21/08/2026
महिला उद्यमीलाई एआई सम्बन्धी आधारभूत तालिम
https://fncci.org/news/detail.php?i=4526
नेपाल उद्योग वाणिज्य महासंघ अन्तरगतको महिला उद्यमी विकास समितिले महिला उद्यमीहरूका लागि आर्टिफिसियल इन्टेलिजेन्स (एआई) सम्बन्धी आधारभूत तालिम सम्पन्न गरेको छ । भर्चुअल माध्यमबाट आयोजित तालिममा देशभरबाट ९० भन्दा बढी महिला उद्यमीको सहभागिता रहेको थियो ।
महिला उद्यमीहरूलाई पछिल्लो प्रविधिसँग परिचित गराउँदै व्यवसाय सञ्चालन, व्यवस्थापन, बजारीकरण तथा व्यवसाय विस्तारमा एआईको प्रभावकारी प्रयोग गर्न सक्षम बनाउने उद्देश्यले तालिम आयोजना गरिएको हो । भूगोलपार्क एआई सोलुसन्सको सहकार्यमा सम्पन्न तालिमका क्रममा सहभागीहरूलाई एआईका आधारभूत अवधारणा, व्यवसायमा एआईको प्रयोग, सामग्री निर्माण, डिजिटल बजारीकरण, व्यवसायिक सूचना संकलन तथा अन्य व्यावहारिक क्षेत्रमा एआईको उपयोगबारे जानकारी र अभ्यास गराइएको थियो ।
कार्यक्रममा महासंघका अध्यक्ष अञ्जन श्रेष्ठले एआईलगायत नवीन प्रविधिको प्रयोगले उद्यमशीलता र व्यवसाय सञ्चालनमा प्रभावकारिता तथा प्रतिस्पर्धात्मक क्षमता अभिवृद्धि गर्न महत्वपूर्ण योगदान पु¥याउने बताउनुभयो । महासंघमा महिला उद्यमीहरूको ठूलो र देशव्यापी सञ्जाल रहेको उल्लेख गर्दै उहाँले समयअनुकूल नयाँ प्रविधि, ज्ञान र सीप आत्मसात् गर्दै महिला उद्यमीहरूले आफूलाई थप सक्षम र प्रतिस्पर्धी बनाउनुपर्नेमा जोड दिनुभयो ।
अध्यक्ष श्रेष्ठले प्रविधिको ज्ञान र प्रयोग व्यवसायको विकास तथा प्रतिस्पर्धात्मक क्षमता अभिवृद्धिको महत्वपूर्ण आधार बन्दै गएको बताउँदै सहभागी महिला उद्यमीहरूलाई नयाँ प्रविधिको प्रयोगबाट आफ्नो व्यवसायलाई थप व्यवस्थित र प्रभावकारी बनाउन आग्रह गर्नुभयो ।
त्यसैगरी, महासंघका वरिष्ठ उपाध्यक्ष सुरकृष्ण वैद्यले महिला उद्यमीहरूको क्षमता अभिवृद्धि तथा व्यवसायलाई प्रविधिमैत्री बनाउन यस्ता तालिम महत्वपूर्ण रहेको बताउनुभयो। तालिमबाट प्राप्त ज्ञानलाई व्यवहारमा लागू गर्न आग्रह गर्दै उहाँले महिला उद्यमीहरूले उत्पादन गरेका वस्तुको बजारीकरणमा सहयोग पु¥याउने उद्देश्यले काठमाडौंसहित सातै प्रदेशमा क्रमिक रूपमा ‘कोसेली घर’ स्थापना गर्दै लैजाने बताउनुभयो ।
कार्यक्रमको प्रारम्भमा महिला उद्यमी विकास समितिका सभापति सुनिता न्हेम्हाफुकीले स्वागत मन्तव्य व्यक्त गर्दै व्यवसायको क्षेत्रमा प्रविधि र एआईको प्रयोग तीव्र रूपमा बढिरहेको अवस्थामा महिला उद्यमीहरूलाई नयाँ प्रविधिसँग परिचित गराउन आवश्यक रहेको बताउनुभयो। उद्यम व्यवसाय सञ्चालनको प्रारम्भिक चरणदेखि उत्पादनको गुणस्तर, बजारीकरण र व्यवसाय विस्तारसम्म प्रविधिको प्रयोगमार्फत महिला उद्यमीहरूको क्षमता अभिवृद्धि गर्नुपर्ने उहाँको भनाइ थियो ।
महिला उद्यमशीलताको विकास, महिला उद्यमीहरूको क्षमता अभिवृद्धि तथा व्यवसायलाई प्रविधिमैत्री बनाउने उद्देश्यले आगामी दिनमा पनि ज्ञान, सीप र प्रविधिमा आधारित कार्यक्रमलाई निरन्तरता दिइने महिला उद्यमी विकास समितिले जनाएको छ ।
#नेउवामहासंघ
