22/03/2015
धमाधम बन्दैछ चन्द्रागिरीमा केवलकार, २०७२ को दशैँअघि सञ्चालनमा ल्याइने
----------------------------------------------------------------------------------
८ चैत, काठमाडौं । शहरबाट नजिकै घुम्ने र मनोरञ्जन लिने उपयुक्त गन्तव्यको अभाव खेपिरहेका लाखौं राजधानीबासीले छिट्टै मनोरञ्जनको नयाँ गन्तब्य पाउनेछन् । मुख्य शहरबाट केही किलोमिटरको दुरीमा रहेको थानकोटबाट केवलकार चढेर चन्द्रागिरी पुगी आनन्द लिन अब केही महिनामात्र कुरे पुग्छ ।
दशैंसम्म सञ्चालनमा ल्याइसक्ने लक्ष्य राखिएको केवलकार निर्माण अहिले ६५ प्रतिशत सम्पन्न भइसकेको छ ।
चन्द्रागिरी डाँडालाई थानकोटबाट केवलकार मार्फत जोडेर मुलुककै नुमना पार्कका रुपमा विकास गर्न लागिएको छ । गोदामचौरबाट चन्द्रगिरीसम्म केवलकारको दुरी साढे दुई किलोमिटर रहनेछ । जहाँ केवलकारबाट ८ मिनेटमै पुगिन्छ ।
काठमाडौं फनपार्क प्रालिले चन्द्रागिरी डाँडाको ७ सय २० रोपनी जग्गा ४० वर्षका लागि सरकारसँग भाडामा लिएर मेगा परियोजना निर्माण गर्न लागेको हो । केबलकारको बटम स्टेशन गोदामचौरमा भने ५५ करोड रुपैयाँमा सय रोपनी जग्गा खरिद गरिएको छ ।
जहाँ बच्चादेखि बुढाबुढीसम्म रमाउन मिल्ने थिम (मनोरञ्जन) पार्क, सपिङ सेन्टर, रेष्टुरेन्ट, बोटानिकल गार्डेन, फोरडी थियटर, भ्यू टावर, पाँचतारे स्तरको लक्जरी होटल, जीप फ्लायर, गल्फ कार्ट लगायतका सविधाहरु उपलब्ध हुनेछन् ।
केवलकार सहित पुरै परियोजना सम्पन्न हुँदा साढे तीन अर्ब रुपैयाँ लगानी हुने परियोजनाका प्रबन्धक दिलिप श्रेष्ठले जानकारी दिए । राजधानीबासी लगायत विदेशी पर्यटकलाई चन्द्रागिरी प्रमुख गन्तव्य बन्ने उनको विश्वास छ ।
अहिले बटम स्टेशन र टप स्टेशनमा केवलकारको भवन तथा टावरहरु निर्माण कार्य तिब्र गतिमा भइरहेको छ । सँगसँगै डाँडामा इच्छेश्वर महादेवको मन्दिर र दृश्यावलकोनका लागि भ्यू टावर पनि निर्माण भइरहेको छ ।
‘गोदाम चौरमा भवन निर्माण ९० प्रतिशत सकियो, चन्द्रागिरी भवनको काम ५० प्रतिशत सकिएको छ’ प्रबन्धक श्रेष्ठले भने- ‘सँगसँगै केवलकारका टावरहरुको निर्माण कार्य पनि भइरहेको छ ।’
थानकोटदेखि चन्द्रागिरीसम्म ११ वटा टावर (पोल) निर्माण गरिने छ । टावरको फाउन्डेसन निर्माण कार्य करिव ७० प्रतिशत सकिएको इञ्जिनियर हरिदेव तामाङले बताए ।
राजधानीवासीलाई चन्द्रागिरीसम्म पुर्याउन ३८ वटा केवलकार तैनाथ हुनेछन् । एउटा कारमा ८ जनाले यात्रा गर्न सक्ने प्रबन्धक श्रेष्ठले बताए । केवलकारबाट प्रतिघण्टा एक हजार जनासम्म बोक्ने गरी पूर्वाधार निर्माण भइरहेको छ ।
केबलकारका सामाग्रीहरु अष्ट्रिया र सिंगापुरबाट निर्माणस्थलमा ल्याइसकिएको छ । भवन निर्माण सकिने वित्तिकै इक्वीपमेन्टहरु जडान सुरु गरिहाल्ने प्रबन्धक श्रेष्ठले बताए ।
केवलकार यही बैशाखसम्म सञ्चालनमा आइसक्नुपर्ने भएपनि बाटो निर्माण गर्नुपर्दा निर्माणमा ढिलाई हुन पुगेको कन्सल्ट्यान्ट रिसव भण्डारीले बताए । उनका अनुसार चित्लाङ भञ्ज्याङदेखि डाँडासम्म करिव ३.२ किलोमिटर बाटो आफै खनिएको हो ।
यस परियोजनामा आइएमई समूह र भाटभटेनीका संचालक मिनबहादुर गुरुङको संयुक्त लगानी रहेको छ ।
थप पढ्न यो लिंकमा जानुहोस् ।
- See more at: http://www.onlinekhabar.com/2015/03/255725/ .XsqihQD3.dpuf
