23/11/2024
निजी मेडिकल कलेजमा अध्ययनरत आवासीय चिकित्सकहरुलाई कलेज सञ्चालकहरुले निर्वाह भत्ता दिन अस्वीकार गरेको परिप्रेक्ष्यमा आवासीय चिकित्सकहरुको संगठन हरुको साझा धारणा।
प्रेस विज्ञप्ति
मिति: २०८१ मंसिर ८ (November 23, 2024)
विषय: आवासीय चिकित्सकहरूको लागि समान तलबको अनिवार्यता
हाल निजी मेडिकल कलेजमा कार्यरत आवासीय चिकित्सकहरूले मासिक करिब रु. २०,००० पाउँछन्, जुन उनीहरूले व्यावसायिक जीवनमा खेपिरहेको शारीरिक, मानसिक र भावनात्मक बोझको तुलनामा अपमानजनक छ।
आवासीय चिकित्सकहरू कुनै साधारण विद्यार्थी होइनन्; हाम्रो स्वास्थ्य प्रणालीका आधारस्तम्भ हुन्, जो दिनरात खटिएर बिरामीहरूको उपचार गर्छन्। उनीहरूको मेहनतको उचित मूल्याङ्कन नगर्नु केवल उनीहरूको अपमान मात्र होइन, सम्पूर्ण स्वास्थ्य सेवाको गुणस्तरप्रति अन्याय गर्नु हो।
चिकित्सा शिक्षा आयोगले यसअघि नै निजी मेडिकल कलेजहरूलाई समान निर्वाह भत्ता सुनिश्चित गरी सिट माग गर्न स्वमुल्याङ्कन फारम भर्न सुचित गरेको थियो। तर, निजी मेडिकल कलेजहरूले उक्त निर्देशनलाई वेवास्ता गर्दै MD/MS कार्यक्रमका लागि आवश्यक स्वमूल्याङ्कन फारमसमेत बुझाउन अस्वीकार गरे र आफ्ना स्नातकोत्तर कार्यक्रमहरू नै बन्द गर्ने धम्की दिए। यस किसिमको गैरजिम्मेवार व्यवहारले आवासीय चिकित्सकहरूको योगदानलाई अपमानित गर्ने मात्र होइन, हाम्रो सम्पूर्ण स्वास्थ्य प्रणालीलाई नै जोखिममा पार्छ।
हामी देशभरका सम्पूर्ण आवासीय (MD/MS/MDS) चिकित्सकहरूको लागि ८ औं तहको सरकारी कर्मचारीको तलब बराबरको निर्वाह भत्ता सुनिश्चित गर्न जोडदार माग गर्दछौँ।
स्वास्थ्यकर्मीहरूका लागि सुरक्षित कार्यस्थल संघर्ष समितिको आवाजले स्वास्थ्यकर्मीहरूको सम्मानजनक र सुरक्षित वातावरणको लडाइँलाई थप बल दिएको छ, जसलाई हामी उच्च मूल्याङ्कन गर्दछौं र पूर्ण ऐक्यबद्धता प्रकट गर्दछौँ।
आवासीय चिकित्सकहरूको लागि समान तलब लागू गर्नु अब ढिला गर्नै नसकिने कुरा हो। यदि हाम्रो यस मागलाई बेवास्ता गरियो वा निजी मेडिकल कलेजहरूलाई फाइदा पुर्याउन आवासीय चिकित्सकहरूको हितविपरीत सिट र सत्र थप्ने प्रयास गरियो भने, हामी कडा आन्दोलन गर्न बाध्य हुनेछौं।
