22/09/2026
राष्ट्रिय फोटो पत्रकार समूह (एनएफपिजे, नेपाल) ३०औँ वर्षमा प्रवेश
काठमाडौं । नेपालको फोटो पत्रकारिताको संस्थागत विकास, प्रवर्द्धन र संरक्षणमा महत्वपूर्ण योगदान पुर्याउँदै आएको राष्ट्रिय फोटो पत्रकार समूह (एनएफपिजे) नेपाल आजदेखि ३०औँ वर्षमा प्रवेश गरेको छ।
फोटो पत्रकारहरूको हकहित, व्यावसायिक क्षमता अभिवृद्धि तथा नेपाली फोटो पत्रकारितालाई राष्ट्रिय तथा अन्तर्राष्ट्रियस्तरमा स्थापित गर्ने उद्देश्यसहित स्थापना भएको एनएफपिजे नेपालले तीन दशकको यात्रामा विभिन्न महत्वपूर्ण गतिविधि सञ्चालन गर्दै आएको छ।
समाचार, संस्कृति, पर्यटन, कला, सामाजिक जीवन तथा देशमा भएका महत्वपूर्ण राजनीतिक, सामाजिक र प्राकृतिक घटनाक्रमलाई तस्वीरमार्फत अभिलेखीकरण गर्दै आएको एनएफपिजे नेपालले फोटो पत्रकारिताको विकासमा उल्लेखनीय भूमिका निर्वाह गरेको छ। संस्थाले फोटो प्रदर्शनी, फोटो प्रतियोगिता, तालिम, कार्यशाला, अन्तर्राष्ट्रिय फोटो आदानप्रदान तथा विभिन्न सामाजिक एवं मानवीय गतिविधिमार्फत आफ्नो भूमिका विस्तार गर्दै आएको छ।
विशेषगरी विश्व फोटोग्राफी दिवस, राष्ट्रिय फोटो पत्रकारिता दिवस, फोटो प्रदर्शनी तथा फोटो पत्रकारिता सम्बन्धी विभिन्न प्रशिक्षण कार्यक्रम आयोजना गर्दै आएको संस्थाले नयाँ पुस्ताका फोटो पत्रकारलाई व्यावसायिक र प्रविधिमैत्री बनाउन पनि निरन्तर पहल गर्दै आएको छ।
तीन दशकको यात्रालाई संस्थाले केवल वर्षगाँठका रूपमा मात्र नभई नेपाली फोटो पत्रकारिताको विगत, वर्तमान र भविष्यलाई जोड्ने महत्वपूर्ण अवसरका रूपमा लिएको जनाएको छ। पछिल्लो समय डिजिटल प्रविधि, ड्रोन, मोबाइल पत्रकारिता, आर्टिफिसियल इन्टेलिजेन्स तथा सामाजिक सञ्जालको तीव्र विकाससँगै फोटो पत्रकारितामा आएको परिवर्तनलाई आत्मसात् गर्दै संस्थाले आफ्ना गतिविधिलाई थप समयसापेक्ष बनाउँदै आएको छ।
एनएफपिजे नेपालका अध्यक्ष प्रदीपराज वन्तको नेतृत्वमा संस्थाले फोटो पत्रकारहरूको व्यावसायिक क्षमता अभिवृद्धि, पेशागत हकहित तथा नेपाली फोटो पत्रकारिताको अन्तर्राष्ट्रिय पहिचान विस्तारका लागि विभिन्न कार्यक्रम सञ्चालन गर्दै आएको छ। महासचिव घनश्याम श्रेष्ठसहित केन्द्रीय समितिले संस्थागत गतिविधिलाई निरन्तरता दिँदै आएको छ।
संस्थाका वरिष्ठ उपाध्यक्ष एल.वि. सागर श्रेष्ठले तीन दशकको यात्रा फोटो पत्रकारहरूको निरन्तर मेहनत, योगदान र एकताको परिणाम भएको बताउँदै आगामी दिनमा फोटो पत्रकारितालाई अझ प्रविधिमैत्री, व्यावसायिक र अन्तर्राष्ट्रियस्तरमा प्रतिस्पर्धी बनाउँदै लैजानुपर्ने आवश्यकता रहेको उल्लेख गर्नुभयो।
तीन दशकको यात्रामा एनएफपिजे नेपालसँग जोडिएर नेपाली फोटो पत्रकारिताको विकासमा योगदान पुर्याउने संस्थापक, पूर्वअध्यक्ष, पदाधिकारी, सदस्य, फोटो पत्रकार, शुभेच्छुक तथा सहयोगी सबैप्रति संस्थाले कृतज्ञता व्यक्त गरेको छ।
३०औँ वर्ष प्रवेशसँगै एनएफपिजे नेपालले नेपाली फोटो पत्रकारिताको इतिहासलाई अभिलेखीकरण गर्दै नयाँ पुस्तालाई जोड्ने, पेशागत क्षमता अभिवृद्धि गर्ने र नेपालको कला, संस्कृति, पर्यटन तथा सामाजिक जीवनलाई तस्वीरमार्फत विश्वसामु चिनाउने अभियानलाई अझ प्रभावकारी बनाउने प्रतिबद्धता जनाएको छ।
