31/07/2026
मितिः २०८३/०४/१५
प्रेस विज्ञप्ति
सुनसरी घटनाप्रति मर्यादित महिनावारी अभियान नेपालको अपिल गम्भीर तथा ध्यानाकर्षण
पछिल्लो समय देशका विभिन्न स्थानमा धार्मिक आस्था, सामाजिक तथा सांस्कृतिक विषयलाई लिएर विवाद, विरोध, तनाव तथा सामाजिक सद्भावमा खलल पुग्ने घटनाहरू सार्वजनिक भइरहेका छन्। यही क्रममा २०८३ साल साउन १० गते सुनसरी जिल्लाको देवानगञ्ज गाउँपालिकामा धार्मिक आस्था तथा सामाजिक विषयसँग सम्बन्धित विवादका क्रममा भएको दुःखद घटनाप्रति मर्यादित महिनावारी अभियान नेपाल गम्भीर दुःख, चिन्ता र चासो व्यक्त गर्दछ। उक्त घटनामा घाइते हुनुभएका सम्पूर्ण व्यक्तिहरूको शीघ्र स्वास्थ्यलाभको कामना गर्दै प्रभावित परिवारजनप्रति हार्दिक सहानुभूति व्यक्त गर्दछौं।
नेपालको संविधानले प्रत्येक नागरिकलाई आफ्नो धर्म, आस्था तथा विश्वास स्वतन्त्र रूपमा अवलम्बन, अभ्यास र संरक्षण गर्ने मौलिक हक सुनिश्चित गरेको छ। साथै, नेपालको बहुधार्मिक, बहुभाषिक, बहुसांस्कृतिक र विविधतायुक्त समाजमा एकअर्काको धार्मिक तथा सांस्कृतिक पहिचान, विश्वास र अधिकारको सम्मान गर्दै सामाजिक सद्भाव, सहिष्णुता र सहअस्तित्व कायम गर्नु हामी सबैको साझा दायित्व हो।
मर्यादित महिनावारी अभियान नेपाल हिंसा, विभेद, बहिष्करण, घृणा, अपमान तथा कुनै पनि प्रकारको अमानवीय व्यवहारको विरोध गर्दै सम्मान, समानता, मर्यादा, मानव अधिकार, सामाजिक न्याय र शान्तिपूर्ण सहअस्तित्वको पक्षमा निरन्तर प्रतिबद्ध रहँदै आएको छ। कुनै पनि धार्मिक, सामाजिक वा सांस्कृतिक विषयमा उत्पन्न विवादको समाधान हिंसा, उत्तेजना वा द्वन्द्वबाट नभई संवाद, सहमति, सहिष्णुता, संवैधानिक मूल्य–मान्यता तथा विधिको शासनमार्फत गरिनुपर्छ भन्ने हाम्रो स्पष्ट धारणा छ।
यस दुःखद घटनाको सन्दर्भमा मर्यादित महिनावारी अभियान नेपाल सम्पूर्ण राजनीतिक दल, धार्मिक तथा सामुदायिक नेतृत्व, नागरिक समाज, सञ्चारमाध्यम, युवा तथा आम नागरिकसमक्ष शान्ति, संयमता, सामाजिक सद्भाव र आपसी एकता कायम राख्न हार्दिक अपिल गर्दछ। कुनै पनि समुदाय, धर्म वा समूहप्रति घृणा, द्वेष, उत्तेजना वा सामाजिक विभाजन बढाउने अभिव्यक्ति तथा गतिविधिबाट टाढा रहँदै जिम्मेवार भूमिका निर्वाह गर्न हामी सबैमा अनुरोध गर्दछौं।
नेपालको शक्ति नै यसको विविधता, सहिष्णुता र सामाजिक एकता हो।त्यसैले कुनै पनि घटनालाई आधार बनाएर समुदायबीच अविश्वास, विभाजन वा द्वन्द्व सिर्जना हुन नदिन राज्यका सम्बन्धित निकाय, राजनीतिक नेतृत्व, धार्मिक तथा सामुदायिक अगुवा र नागरिक समाजले समन्वयात्मक तथा जिम्मेवार भूमिका निर्वाह गर्न आवश्यक छ। यस्ता घटनाको पुनरावृत्ति हुन नदिन दीर्घकालीन रूपमा सामाजिक संवाद, सहिष्णुता, मानव अधिकार शिक्षा तथा शान्ति र सद्भाव प्रवर्द्धनका कार्यक्रमलाई प्राथमिकता दिनसमेत अभियान नेपाल सम्बन्धित सबै पक्षलाई आग्रह गर्दछ।
साथै, मर्यादित महिनावारी अभियान नेपाल नेपाल सरकार तथा सम्बन्धित निकायको गम्भीर ध्यानाकर्षण गराउँदै घटनाको निष्पक्ष, स्वतन्त्र तथा पारदर्शी अनुसन्धान गरी सत्यतथ्य सार्वजनिक गर्न, दोषी देखिएका व्यक्तिहरूमाथि प्रचलित कानुनबमोजिम आवश्यक कारबाही गर्न तथा पीडित र प्रभावित परिवारलाई आवश्यक स्वास्थ्य उपचार, राहत, क्षतिपूर्ति र मनोसामाजिक सहयोगको उचित व्यवस्था गर्न आग्रह गर्दछ।
मर्यादित महिनावारी अभियान नेपाल शान्ति, सामाजिक सद्भाव, मानव अधिकार, समानता, सामाजिक न्याय, विभेदमुक्त समाज तथा लोकतान्त्रिक मूल्य–मान्यताको संरक्षण र प्रवर्द्धनप्रति आफ्नो प्रतिबद्धता पुनः व्यक्त गर्दछ। विविधतामा एकता, पारस्परिक सम्मान र सहअस्तित्वको संस्कृतिलाई थप सुदृढ गर्दै सभ्य, समतामूलक र मर्यादित समाज निर्माणका लागि सबै पक्षबीच सहकार्य आवश्यक रहेकोमा अभियान जोड दिन चाहन्छ।
मर्यादित महिनावारी अभियान नेपाल
राष्ट्रिय सचिवालय
नेपाल
