न्ह्यखँ
ने.सं. १०८० ( वि.सं. २०१७ ) या असहज राजनैतिक परिस्थितिया उपज कथं नीस्वंगु साहित्यिक संस्था खःथ्व। नेपाःमिया मौलिक हक व अधिकार ,मानवाधिकार कुण्ठित यानाः राजनैतिक लागाय् जक मखु जातियता, भाषा व संस्कृति थेःज्यागु संवेदनशील लागाय् दमन तीव्र रुपं न्ह्याकेवं देय् दुने राजनैतिक व साहित्यिक गतिविधि प्रायः शुन्य अवस्थाय् ख्वपया जागृत व प्रगतिशील,चेतनशील छथ्वः ल्याय्म्ह पुचलं नेवाः भाषा व साहित्यया
माध्यमं जनतायात न्यंकेगु व विद्वानपिं पाखें देय्या गतिविधियात यथार्थ रुपं जनतायात थुइका बीगु राजनैतिक दलत पिब्वयेगु साहस याये मफुगु इलय् छगू संगठन यायेगु तातुनाः ख्वप लागा दुनेया थीथी संघ संस्था ब्वनाय् सहलह व्याःकथं ने.सं.१०८२ (वि.सं २०१९ ) या कौलाथ्व द्वादशी व त्रयोदशी निन्हुयंक नासमना त्वालय् संयुक्त विराट नेपालभाषा साहित्य सम्मेलन नां छुनाःपंचायती सरकारया निर्मम दमन वावजूद सफलतापूर्वक सम्मेलन याःगु । जनताया ग्वाहाली व अपार जनसहभागीता खनाःअभिप्रेरित जुयाः निरंकुश शासनया हाथ्याया रुपय् प्रस्तुत जुलसा थःगु मां भासं न्यनेगु व कनेगु मनसाय लुदंका बिउगुलिं हे थ्व सम्मेलन त्वामदयक जुयाः च्वंगु।
आजु
- नेपाल मडलया आदिबासी नेवाः जातिया थःगु मां भाय् नेपालभाषायात सम्मान व गौरवं छाय् पियगु ।
- नेपालभाषाया दथुलं जनपक्षीय साहित्य व संस्कृति ब्वलंकेगु ।
- देय् दुने फुक्क भाय् यात उत्थे खनेगु।
लुदनेबहगु ज्या
- कौलाथ्व (मोहनीया) द्वादशी व त्रयोदशी निन्हुयंक विराट नेपालभाषा साहित्य सम्मेलन थौं तक जुयावं च्वंगु।
- नेपालभाषा विषयस दकलय् अप्पो ल्याः कया एस.एल.सी. उत्तीर्ण ब्वनामी (विद्यार्थी) यात नेपालभाषा पदक लवल्हाना वयाच्वंगु।
- ह्याउँबाला गुथिया ख्वाःपौ दँय् दँसं प्रकाशन ।
- नेपालभाषा व नेवाः जातिया राजनीतिक अधिकार प्राप्तीया नितिं कुतः ।
- जातीय स्वशासन सहितया संघीय लोकतान्त्रिक राज्य पलिस्थाया निंतिं कुतः ।
- साहित्यिक सफू प्रकाशन।
- गुथिया बुखँ पौ कथं विराट पौ प्रकाशन।
- दछि यंक लायलामा रेडियो कार्यक्रम संचालन।
- नियमित साहित्य गोष्ठी।
- थीथी खलः पुचः नापं स्वापू।
- नेपालभाषा साहित्य, संस्कृति व वाङ्गमयया ख्यलय् योगदान याना दिपिन्त हना―पौ ।
विराट गुथिपाखें बिशेष हना
- नेवाः म्हसिका ज्वनाः सगरमाथाया सफल आरोही भाजु रामकृष्ण श्रेष्ठ
- सगरमाथाया सफल आरोही न्हापांम्ह नेवाःमिसा मयजु मोनी मुलेपतियात देछा ― पौ
- विराट गुथिया नीस्वना इलं निसें निरन्तर निःस्वार्थ सेवायाना दिम्ह भाजु रत्नगोपाल साँयजुयात देछा ― पौ लवल्हानागु
