैरराजनीतिक तथा धार्मिक तटस्थता कायम गर्ने, तथ्य र तथ्यांकमा आधारित पैरवी गर्ने, संवाद–सहकार्य–समन्वय र साझेदारीलाई प्राथमिकता दिने, समावेशी तथा समानतामूलक संस्कृतिको प्रवर्द्धन गर्ने, अधिकारमुखी अवधारणा अवलम्बन गर्ने तथा बालअधिकार सुनिश्चितताका लागि सक्रिय भूमिका निर्वाह गर्ने प्रतिबद्धता व्यक्त गरिएको छ।
साथै, बालबालिकाको आवाज परिवार, समुदाय तथा संस्थागत तहमा सुनुवाइका लागि पैरवी गर्ने र तत्कालका लागि कर्णालीका १० वटै जिल्लाबाट प्रतिनिधित्व हुने गरी सञ्जाललाई थप व्यवस्थित बनाउने निर्णय गरिएको छ।
पूर्व बाल क्लब सदस्यहरू अब विगतको अनुभव मात्र होइन, भविष्यको बालअधिकार अभियानका सक्रिय सारथी बन्ने प्रतिबद्धतासहित एकजुट भएका छन्।
💙 बाल सहभागिताको अनुभव, अधिकारको अभियान र समृद्ध कर्णालीको संकल्प!
#पूर्वबालक्लबसदस्य #बालअधिकार #बालसहभागिता #कर्णालीघोषणापत्र .
