31/05/2026
मामाघर अनाथालय तथा सपोर्ट एन्ड केयर सेन्टर नेपालको सामाजिक लेखा परीक्षण सम्पन्न
ललितपुरको गोदावरी नगरपालिका–१४ स्थित मामाघर अनाथालय तथा सपोर्ट एन्ड केयर सेन्टर नेपालले आर्थिक वर्ष २०८१/८२ को सामाजिक लेखा परीक्षण कार्यक्रम सम्पन्न गरेको छ। संस्थापक अध्यक्ष बालयोगेश्वर विजय कृष्णमूर्ति जी महाराजको अध्यक्षतामा सम्पन्न कार्यक्रममा जनप्रतिनिधि, सुरक्षाकर्मी, समाजसेवी, विभिन्न संघसंस्थाका प्रतिनिधि तथा स्थानीयवासीहरूको उल्लेख्य सहभागिता रहेको थियो।
कार्यक्रममा संस्थाको वार्षिक प्रगति, सेवा गतिविधि, आर्थिक तथा प्रशासनिक पक्षलगायत विषयमा प्रतिवेदन प्रस्तुत गरिएको थियो। सामाजिक लेखा परीक्षणका क्रममा संस्थाले अनाथ, असहाय तथा अभिभावकविहीन बालबालिकाको पालनपोषण, शिक्षा, स्वास्थ्य, आवास तथा संरक्षणका क्षेत्रमा निरन्तर सेवा प्रदान गर्दै आएको जानकारी गराइएको थियो।
कार्यक्रममा बोल्दै वरिष्ठ समाजसेवी रविन सिलवालले संस्थापक अध्यक्ष बालयोगेश्वर विजय कृष्णमूर्ति जी महाराजले गरिरहेको मानवीय सेवाको खुलेर प्रशंसा गरे। उनले यस्ता महान् तथा पुण्य कार्यमा आफू सधैं सहयोगका लागि तत्पर रहने बताउँदै समाजका असहाय, अनाथ तथा अभिभावकविहीन बालबालिकाका लागि संस्थाले पुर्याएको योगदान अनुकरणीय रहेको धारणा व्यक्त गरे।
त्यसैगरी बाडेगाउँ प्रहरी प्रभागका प्रहरी निरीक्षक विक्रम केसीले मामाघर अनाथालय तथा सपोर्ट एन्ड केयर सेन्टरले सञ्चालन गरिरहेको मानवीय कार्यप्रति सम्मान व्यक्त गरे। उनले विभिन्न सामाजिक तथा जनचेतनामूलक अभियानमा संस्थाले प्रहरी प्रशासनलाई समेत महत्वपूर्ण सहयोग गर्दै आएको स्मरण गराए। साथै, संस्थाले सञ्चालन गरिरहेका आश्रमहरूमा प्राप्त सहयोगको पारदर्शी तथा व्यवस्थित व्यवस्थापन हुनुपर्नेमा जोड दिए।
कार्यक्रमका प्रमुख अतिथि गोदावरी नगरपालिका–१४ का वडाध्यक्ष निरोज ब्राचार्यले मामाघर आश्रमले गरिरहेको कार्यप्रति आफू अत्यन्त सन्तुष्ट रहेको बताए। उनले संस्थाको अभिलेख व्यवस्थापन, आर्थिक पारदर्शिता तथा सेवा प्रवाह उत्कृष्ट रहेको उल्लेख गर्दै अन्य बाल आश्रमहरूले पनि मामाघरको कार्यशैलीबाट प्रेरणा लिनुपर्ने आवश्यकता औँल्याए। साथै, यस्ता मानवीय तथा समाजसेवामूलक कार्यका लागि उनले संस्थापक अध्यक्ष बालयोगेश्वर विजय कृष्णमूर्ति जी महाराजप्रति विशेष धन्यवाद व्यक्त गरे।
सामाजिक लेखा परीक्षणकर्ता रुपेश साउदले संस्थाको वर्तमान आर्थिक अवस्थाबारे जानकारी गराउँदै संस्था घाटामा सञ्चालन भइरहेको बताए। उनले संस्थाका सञ्चालकहरूलाई दैनिक सञ्चालन तथा व्यवस्थापन खर्च जुटाउन चुनौतीपूर्ण अवस्था रहेको उल्लेख गर्दै स्थानीय, प्रदेश तथा संघीय सरकारबाट आवश्यक सहयोग प्राप्त हुने अपेक्षा गरिएको बताए। साथै, समाजका विभिन्न क्षेत्रबाट सहयोग र सहकार्य बढ्दै गए संस्थाले अझ प्रभावकारी रूपमा सेवा विस्तार गर्न सक्ने विश्वास व्यक्त गरे।
संस्थापक अध्यक्ष बालयोगेश्वर विजय कृष्णमूर्ति जी महाराजले संस्थाले विगतदेखि नै अनाथ, असहाय तथा विपन्न बालबालिकालाई निःशुल्क रूपमा गाँस, बास, कपास, शिक्षा, स्वास्थ्य तथा सुरक्षाको व्यवस्था गर्दै आएको जानकारी गराए। उनले समाजका सहयोगी दाता, शुभेच्छुक तथा सरोकारवाला निकायहरूको निरन्तर साथ र सहयोगबाट आगामी दिनमा पनि सेवा विस्तार गर्दै लैजाने प्रतिबद्धता व्यक्त गरे।
सामाजिक लेखा परीक्षण कार्यक्रममा सहभागीहरूले संस्थाले सामाजिक उत्तरदायित्व, पारदर्शिता तथा मानव सेवाका क्षेत्रमा निर्वाह गरेको भूमिकाको उच्च प्रशंसा गर्दै आगामी दिनमा अझ प्रभावकारी ढंगले सेवा विस्तार गर्न सुझाव दिएका थिए। कार्यक्रमले संस्थाको आर्थिक तथा प्रशासनिक पारदर्शितासँगै बालकल्याण र मानव सेवाप्रतिको प्रतिबद्धतालाई थप उजागर गरेको सहभागीहरूको भनाइ थियो।
