29/12/2025
Oslo, Norway 27.12.2025
پاکستان پیپلزپارٹی ناروے کے زیر اہتمام محترمہ بینظیر بھٹو شہید کی 18 برسی کا انعقاد۔
(نمائندہ خاص ) ناروے کے دارالحکومت اوسلو میں پاکستان پیپلزپارٹی ناروے کے زیراھتمام محترمہ بینظیر بھٹو شہید کی 18برسی کی تقریب منعقد ھوئی ۔ تقریب کا آغاز معروف عالم دین مفتی زبیر تبسم نے تلاوت کلام پاک سے کیا۔ اس موقع پر اس سال کے دوران ناروے میں وفات پانے والے ضیاء آمریت میں جمہوری جدوجہد میں قیدوبند جھیلنے والے پارٹی کارکن محمد شفیع، سینیٹر رھنما میاں محمد اسلام کے جیالے بھائی محمد اکرام اور ناروے کی ھر دل عزیز اور کاروباری شخصیت اور پارٹی رھنما چوہدری جاوید اقبال آف دینہ چک کے لئے خصوصی دعا ئے مغفرت کی گئی.
تقریب کی صدارت پاکستان پیپلزپارٹی ناروے کے سینئر نائب صدر چوہدری اسمائیل سرور گجر نے کی جبکہ مہمان خصوصی سیئنر رھنما میاں محمد اسلام تھے۔
جنرل سیکرٹری علی اصغر شاھد نے حاضرین کو خوش آمدید کہا۔
تقریب سے خطاب کرتے ہوئے خالد اسحاق دھنیال نے کہا کہ محترمہ بینظیر بھٹو شہید نے ضیاء اور مشرف آمریت کا ڈٹ کر مقابلہ کیا۔ ذوالفقار علی بھٹو نے ایٹمی پروگرام اور محترمہ بینظیر بھٹو نے پاکستان کو میزائل ٹیکنالوجی دے کر ملک کے دفاع کو مضبوط کیا ۔
۔ ایوان صدر کے سابق پروٹوکول افسر کالم نگار شکیل اختر نے محترمہ بینظیر بھٹو شہید کے دور کی اپنی یادیں حاضرین سے شئیر کیں اور محترمہ بینظیر بھٹو شہید کو خراج عقیدت پیش کیا۔
نارویجن کنزرویٹو پارٹی کے راہنما اور اوسلو سٹی کونسل کے رکن طلعت محمود بٹ نے پاکستان کے موجودہ حالات کا تجزیہ کرتے ھوئے پاکستان کی تمام سیاسی پارٹیوں کی کارکردگی پر مایوسی کا اظہار کیا۔ انہوں نے کہا کہ شہید ذوالفقار علی بھٹو اور محترمہ بینظیر بھٹو ویثنری لیڈر تھے۔ ان کے جمہوری ویثرن پر چل کر ھی پاکستان آگے بڑھ سکتا ھے۔ انہوں نے اشعار کی صورت خراج عقیدت بھی پیش کیا۔
شاعر ادیب کالم نگار اور سماجی رھنما ڈاکٹر سید ندیم حسین نے اپنے خطاب میں کہا کہ میثاق جمہوریت کا ڈاکومنٹ محترمہ بینظیر بھٹو کے ویثرن کی ایک عملی مثال ھے۔ انہوں نے کہا کہ پاکستان کے موجودہ حالات میں ایک وسیع تر میثاق جمہوریت کی شدید ضرورت ھے۔
معروف دانشور کالم نگار متحدہ محاذ آزادی۔ این ایف ایس یورپ کے راہنما ارشد بٹ ایڈووکیٹ نے اجلاس سے خطاب کرتے ھوئے کہا کہ جہاں سیاست دان مایوس کر رھے ھیں وھاں اچھی باتیں بھی ھو رھی ھیں۔ 18 ترمیم اور این ایف سی ایوارڈ ختم کرنے والوں کے سامنے پیپلزپارٹی دیوار بنی ھوئی ھے۔ ارشد بٹ نے کہا کہ
مفاہمت کی پالیسی ھی تھی کہ محترمہ نصرت بھٹو نے بھٹو کے شدید مخالفوں کے ساتھ ھاتھ ملا کر ایم آر ڈی کی تحریک چلائی اور آمریت کی بنیادیں ھلا دیں تھیں .
پیپلزپارٹی ناروے کے انفارمیشن سیکرٹری راجہ عاشق حسین نے محترمہ بینظیر بھٹو شہید کو زبردست خراج عقیدت پیش کیا جئے بھٹو کے نعرے بھی لگائے اور پیر نصیر الدین نصیر مرحوم آف گولڑہ شریف کے وہ اشعار بھی سنائے جو انہوں نے محترمہ کی شہادت پر لکھے تھے۔
تقریب کے اختتام پر سئینر نائب صدر چوہدری اسمائیل سرور گجر نے اپنے خطاب میں کہا کہ مسلم دنیا میں محترمہ بینظیر بھٹو شہید پہلی خاتون وزیراعظم تھیں۔ انہوں نے کہاکہ پیپلزپارٹی کے ورکرز اور راہنماؤں نے جمہوریت کے لئے بےمثال قربانیاں دیں ہیں۔ صاحب صدر نے کہا کہ آج کی تقریب میں چوہدری جہانگیر نواز اور کچھ دوسرے دوستوں کی بیرون ملک ھونے پر کمی محسوس ہو رھی ھے ۔ اس موقع پر پیپلزپارٹی ناروے کے نائب صدر چوہدری محمد اشرف کا خصوصی طور پر شکریہ ادا کیاکہ جنہوں نے اپنے ریسٹورنٹ "پنجابی مصالہ" میں تقریب اور طعام کا خصوصی اہتمام اور تعاون کیا۔
دوسرے لوگوں کے علاوہ چوہدری قمر اقبال پسوال۔ چوہدری ظفر نواز حقیقہ محمد ریاض ۔ محمد رفیع اللہ ۔ چوہدری عجب خان ۔ طلعت محمود بٹ۔ ڈاکٹر سید ندیم حسین۔ ارشد بٹ میاں محمد اسلام راجہ عاشق حسین شکیل اختر خالد دھنیال نے تقریب میں شرکت کی۔
تقریب کی نظامت کے فرائض سیکرٹری جنرل علی اصغر شاھد نے ادا کئے۔
