11/04/2026
I går kveld vart våre mannskaper kalla ut til eit søk- og redningsoppdrag i området ved Bleskestadmoen, som i dag enda på beste vis - dei vart funne i god behold👏 Dei hadde gjort det rette og søkt ly på ei privat hytte då forholda tilsa dette. Eit område utan dekning. Og hadde gått vidare i dagslys og bedre vær. Det var då dei møtte Røde Kors mannskap.
Eit turfølgje på tre personar skulle gå frå Haukeliseter til Mostøl i Bråtveit, og då dei ikkje kom fram som planlagt, vart ein omfattande aksjon sett i gang🚨
Gjennom kvelden, natta og etter at det lysna i dag, har det blitt lagt ned ein stor innsats frå alle involverte ressursar! Aksjonen har vore krevjande, med terreng som varierer frå barmark til snødekte område og parti med skredfare. Tryggleiken til mannskapa har difor hatt høgaste prioritet heile vegen⚠️ Fagleiarar innan skred frå Suldal Røde Kors og Røldal Røde Kors Hjelpekorps var i innsats og Rogaland Røde Kors Skredgruppe underveis. Desse har bidrege tett i risikovurderingane for området dette var aktuelt - dette saman med innsatsleiarar, HRS og politiets operasjonssentral.
Samtidig har utfordrande dekning for naudnett og mobil gjort arbeidet meir komplisert. Dette har kravd bruk av satellittkommunikasjon og meir varsemd i innsatsen - spesielt under mørke forhold🌙
Det har vore ein brei og koordinert innsats! Mannskap har søkt til fots, på truger og ski i krevjande terreng. Drone har vore nytta når forholda har tillate det. Politihund har også vore med.
Lokalkjende har bidrege med uvurderleg lokalkunnskap, og har stilt opp med snøscooter og traktor. Dei åpna også heimen sin for etablering av kommandosental👏
Fleire scootrar og mannskap har vore i høgareliggande område. Redningshelikopter frå Sola deltok i søket i går kveld og natt🚁, medan redningshelikopter frå Florø var på veg i dag. Helitrans-helikopter med RECCO-søkjar vart i dag mobilisert og var på vei med erfarent person frå Sauda Røde Kors Hjelpekorps. I tillegg er området frå Haukeliseter til Holmavatn blitt sjekka av lokalkjende frå den sida.
Aksjonen har vore stødig leia av innsatsleiar frå politi og Karmøy Røde Kors Hjelpekorps frå Bleskestad, tett på hendinga heile vegen. FORF vakta og lokale krefter har også gitt fjernstøtte.
Her vil me sitere politiet: Me er svært takknemlig for at lokale stille hus til disposisjon for mannskapene. Det er helt avgjørende for god fremdrift i oppdraget og en vellykket gjennomføring.
Nok ein gong ser me kor avgjerande det gode samarbeidet mellom offentlege etatar og frivillige FORF ressursar er (Frivillige organisasjoners redningsfaglige forum)👏 Dette på tvers av kommune og fylkesgrenser! Når det verkeleg gjeld, stiller alle opp – med kompetanse, vilje og eit felles mål om å hjelpe😃
Ein stor takk til alle som har bidrege i innsatsen❤️
