09/07/2026
शैक्षिक सामग्री वितरण
बर्दिबास (महोत्तरी), असार २०, २०८३।
सेवा र विकासका लागि युवा को आयोजना, प्राज्ञिक विद्यार्थी परिषद्, नेपाल को समन्वय तथा भारतीय जनता र भारत सरकारको सहयोगमा महोत्तरीको बर्दिबासस्थित श्री देउराली माध्यमिक विद्यालय मा अध्ययनरत विद्यार्थीलाई शैक्षिक सामग्री वितरण गरिएको छ।
आयोजित कार्यक्रममा विद्यालयका कक्षा ११ र १२ मा अध्ययनरत १२५ जना विद्यार्थी लाई विद्यालय झोला, कापी, कलम, प्रज्ञा बृहत् नेपाली शब्दकोश तथा अङ्ग्रेजी बोलचाल पुस्तकलगायत अध्ययनका लागि आवश्यक शैक्षिक सामग्री वितरण गरिएको थियो। साथै विद्यालयका शिक्षकहरूलाई सम्मानस्वरूप टोपी पनि प्रदान गरिएको थियो।
कार्यक्रमका प्रमुख अतिथि बर्दिबास नगरपालिकाका नगर प्रमुख श्री प्रह्लाद कुमार क्षेत्री ले यस्ता सहयोगमूलक कार्यक्रमले विद्यार्थीको अध्ययनमा उत्साह थप्नुका साथै गुणस्तरीय शिक्षाको प्रवर्द्धनमा टेवा पुग्ने विश्वास व्यक्त गर्नुभयो। उहाँले शिक्षा क्षेत्रमा सरकारी निकाय, सामाजिक संस्था तथा समुदायबीचको सहकार्यलाई अझ सुदृढ बनाउनुपर्नेमा जोड दिनुभयो।
कार्यक्रममा प्राज्ञिक विद्यार्थी परिषद्, नेपाल का राष्ट्रिय सह–संगठन सचिव श्री छितराज न्यौपाने, हिन्दू स्वयंसेवक संघ नेपालका संभाग प्रचारक श्री लक्ष्मण यादव, विद्यालय व्यवस्थापन समितिका अध्यक्ष श्री भोला खड्का, निमित्त प्रधानाध्यापक श्री सरोजकुमार मिश्र,, राष्ट्रिय सचिव एवं जानकी विभाग संगठन सचिव श्री अरुणप्रसाद कुशवाह, परिषद्का पूर्व जानकी प्रदेश उपाध्यक्ष श्रीमती यशोधा श्रेष्ठ, मधेश प्रदेशकी पूर्व प्रदेश सचिव सुश्री सबिना लामगादे, पूर्व प्रदेश सहसचिव सुश्री गंगा गजमेर लगायतको उपस्थिति रहेको थियो।
कार्यक्रमलाई सम्बोधन गर्दै वक्ताहरूले शिक्षा नै समृद्ध समाज निर्माणको आधार भएको उल्लेख गर्दै आर्थिक रूपमा कमजोर तथा जेहेन्दार विद्यार्थीलाई लक्षित यस्ता सहयोगमूलक कार्यक्रमले उनीहरूको अध्ययनलाई सहज बनाउनुका साथै आत्मविश्वास अभिवृद्धि गर्न महत्वपूर्ण भूमिका खेल्ने धारणा व्यक्त गरे।
आयोजक संस्था सेवा र विकासका लागि युवा ले शिक्षा, सेवा र संस्कारलाई आफ्नो मूल उद्देश्य बनाएर देशका विभिन्न जिल्लामा शैक्षिक सहयोग अभियान सञ्चालन गर्दै आएको जनाएको छ। संस्थाले आगामी दिनमा पनि विपन्न तथा जेहेन्दार विद्यार्थी र शैक्षिक संस्थालाई लक्षित गरी यस्ता सेवामूलक कार्यक्रमलाई निरन्तरता दिने प्रतिबद्धता व्यक्त गरेको छ।