08/07/2026
दुग्ध विकास संस्थान (डिडिसी)ले दूधको गुणस्तर सुधार, किसानलाई समयमै भुक्तानी र दुग्धजन्य पदार्थको बिक्री वृद्धि गर्ने अभियानलाई तीव्र बनाएको जनाएको छ। संस्थानका अनुसार पछिल्ला महिनामा गुणस्तर व्यवस्थापनमा कडाइसँगै बिक्री र राजस्वमा समेत सकारात्मक सुधार देखिएको छ।
प्रधानमन्त्री तथा मन्त्रिपरिषद्को कार्यालयको निर्देशनपछि डिडिसीले कच्चा दूधको गुणस्तर परीक्षणलाई थप प्रभावकारी बनाएको छ। संकलन केन्द्र तथा चिस्यान केन्द्रमा ‘फ्याट’ र ‘एसएनएफ’ (Solid-Not-Fat) को मापदण्ड कडाइका साथ लागू गरिएको छ भने न्यून गुणस्तरका दूधका खेप परीक्षणपछि अस्वीकार वा नष्ट गर्ने व्यवस्था गरिएको छ।
संस्थानले मापदण्डविपरीत काम गर्ने कर्मचारीमाथि पनि कारबाही प्रक्रिया अघि बढाएको जनाएको छ। गुणस्तरमा लापरबाही गर्ने जिम्मेवार कर्मचारीलाई हटाउने तथा संकलन प्रक्रियामा पारदर्शिता कायम गर्ने नीति लागू गरिएको डिडिसीले जनाएको छ।
किसानको भुक्तानीतर्फ पनि सुधार भएको संस्थानको दाबी छ। महाप्रबन्धकका अनुसार पछिल्ला दुई महिनामा देशभरका दुग्ध सहकारीमार्फत किसानलाई करिब ४० करोड रुपैयाँ भुक्तानी गरिएको छ। आगामी भदौको पहिलो साताभित्र दूध बिक्री गरेको २५ दिनभित्रै भुक्तानी गर्ने प्रणाली लागू गर्ने लक्ष्य राखिएको छ।
डिडिसीका अनुसार दूध, दही, घ्यूलगायत दुग्धजन्य उत्पादनको बिक्री अघिल्लो अवधिको तुलनामा ५० प्रतिशतभन्दा बढी वृद्धि भएको छ। केही समय रोकिएको आइसक्रिम उत्पादन पुनः सञ्चालनमा ल्याइएको छ भने असार १५ लाई लक्षित गरी उत्पादन गरिएको दहीको बिक्री पनि उत्साहजनक रहेको जनाइएको छ।
संस्थानले अब अन्तर्राष्ट्रिय बजार विस्तारको तयारीसमेत थालेको छ। खाडी मुलुकहरूमा वार्षिक कम्तीमा ५० मेट्रिक टन घ्यू निर्यात गर्ने योजना अघि बढाइएको छ भने चीनमा घ्यू निर्यातका लागि आवश्यक प्रक्रिया पनि अगाडि बढाइएको डिडिसीले जनाएको छ।
डिडिसीले दूधको गुणस्तरमा सुधार, किसानलाई समयमै भुक्तानी र बजार विस्तारमार्फत संस्थानको विश्वसनीयता तथा राजस्व दुवै बढाउने लक्ष्य लिएको जनाएको छ। यससम्बन्धी विस्तृत विवरण आधिकारिक विज्ञप्ति र सरकारी निकायमार्फत सार्वजनिक गरिने संस्थानले जनाएको छ।
