18/05/2026
लेख: शैलेन्द्र श्रेष्ठ
शुद्ध सिद्द गुरु परम्परामा रहेर अभ्यास गर्ने कुनैपनि बौद्ध गुरु या बौद्ध अनुयायी हरुले हिन्दु देवि देवता हरु जस्तै कि राम , कृष्ण , शिव , हनुमान , विष्णु या दुर्गा लगायत का देवि देवताहरुको भक्तिको गुण गाएर शरण गएको , उनिहरुको बयान गरेको वा चरण दण्डवत प्रणाम गरेको देख्नु र सुन्नु भएको छ ? पक्कै छैन होला !
तर हिन्दु गुरु भनाउँदा हरु सदगुरु , बिबेकानन्द , रवि शंकर , कृष्णमुर्ती , इस्कोनका गुरुहरु जस्ता हरुले आफ्नो हिन्दु धर्म वा सनातन धर्मका नाममा आफ्नो धर्म मात्र होइन जानी नजानी बेला बेलामा बुद्ध र बौद्ध धर्मको बयान र गुण नगाई बस्नै सक्दैनन। हिन्दु गुरु हरु तथा अनुयायी हरुले बुद्ध र बौद्ध धर्मलाई आफ्नो जस्तो ठानी अंगालो त हाल्छ्न तर लामो तीखो नंग्राले घांटिमा कोपार्छ्न पनि । शुद्ध रुपमा बौद्ध धर्म र बुद्ध को मात्र बयान र गुण गाए त ठिकै थियो तर बुद्ध र बौद्ध धर्मलाई सनातन वा ॐकार परिवारमा जबर्जस्ती मिसमास गरेर , अन्त सन्त बकवास कथा बनाई , बुद्ध बिष्णु का अवतार वा बुद्ध पनि हिन्दु थिए वा हिन्दु र बौद्ध धर्म एकै हो जस्ता भ्रमहरु को बिकास गरि बौद्ध धर्म र हिन्दु धर्मलाई एकै ठाउँमा मिसाई मानिस हरुलाई गलत दिशा तिर अगाडि बढाइरहेको र गलत भ्रम छरिरहेको देखिन्छ।
वास्तव यसरी गलत तरिकाले बुझाउने र भ्रम छर्ने प्रवृती अहिले मात्र होइन १५०० वर्ष अगाडि देखि नै चल्दै आएको हो। किनकी १५०० वर्ष अगाडि पुरै एसिया वा जम्बुद्विप भरि ८० % भन्दा बढी त बौद्ध अनुयायी नै थिए। तर पछि शंकराचार्य को उदय पछि आफ्नो हिन्दु धर्म लाई प्रतिस्थापन गर्न को लागि बौद्ध धर्म कोसिद्धान्त लाई दमन गर्दै आफ्नो हिन्दु धर्मको परम्परा अगाडि बढाउन उनिहरुलाई बौद्ध धर्म को साथ नै अत्यावश्यक भयो किनकी बहुसंख्यक मानिसहरु बौद्ध नै थिए। त्यही बहुसंख्यक मानिसहरुको धर्मिक दिशा परिवर्तन गर्न बौद्ध धर्मलाई कठपुतली को रुपमा प्रयोग गरियो र बौद्ध धर्म र हिन्दु धर्म लक्ष्य एकै हो , हिड्ने बाटो मात्र फरक हो , भन्ने जस्ता बुंदा हरु अघि सारिए , एउटै सनातन धर्म वा ओमकार परिवार भित्र पार्ने , बुद्ध लाई बिष्णुको अवतार बनाउने जस्ता कपटी चाल हरु चाल्न थाले। जुन अहिलेसम्म निरन्तर रुपमा चलिरहेकै छ।
र अहिले पनि हिन्दुहरुलाई आफ्नो अस्तित्व बचाउन उनिहरु बुद्ध र बौद्ध धर्मको साथ लिन बाध्य छ्न । किनकी अहिले हिन्दु भन्ने गरिएका अनुयायीहरुका पू्र्खा हरु सबै १५०० वर्ष अगाडि बौद्ध नै थिए , जसको शरीर भित्र अहिले पनि बौद्ध रगत र संस्कार बगिरहेको छ। त्यसैले पनि हिन्दु गुरुहरु र अनुयायी हरु बुद्ध र बौद्ध धर्मको घुमाई फिराई भए पनि बयान गर्न बाध्य नै हुन्छ्न।
म चुनौती दिन सक्छु कि यदि हिन्दु हरुले बुद्ध र बौद्ध धर्म लाई अंगालो नहालिकन, त्यो पनि बिना तीखो नंग्राले नकोपरिकन, केबल आफ्नो मात्र सिद्धान्त को भर मा, हिन्दु धर्म र परम्परा जोगाउन सकिन्छ भन्ने लाग्छ भने कृपया अब देखि बुद्ध लाई "बिष्णु को अवतार हो " भन्न छोडिदिनुस , बुद्ध लाई बिष्णु रुपमा पुजा भक्ती गर्न छोडिदिनुस, बौद्ध धर्म र हिन्दु धर्म एउटै ओमकार सनातन परिवार भित्र हो भन्न छोडिदिनुस , बौद्ध र हिन्दु को लक्ष्य एकै हो , मार्ग मात्र फरक हो भन्न छोडिदिनुस।
वस त्यति गरे पुग्छ ।
भवतु सब्ब मंगलम !
゚
