11/10/2023
खादा र ब्याच प्रयोगमा प्रतिबन्ध लगाउँन अपिल
आदारणिय नगरप्रमुख ज्यू,
Gopal Hamal
स्वतन्त्र रुपमा हाम्रो सुन्दरनगरी धनगढीको नगरप्रमुखमा तपाईं निर्वाचित भएर आइसकेपछि देखिने गरि भएका परिवर्तनहरुले आम धनगढीबासीलाई उत्साहित बनाएको छ तपाईंले सुरु गर्नुभएको वडा क्लिनिकबाट हजारौं धनगढीबासीले समयमा बिना शुल्क विशेषज्ञ चिकित्सक सेवा तथा औषधि पाएर आफ्नो दीर्घायू बढाएका छन् । मुख्य सडक विस्तार योजनाले मुर्त रुप लिदैं गर्दा धनगढीको मुहार फेरिनेमा कुनै शंका छैन । शिक्षामा यहाँले थाल्नुभएको स्कुल मर्जर तथा नमूना स्कुल निर्माण, आफ्नो पारिश्रमिकबाट गरिब विपन्न बालबालिकाका लागि शैक्षिक सामाग्रीको वितरण, निशुल्क एम्बुलेन्स, महाप्रस्थान यान लगायत कार्यक्रमले सबैको मन जितेको छ । धनगढीलाई सुन्दर र हराभरा बनाउँन यहाँले थाल्नुभएको हरियाली प्रवर्धन कार्यक्रम दीर्घकालिन महत्व बोकेको छ । उक्त कार्यक्रममा देखिएको जनसहभागिता छ ।
तपाईंले सुरु गर्नुभएको हरियाली प्रवर्धन कार्यक्रमलाई टेवा पुर्याउँदै सुन्दर स्वच्छ र हराभरा धनगढी निर्माण गर्ने हेतुले ग्रीन क्लिन धनगढीमार्फत पनि विभिन्न कार्यक्रमहरु गर्दै आएका छौं । हाल हामीले नियमित रुपमा आफ्नो वरपरको ५ सय मिटर क्षेत्रफल सरसफाईको अभियानलाई निरन्तरता दिएका छौं । उक्त अभियानको उदेश्य हरेक घर वा संघसंस्थाले आफ्नो वरपरको ५०० मिटर क्षेत्रफलमात्रै सरसफाई गरिदिने हो भने धनगढीलाई सफा शहर बनाउँन मद्दत पुर्याउँने हो । यस्तै धनगढीलाई प्लास्टिक मुक्त बनाउन हामीले विभिन्न जनचेतनामुलक अभियानहरु सञ्चालन गर्दै आएका छौं । विद्यार्थीहरुबाटै स्वच्छ सफा र प्लास्टिक मुक्त धनगढी बनाउँने अभियान अरुलाई पनि प्रेरित गर्न विभिन्न २० बढी स्कुलहरुमा ग्रीन भोलिन्टियरहरुको टिम निर्माण गर्दै पर्यावरण संरक्षणमा टेवा पुर्याइरहेका छौं ।
यसै सन्दर्भमा पछिल्लो समय धनगढीमा अतिथी सत्कार, सभा, सम्मेलन, गोष्ठी लगायत साना ठूला कार्यक्रमहरुमा खादा तथा ब्याचको प्रयोग अत्याधिक हुन थालेको छ । जसले एकातिर यस क्षेत्रको ठूलो पुँजी बाहिर गईरहेको छ भने अर्कातिर खादा र ब्याचको अत्याधिक प्रयोगले पर्यावरणमा समेत नकरात्मक असर पुऱ्याइरहेको छ । सोहीकारण धनगढीनगर क्षेत्रभित्र खादा प्रयोगमा प्रतिबन्ध लगाईदिन हुन हामी आम धनगढीबासीका तर्फबाट यहाँलाई हार्दिक अपिल गर्न चाहान्छौं ।
तत्कालीन संस्कृति, पर्यटन तथा नागरिक उड्यन मन्त्रालयले २०७३ सालमै आफ्नो मातहतका कार्यालयमा खादा तथा व्याच प्रयोग नगर्न निर्देशन जारी गरेको थियो । खादाको प्रयोगले वातावरण प्रदुषित हुने र अनावश्यक बस्तुमा राज्यकोषबाट वार्षिक करोडौं रुपौया बाहिरिने भएकाले मन्त्रालयले आफु मातहतका विभाग, प्रतिष्ठान, प्राधिकरण, निगम लगायत निकायमा खादा प्रयोगमा प्रतिबन्ध लगाएको नजिरलाई आत्मसात गर्दै धनगढी उपनगरपालिकाले पनि आफ्ना मातहतका निकायमा खादा तथा प्रयोगमा प्रतिबन्ध लगाईदिन हार्दिक अनुरोध गर्दछौं । खादाको प्रयोगमा प्रतिबन्ध लगाउँदा यहाँका स्थानीय उत्पादनलाई बढावा पुग्ने हाम्रो विश्वास छ । खादा तथा ब्याचको स्थानमा सबैले स्थानीय रुपमा उत्पादन भएको फुलको प्रयोग गरिदिदा स्थानीय कृषकहरुलाई समेत टेवा पुग्ने भएकाले यथाशिघ्र चाँडो आयातित खादा तथा व्याचमा प्रतिबन्धको आह्वान गरिदिन हुन हार्दिक अपिल गर्दछौं ।
ग्रीन क्लिन धनगढी
