18/11/2025
60 å for nynorske bøker
Heilt sidan laget vart starta i 1964 har Nord-Aurdal Mållag arrangert bokkveldar og marknadsført nynorske bøker. Måndag 17. november var det ny bokkveld i regi av mållaget med Norli Fagernes og Nord-Aurdal folkebibliotek. 50 bokinteresserte publikummarar fylte plassane i biblioteket på Fagernes. Hovudforfattar var Jørgen Norheim, som presenterte og las frå den ferske romanen Olga Bjoners plass, utgitt på Det Norske Samlaget. Ei lesbar og interessant bok frå forfattaren som i 2002 vart nominert til Nordisk Råds litteraturpris.
Inger Marie Vingdal presenterte boka Budeiene – døtrer av naturen. Ei innhaldsmessig svært gjennomarbeidd, nydeleg illustrert og interessant bok om budeielivet frå 1850 og fram til i dag. Vingdal er kjend som dosent i kroppsøving. Ho har tidlegare gitt ut bøker om idrett og kroppsøving på bokmål, men årets bok er på nynorsk.
Torodd Lybeck viste bilete og presenterte den nyskrivne boka Brøtningsdammane – kulturhistoriske monument i Drammensvassdraget. Dette er den andre boka til Lybeck, utgitt på Kvitvella Forlag, forlaget til Nord-Aurdal Mållag. Boka har vorte teken imot med stor interesse i skogsområda i Oppland og Buskerud, og Torodd har vorte invitert til ei rekke bokkveldar og arrangement for å fortelja og brøtning og tømmerfløyting.
I tillegg til desse var fleire lokale forfattarar frampå. Etnedølen Ingeborg Solbrekken presenterte boka Landssvik og profitt, Nils Rogn fortalde om Årbok for Valdres med utvandringa til Amerika som tema, og Solbjørg Urnes Johnson kom frå Sogn og presenterte artikkelsamlinga Men over oss er himmelen, skriven av hennar avdøde mann, Georg Espolin Johnson. Johnson var son til tidlegare Hamar-biskop Alex Johnson og prost i Valdres frå 1988–2009.
Aud Søyland presenterte to av dei tre bøkene utgitt på Kvitvella Forlag i år, Det var bøkene På Halling, der ho har vore redaktør, og vitseboka Kva er vitsen av Ingar Ranheim, som gjekk bort i fjor haust. Ho fortalde også om ei svært spesiell bok om samane, som ho har omsett frå gammal dansk til moderne norsk. Boka var skriven av presten Knut Leem i 1767 og har tittelen Knud Leems beskrivelse over Finnmarkens lapper og handlar om samane sitt liv, tru, talemål og levemåte på den tida. No er boka gitt ut på nytt av Alta historielag.
Bokkvelden i Nord-Aurdal er ein gammal tradisjon som starta då laget vart starta for vel 60 år sidan. Den gongen var tilskipingane i samarbeid med Leira bokhandel. Rundt år 2000 vart det innleidd samarbeid med biblioteket på Fagernes og Norli Fagernes, og frå 2011 vart det heile ført vidare under namnet «Bok i Valdres».
