15/09/2024
I mellomalderen var Bergen den viktigaste byen i Noreg, og fleire sentrale hendingar fann stad her. Blant anna var det i Bergen Magnus Lagabøte utarbeidde det som skulle bli den første landsdekkande lova i landet, ei lov som tredde i kraft i 1274. I år feirar vi at ho er 750 år 👑 📜
16.-19. september set forskarar frå ulike europeiske land lova under lupa, nettopp her i Bergen, på ein tverrfagleg konferanse i regi av Universitetet i Bergen og landslovjubileet i Vestland.
Vi har spurt fire bidragsytarar om kvifor konferansen er viktig – og kva dei gleder seg spesielt til desse dagane 💓
Eirik Hovden, forskar på arabiske-, Midtausten og islamske studiar, UiB:
– Landslova er ei viktig hending i vår historie, og har betyding fram til i dag. Konferansen er viktig fordi det gir oss ei moglegheit til å sjå på Landslova på nytt. Vårt forhold til historia endrar seg i takt med at vi endrar oss. Eg ser fram til å lære mykje nytt og å få nye idear - men kanskje spesielt til å lære meir om korleis Landslova og lovgivingsprosjektet er, samanlikna med liknande prosjekt rundt om i verda på om lag same tid.
Brage Thunestvedt Hatløy, postdoktor ved Det juridiske fakultet, UiB:
– I samband med jubileet har det vore mange gode konferansar. No som vi er godt inne i jubileumsåret, der mange har fått meir kunnskap om Landslova, vert det peika på Bergen i denne neste fasen. Konferansen er spesielt viktig for å vise fram fagmiljøa og forskinga som skjer her. Det er mykje å glede seg til, men eg ser spesielt fram til å delta i å trekke dei store linjene mot slutten av konferansen. Då byrjar ein gjerne å sjå samanhengar, og tenke på ting på ein ny måte
Helen F. Leslie-Jacobsen, assisterande professor i norrøn filologi, UiB:
– Konferansen er viktig for å synleggjere forsking i Bergen, samstundes som eg synest det globale perspektivet i konferansen er sentralt. Det kjem forskarar frå f.eks. både Spania, Island og Danmark. Eg gleder meg til å møte vener og kollegaer som kjem til Bergen, og ser spesielt fram til den oppsummerande delen mot slutten av konferansen, der vi trekker konklusjonar.
Alf Tore Hommedal, professor i mellomalderarkeologi:
– Konferansen set mellom anna fokus på fylgjene av at Landslova gjaldt heile riket og slik også var med på å «samle» Noreg organisatorisk sett. Lova og fylgjene av henne var viktige i statsdanninga. Haldningar som framleis formar samfunnet vårt vart skapte. Eg ser fram til å bli inspirert gjennom å lytte til og samtale med gamle og nye kollegaer.
Les meir om konferansen på: https://www.vestlandfylke.no/landslovjubileet/konferanse-fleirfaglege-perspektiv-pa-magnus-lagabotes-landslov/
På biletet står frå venstre: Brage Thunestvedt Hatløy, Alf Tore Hommedal, Eirik Hovden og Helen Leslie-Jacobsen (Foto: Helen Daae Frøyseth/Vestland fylkeskommune)
