19/01/2025
Debby gefeliciteerd! 🧡💛💚
Graasboerin Debby I
Leef Graasboere en Graasboerinne,
Wie greuëtsj bèn ich, om hie in ’t jubileumjaor 7x11 van de Graasbörgers, veur uch te stjoan ès Graasboerin Debby I.
De 20e Graasboerin van Zöstere en de 2e van Zònger Vrugvleisj!
Wie ich in mei ’t berichske van Hans op miene telefoon zoog bènnekomme, of hea mich bènnekort ens koos belle, sjloog mich ‘t hart waal efkes in de kael. Stiekum dach ich drèk ‘Baoh, dat liek mich sjiek’. Ich veulde mich ontzettend verieërd dat Hans en Menno mich in gedachte hoawe es nuuj Graasboerin van Zöstere. De luuj die mich gèt be**er kenne, zulle zich auch kènne veurstjelle dat mich metein ein geveul van onzekerheid bekroop. Kèn ich dat waal, durf ich dat waal, zitte de Graasboerre en -boerinne waal te wachte op ein maedje oet ’t Zawpense riek? En krieg ich dat gecombineerd mit alle taken veur mien gezin, dat veur mich altied op de ieërste plaats sjteit.
In de paar daag die volgde, begoos mien hertje sjteeds sjneller te kloppe en dach ich: ‘Jao ich goan dit doon!’ Toen Hans ein paar daag later belde en mich officieel vroog of ich Graasboerin wol waere, höb ich dan auch volmondig ‘Jao’ gezag!
’t Vasteloavend viere höb ich in Beeg gelieërd. Dat sjoane dörpke aan de Maas wo ich in 1978 geboare bèn. Es 4-joarig maedje sjtong ich al op de groate prinse wage. Same mit mien vriendje mochte veer ès kleuter-prinsepaar mit zien ouwers mit, die toen ’t groate Prinsepaar van Beeg woare.
De inmiddels verbaoje vasteloavend-traditie van ’t gawstrèkke in Beeg höb ich van kendjs af aan mit gekrege. Miene opa zörgde namelijk altied dat op vasteloavend-dènsdig de gaws in de loch hong op de Boulevard, om vervolgens de nak aafgetrokke te kriege door de nuuje gawze-keuning.
In de lètste klas van de laegere sjoal zoat ich in de jeugd road van 11. Tot mien groate verdreet woor ich gein jeugdprinses en höb ich hieël get treunkes gelaote. Mèr noe krieg ich de kans, mit dank aan Hans en Menno, om dat leid van toen gans in te gaon haole!
In 1996 lieërde ich Maurice kènne op ’t Patsjebal in Bor. De Beegse vastelaovend woor toen langzaam ingeruuld veur de vastelaovend in Zöstere. Vanaaf 2001, toen veer os zaate hermenieke Zònger Vrugvleisj höbbe opgerich, vier ich de vastelaovend in Zöstere. Stiekum bèn ich bès trots dat ich van de vrouwluuj oet os zaate hermenie, de enige bèn dae d’r al vanaaf ’t ieërste begin bie is.
Mit dit clubke höbbe veer al hieël get sjoan momente belaef. Zeker mit ut graasboerebal wiste veer d’r vaak ein sjiek fieëske van te make! Ich maak mich al ein bietje ongerus, wat geer mich dit jaor aan zult gaon doon…..
Os 4 kènjer, Floor, Max, Freek en Bram, höbbe vanaaf hun gebaorte de vastelaovend mit os mit gevierd. Wat ein gelök dat zie net zo gaer vastelaovend vieren es os. Afgelaupe jaore höbbe ze dan auch vaak gezag: Mam es se dich oajt vraoge om Graasboerin te weare, zèk dan estebleef jao! En dat moment is noe gekomme en sjtaon ich hie veur uch in mien Graasboerinne-kleid!
Euver mien kleid gesjpraoke….. Loes en Mandy, geer zult waal gèt dingskes herkènne.
Nelly haet mich hieël good geadviseerd en geprobeerd om d’r veur mich weer get eiges van te make. Ich ben super blie mit ’t resultaat!
Neave mien taak es mam van mien 4 sjatjes, wirk ich nog 3,5 daag in Zitterd bie de Fontys Hogeschool. Op ’t bedrijfsbureau van de Lerarenopleiding zörg ich dat alle ongersjteunende werkzaamheden waere oetgeveurd. In ’t bietje vrieje tied dat euverblif bön ich vaak op internet aan het rondjkieke, op zeuk noa leuke kleijer. Want kleijer kaupe (volges Maurice hiëel väöl kleijer) is mien groate hobby. Naeve dees hobby venj ich ’t leuk om sjoan plaetskes oet te zeuke om op vakantie te goan mit os gezin. Veer hauwte van kampere, mèr sjtedentripjes zeen de lètste joare auch erg in trèk.
En es veer op vakantie zeen, dan maak ik gaer foto’s van al die sjoan plaetskes die veer bezeuke. De luuj die mich op Facebook of Insta volgen höbbe die vas en zeker al dèks zeen langskomme.
Leef luuj, nao maonje van zwiege en vanalles regele is ’t vanaovend dan eindelik zoa wiet! Same mit miene prins Raoul I, motte veer nog ein waekske in sjpanning aafwachte wae os nuuj jeugdprinske of prinsesje geit waere. Ich verheug mich noe al, op alles wat nog komme geit!
Rès mich nog om aaf te sjloete mit mien motto:
AUWT OF JONGK, KRANK OF GEZONDJ, ALLES DEIT MIT.
KOM VIER DE ZÖSTERSE VASTELAOVEND RICHTIG MIT MICH MIT!
Zöstere, Alaaf! - Graasboere, Alaaf! - Zònger Vrugvleisj Alaaf!
