24/04/2026
प्रेस विज्ञप्ति
नेपालका उद्योगी तथा व्यवसायीहरूलाई अनुसन्धानको नाममा अनावश्यक रूपमा हिरासतमा राख्ने, मानसिक दबाब दिने तथा सामाजिक प्रतिष्ठामा आघात पुर्याउने कार्यप्रति हाम्रो गम्भीर ध्यानाकर्षण भएको छ।
उद्योगी–व्यवसायीहरू राष्ट्रको अर्थतन्त्रका मेरुदण्ड हुन्। उनीहरूले राज्यलाई नियमित रूपमा कर तिर्ने, रोजगारी सिर्जना गर्ने तथा आर्थिक गतिविधिलाई चलायमान बनाउने महत्वपूर्ण भूमिका निर्वाह गरिरहेका छन्। त्यसैले व्यवसायीहरूलाई राज्यले सम्मानित नागरिकका रूपमा व्यवहार गर्नु अत्यन्त आवश्यक छ।
कुनै पनि व्यवसायी अनुसन्धानपछि दोषी प्रमाणित भएमा प्रचलित कानुन अनुसार जरिवाना वा अन्य कारबाही गर्नु उपयुक्त हुन्छ। तर अनुसन्धानकै नाममा खाता रोक्का गर्ने, कारोबार अवरुद्ध गर्ने, लामो समयसम्म हिरासतमा राख्ने तथा मानसिक रूपमा हतोत्साहित गर्ने जस्ता कार्य कुनै पनि हिसाबले न्यायोचित हुन सक्दैनन्। यस्ता कदमहरूले व्यवसाय चौपट पार्नुका साथै देशको लगानी वातावरणमा नकारात्मक असर पार्दछन्।
व्यवसायीलाई अपराधीको दृष्टिले हेर्ने प्रवृत्ति अन्त्य हुनुपर्छ। राज्य र निजी क्षेत्रबीच सहकार्य र विश्वासको वातावरण निर्माण हुनुपर्छ, किनकि यी दुई पक्ष एक–अर्काका साझेदार हुन्, प्रतिपक्ष होइनन्। व्यवसायीहरूलाई निरुत्साहित गर्ने कार्यले अन्ततः राज्य नै आर्थिक रूपमा पछाडि पर्ने तथा नयाँ लगानी भित्रिन नसक्ने अवस्था सिर्जना हुन्छ।
आजको अवस्थामा उद्योगी–व्यवसायीहरूको आत्मसम्मान, हक–अधिकार र मर्यादाको रक्षा गर्नु अत्यन्त आवश्यक भएको छ। यो कुनै एक व्यक्तिको होइन, सम्पूर्ण निजी क्षेत्रको साझा समस्या हो। त्यसैले यस विषयमा सबै व्यवसायीहरू एकजुट भई आवाज उठाउनु र समाधानका लागि साझा पहल गर्नु अपरिहार्य छ।
अन्त्यमा, हामी नेपाल सरकारसमक्ष अनुसन्धान प्रक्रियालाई पारदर्शी, न्यायसंगत तथा व्यवसाय–मैत्री बनाउन, साथै उद्योगी–व्यवसायीहरूको सम्मान र अधिकारको पूर्ण सुनिश्चितता गर्न जोडदार माग गर्दछौं।
दुर्गा प्रसाद सुवेदी
निवर्तमान अध्यक्ष
नेपाल कुरियर सेवा संघ
