14/06/2026
पहिले घर थिए, अहिले भवन छन् ।यो विनाश हो कि विकास ..! 🤔🤔🤔
पहिले घर साना थिए, तर परिवार ठूला थिए।
अहिले घर ठूला छन्, तर परिवार साना हुँदै गएका छन्।
पहिले एउटै चुल्होमा १० जना खान्थे।
अहिले १० कोठाको घरमा २ जना पनि सँगै बसेर खान पाउँदैनन्।
पहिले बुढाबुढी घरका अभिभावक हुन्थे।
अहिले धेरैका लागि उनीहरू बोझ जस्ता भएका छन्।
पहिले आमाबुबाको अनुभव नै विश्वविद्यालय थियो।
अहिले गुगलमा नभेटिने कुरा सत्य नै होइन जस्तो लाग्न थालेको छ।
पहिले साँझ परेपछि घरमा सबै भेला हुन्थे।
सुख–दुःखका कुरा हुन्थे, हाँसो हुन्थ्यो, आत्मीयता हुन्थ्यो।
अहिले एउटै घरभित्र सबै छन्,
तर कोही मोबाइलमा छ,
कोही टेलिभिजनमा छ,
कोही आफ्नै संसारमा छ।
पहिले घरमा पाहुना आउँदा खुसी थपिन्थ्यो।
अहिले फोन नगरी आउँदा समस्या थपिएको जस्तो लाग्छ।
पहिले छिमेकी परिवार जस्तै हुन्थे।
अहिले वर्षौँसम्म सँगै बस्दा पनि नाम थाहा हुँदैन।
पहिले सम्पत्ति कम थियो, सम्बन्ध धेरै थिए।
अहिले सम्पत्ति धेरै छ, सम्बन्ध कम छन्।
पहिले मानिस घर बनाउन खोज्थ्यो।
अहिले भवन बनाउन खोज्छ।
तर भवन इँटा, सिमेन्ट र फलामले बन्छ।
घर प्रेम, विश्वास, त्याग र संस्कारले बन्छ।
आज हामीले भवन त धेरै बनायौँ,
तर घर बनाउन बिर्सियौँ।
आज हामीसँग महँगा सोफा छन्,
तर परिवारसँग बसेर कुरा गर्ने समय छैन।
ठूला–ठूला बेडरुम छन्,तर निन्द्रा छैन।
आधुनिक भान्सा छ,तर सँगै बसेर खाने संस्कार छैन।
सुविधा बढ्दै गयो, तर आत्मीयता घट्दै गयो।
त्यसैले प्रश्न भवनको होइन,प्रश्न परिवारको हो।
प्रश्न पैसाको होइन,प्रश्न संस्कारको हो।
प्रश्न विकासको होइन,प्रश्न दिशाको हो।
यदि हाम्रो विकासले परिवार छुटाउँछ,
आमाबुबालाई एक्लो बनाउँछ,
सन्तानलाई संस्कारविहीन बनाउँछ भने,
एकपटक सोच्नैपर्छ—
हामी साँच्चै अगाडि बढिरहेका छौँ,
कि आफूलाई बनाउने जरा नै काटिरहेका छौँ ?
बरु सानो घर होस्,तर ठूलो परिवार होस्।
बरु कम सम्पत्ति होस्,तर धेरै आत्मीयता होस्।
किनकि अन्तिम समयमा मानिसलाई भवनले होइन,
आफ्ना मानिसले साथ दिन्छन्।त्यसैले गाली मात्र गरेर के गर्नु हामी चै आफ्नै पहलमा सनातन बस्ती बनाएर मानवता बचाउने बीउ जोगाउने अभियानमा छौँ
#जयसंगत । #संगतसंस्कृति #सनातनबस्ती
@ संस्कार सहितको प्राकृतिक जीवनको लागि — संगतसंस्कृति
