18/06/2026
अनुसन्धान परियोजना प्रस्ताव लेखन र गुणात्मक तथ्याङ्क विश्लेषण तालिम सम्पन्न
राष्ट्रिय पशु विज्ञान अनुसन्धान प्रतिष्ठान, खुमलटारको आयोजनामा “Proposal Development Training” र आयोजनामा “Qualitative Data Analysis Training” सम्पन्न भएको छ l अनुसन्धान प्रस्ताव लेखन, प्रतिस्पर्धी अनुसन्धान परियोजना विकास तथा गुणस्तरीय अनुसन्धान व्यवस्थापन क्षमताको अभिवृद्धि गर्ने उद्देश्यले आयोजित पशुपन्छी तथा मत्स्य अनुसन्धानका निर्देशक डा. नीना अमात्य गोर्खालीको प्रमुख आतिथ्यतामा शुभारम्भ भएको थियो l
कार्यक्रममा राष्ट्रिय पशु विज्ञान अनुसन्धान प्रतिष्ठानका निर्देशक श्री पूर्ण भद्र चापागाईंको अध्यक्षता रहेको थियो भने पशु प्रजनन तथा आनुवंशिकी विज्ञ डा. श्रीराम न्यौपाने विशेष अतिथिका रूपमा उपस्थित हुनुहुन्थ्यो। कार्यक्रममा राष्ट्रिय पशु विज्ञान अनुसन्धान प्रतिष्ठान (NASRI) अन्तर्गत केन्द्रका प्रमुख, राष्ट्रिय अनुसन्धान कार्यक्रम संयोजक, योजना तथा अनुगमन–मूल्याङ्कन महाशाखाका प्रतिनिधि, वरिष्ठ वैज्ञानिक, वैज्ञानिक, प्राविधिक तथा प्रशासनिक कर्मचारीहरूको सहभागिता रहेको थियो।
विशेष अतिथि डा. श्रीराम न्यौपानेले अनुसन्धानको सफलता प्रभावकारी प्रस्ताव विकासबाट नै सुरु हुने उल्लेख गर्दै अनुसन्धान समस्या पहिचान, उद्देश्य निर्धारण, कार्यविधि छनोट तथा बजेट निर्माणका पक्षमा विशेष ध्यान दिनुपर्ने बताउनुभयो।
प्रमुख अतिथि डा. नीना अमात्य गोर्खालीले अनुसन्धान संस्थाहरूको क्षमता अभिवृद्धिका लागि यस्ता तालिमहरू अत्यन्त उपयोगी रहेको उल्लेख गर्दै वैज्ञानिकहरूले राष्ट्रिय कृषि तथा पशुपन्छी क्षेत्रका समस्याको समाधानमुखी अनुसन्धान प्रस्ताव तयार गर्नुपर्नेमा जोड दिनुभयो। उहाँले अनुसन्धानको गुणस्तर, स्रोत परिचालन तथा अन्तर्राष्ट्रिय सहकार्य विस्तारमा प्रस्ताव विकास सीपले महत्वपूर्ण भूमिका खेल्ने विश्वास व्यक्त गर्नुभयो।तालिममा वरिष्ठ पशु प्रजनन तथा आनुवंशिकी विज्ञ डा. श्रीराम न्यौपाने र नेपाल कृषि अनुसन्धान परिषद्का वैज्ञानिक डा.विवेक सापकोटाले प्रशिक्षण गर्नु भएको थियो l कार्यक्रममा पशु पन्छी तथा मत्स्य अनुसन्धानमा कार्यरत २३ जना पुरुष र ४ जना महिला अनुसन्धानकर्ताहरु सहभागीहरु थिए l -
मन्तव्यका क्रममा कार्यक्रमका सभापति तथा राष्ट्रिय पशु विज्ञान अनुसन्धान प्रतिष्ठानका निर्देशक श्री पूर्ण भद्र चापागाईंले अनुसन्धानलाई थप प्रभावकारी, परिणाममुखी तथा अन्तर्राष्ट्रिय स्तरको बनाउन प्रस्ताव विकास सम्बन्धी ज्ञान र सीप आवश्यक रहेको बताउनुभयो। उहाँले तालिमबाट सहभागीहरूले व्यवहारिक ज्ञान हासिल गरी आगामी अनुसन्धान गतिविधिमा उपयोग गर्ने अपेक्षा व्यक्त गर्नुभयो।
तालिम अवधिभर गुणात्मक अनुसन्धानका आधारभूत अवधारणा, अनुसन्धान दर्शन (Research Paradigms), Ethnography, Case Study, Phenomenology, Narrative Inquiry, Grounded Theory, Discourse Analysis, Action Research, गुणात्मक तथ्य सङ्कलन विधि, कोडिङ, विषयवस्तु (Thematic) विश्लेषण तथा गुणात्मक अनुसन्धान प्रतिवेदन लेखन सम्बन्धी विषयमा विशेषज्ञहरूद्वारा प्रशिक्षण प्रदान गरिएको थियो l कार्यक्रमको समापान मिति २०८३ /०३ /३ गते राष्ट्री पशु आहारा अनुसन्धान केन्द्रका प्रमुख डा.लुमानिधि पाण्डेको विशेष आतिथ्यतामा भएको थियो l आफ्नो मन्तव्य राख्ने क्रममा डा. पाण्डेले अनुसन्धानमा संख्यात्मक तथ्याङ्कसँगै गुणात्मक तथ्याङ्कको महत्व दिनप्रतिदिन बढ्दै गएको उल्लेख गर्नुभयो। उहाँले किसान, पशुपालक, उपभोक्ता तथा अन्य सरोकारवालाहरूका अनुभव, धारणा, व्यवहार र सामाजिक पक्षहरूको गहिरो अध्ययन गर्न गुणात्मक अनुसन्धान अपरिहार्य रहेको बताउनुभयो। साथै, तथ्यमा आधारित नीति निर्माण तथा अनुसन्धानका नतिजाहरूको प्रभावकारी व्याख्याका लागि गुणात्मक तथ्याङ्क विश्लेषणको ज्ञान आवश्यक रहेको धारणा व्यक्त गर्नुभयो।
प्रशिक्षकहरुको तर्फवाट डा. विवेक सापकोटाले तालिममा पुर्वज्ञानको स्तर र तालिम पछिको ज्ञानको स्तरको मूल्यांकन प्रस्तुत गर्नुभएको थियो l तालिममा सहभागीको तर्फवाट डा.उद्दव पनेरुले सिकाइ अनुभव सुनाउनुभएको थियो l अनुसन्धान परियोजना प्रस्ताव लेखन तालिम गुणात्मक तथ्याङ्क विश्लेषण तालिम सम्पन्न
