15/02/2026
नेपालका वरिष्ठ राजनीतिज्ञ, राष्ट्रप्रेमी व्यक्तित्व तथा नेपाली राजनीतिक इतिहासका महत्वपूर्ण अध्यायको एक जीवित साक्षीको रुपमा रहनु भएका पुर्व मन्त्री विश्वबन्धु थापाको ९८ वर्षको उमेरमा भएको निधनले राष्ट्रलाई अपूरणीय क्षति पुगेको छ। पञ्चायत व्यवस्थाको अवधारणा निर्माणदेखि राष्ट्रिय पञ्चायतको नेतृत्वसम्म उहाँले नेपालको राज्य व्यवस्था, नीति निर्माण तथा राष्ट्रिय मार्गदर्शनमा दीर्घकालसम्म महत्वपूर्ण भूमिका निर्वाह गर्नुभयो। अनुशासन, दूरदर्शिता र राष्ट्रप्रतिको अटल समर्पणका कारण उहाँ नेपाली राजनीतिका अनुभवी तथा सम्मानित व्यक्तित्वका रूपमा सधैं सम्झनुहुनेछ।
राजनीतिक जीवनसँगै उहाँ सामाजिक तथा संस्थागत क्षेत्रमा पनि सक्रिय रहनुभयो। बगाले थापा क्षेत्री राष्ट्रिय फाउण्डेशन, नेपालसँग अति वरिष्ठ सदस्यको रुपमा आवद्ध रही कुलदीपको भूमिकामा उहाँले संस्था, परिवार, समाज तथा राष्ट्रिय पहिचान संरक्षण तथा राष्ट्रिय हितमा अमूल्य योगदान पुर्याउनुभएको थियो । उहाँको मार्गदर्शन र अनुभव फाउन्डेशनका लागि सदैव प्रेरणाको स्रोत रहिरहनेछ।
बगाले थापा क्षेत्री राष्ट्रिय फाउण्डेशन,नेपालको तर्फबाट हामी उहाँको निवास तथा पशुपति आर्यघाटमा पुगेर अन्तिम श्रद्धाञ्जली अर्पण गरेका थियौं। सो अवसरमा राष्ट्रको सम्मानस्वरूप नेपाली राष्ट्रिय झण्डा ओढाई अन्तिम बिदाइ गरियो भने नेपाली सेनाद्वारा श्रद्धाञ्जली सलामी समेत प्रदान गरिएको थियो, जसले उहाँको राष्ट्रप्रतिको योगदानप्रति उच्च सम्मान प्रकट गरेको थियो।
स्वर्गीय विश्व बन्धु थापाको जीवन राष्ट्रसेवा, जिम्मेवारी र नेतृत्वको प्रेरणादायी उदाहरणका रूपमा सदैव स्मरणीय रहनेछ। सम्पूर्ण बगाले थापा फाउण्डेशन परिवारको तर्फबाट उहाँप्रति भावपूर्ण श्रद्धाञ्जली अर्पण गर्दै शोकसन्तप्त परिवारजन तथा आफन्तप्रति हार्दिक समवेदना व्यक्त गर्दछौं। 🙏🇳🇵
डा. राम थापा क्षेत्री
अध्यक्ष
तथा
केन्द्रिय कार्यकारी समिति
बगाले थापा क्षेत्री राष्ट्रिय फाउण्डेशन, नेपाल
