09/03/2026
Påske på Herøy 2026!
I år vert det arrangert Påske på Herøy palmesøndag, og vi vil gjerne stille ut heimelaga modellbåtar for å vise fram ein historisk skatt, og kanskje inspirere nokon til å plukke opp att tradisjonen.
Alt startar ein plass, og fleire av dei som seinare starta reiarlag og la grunnlaget for fiskerinæringa i Herøy, byrja med leik i fjøra der dei tok etter det dei vaksne gjorde og sa.
Bileta av modellskutene de ser i denne posten er av båtar det vart leika med i Sævikane på Remøya. Dersom du som les dette har ei skute og lyst til å vise henne fram på Herøy gard palmesøndag, er du hjarteleg velkomen til å ta kontakt med underteikna, eller sende ei melding her på jektesida.
På biletet med tre båtar, som er frå eit intervju Sunnmørsposten hadde med modellbåtreiarane, ser vi frå venstre: Sjøgull, Grasøy og Urholm. Biletet er frå 1948, og båtane høyrde til Olav Sævik, Mass Sævik og Harald Sævik.
Fargebiletet syner Sjøgull slik han ser ut i dag, og denne vert utstilt under påske på Herøy. For at vi skal få til dette, treng vi 8–10 båtar å stille ut, så om du veit om nokon som har ein, eller har ein sjølv, så nøl ikkje med å ta kontakt!
Helsing Arve Voldsund
