Universala Esperanto-Asocio

02/06/2026

UEA profunde bedaŭras la forpason de Probal Dasgupta (1953–2026) la 1-an de junio 2026, en la aĝo de 72 jaroj, en Kolkato, Barato.

Probal Dasgupta naskiĝis la 19-an de septembro 1953 en Kolkato, Barato. Lingvisto kaj leksika esploristo, li studis en la sanskrita kolegio de Kolkato, la dekana kolegio de Puneo kaj doktoriĝis ĉe la Universitato de Novjorko pri la genera sintakso de la bengala lingvo. Li instruis lingvistikon en pluraj barataj universitatoj.

Lerninte Esperanton en la aĝo de 14 jaroj kaj membriĝinte en Hinda Instituto de Esperanto kaj en UEA en la aĝo de 15 jaroj, li ekde 1967 estis aktiva esperantisto. En la aĝo de 17 jaroj li aktive korespondis kun Kolomano Kalocsay pri la tradukado de Tagore pri komplikaj gramatikaj problemoj. En 1977 li partoprenis la 62-an Universalan Kongreson de Esperanto (UK) en Rejkjaviko, kaj post ĝi li tri semajnojn volontulis en la Centra Oficejo (CO) de UEA. En 1980 li volontulis preskaŭ la tutan jaron en la CO. Li estis membro de la Akademio de Esperanto ekde 1983, ĝia vicprezidanto de 2001 ĝis 2016 kaj ĝia prezidanto ekde 2016 ĝis sia forpaso. Li helpinstruis en 1978 kun David Jordan en la sanfranciska somera kursaro, kiu estis la praformo de NASK, kaj en 1988 kun Marjorie Boulton en la barlastona somera kursaro. Li estis elektita Prezidanto de UEA en 2007 dum la UK en Jokohamo kaj reelektita por nova mandato en 2010 dum la UK en Havano.

Dum sia longa agado en la Esperanto-movado, li kontribuis kiel verkisto, tradukisto, kritikisto, redaktoro kaj organizanto.

En 2021 Dasgupta korespondis kun Noam Chomsky, klarigante al li, ke la intervjuo Aronoff-Chomsky estis misuzata por propagando kontraŭ Esperanto, kaj petis lin helpi.

Probal Dasgupta estis voĉo por lingva diverseco kaj unu el la grandaj intelektuloj de Esperantujo. Lia intelekta laboro kaj lia sindediĉo al Esperanto, lingvistiko kaj internacia interkompreniĝo lasas neforviŝeblan spuron en la historio de UEA.

UEA esprimas sian plej profundan kondolencon al liaj familianoj, amikoj kaj kunlaborantoj kaj invitas la tutan Esperanto-movadon memori kun dankemo lian vivon, lian verkaron kaj lian inspiran ekzemplon.

30/05/2026

Konkurso “Plej bona reganto de Esperanto” 2026: alvoko al kandidatiĝo 📢

Universala Esperanto-Asocio anoncas la konkurson “Plej bona reganto de Esperanto” 2026, kiu celas rekoni kaj instigi altan lingvan nivelon inter uzantoj de Esperanto laŭ la plej alta nivelo C2. ✨📚

La iniciato estas ligita al la unulingvaj Esperanto-ekzamenoj de UEA laŭ la Komuna Eŭropa Referenckadro (KER-ekzamenoj), realigataj de la KER-Ekzamena Centro de UEA kunlabore kun la retejo Edukado.net kaj la Akademio de Esperanto. 📖🤝

La konkurso estas malfermita al ĉiuj, sendepende de devenlando aŭ profesio. 🌎

UEA aparte alvokas ĉiujn Esperanto-organizaĵojn, landajn asociojn, instruistojn kaj aktivulojn vaste diskonigi la konkurs-alvokon por ke ĝi atingu kiel eble plej multajn talentajn kandidatojn tra la mondo. 📣🌐

Donacoj por subteni eventuale nepagipovajn kandidatojn aŭ la ĝeneralan laboron de la KER-ekzamenoj bonvenas al la Konto Eduko de UEA: https://uea.org/alighoj/donacoj/eduko. 💛

Pliaj informoj pri la konkurso kaj la kandidatiĝa procedo troviĝas ĉe: uea.org/gk/1298a1 🔗

30/05/2026

Kadre de la junulara programo de la UK okazos tradicia futbala matĉo. ⚽ Ĉi-foje ĝi estos en ludejo en la urbocentro, kontraŭ loka teamo, kaj eĉ kun esperantista arbitracianto!

Sed por futbala matĉo bezonatas ludantoj kaj trejnisto por prepari la teamon. Ĉu vi ŝatus ludi en la teamo, aŭ trejni ĝin? Skribu al Marta, la organizantino de la junulara programo, ĉe [email protected].

27/05/2026

25/05/2026

La Estraro de Universala Esperanto-Asocio (UEA) kun ĝojo anoncas, ke la 113-a Universala Kongreso de Esperanto (UK) okazos en Kaŭno (Kaunas), Litovio, en la jaro 2028.

Post Melburno/Narrm en 2027 la UK revenos al Eŭropo – kaj same revenos al Litovio kaj al Baltio post la 90-a UK en Vilno en 2005.

Okazonte la unuan fojon en Kaŭno, la 113-a UK gastiĝos en la dua plej granda urbo de Litovio kaj unu el la plej gravaj kulturaj centroj de Baltio: situanta ĉe la kunfluejo de la riveroj Nemunas kaj Neris.

Litova Esperanto-Asocio (LEA) dum jardekoj aktive kontribuas al internacia Esperanto-agado, organizado de eventoj kaj kultura kunlaboro. Pro tio UEA kun entuziasmo akceptis la inviton de LEA kongresi en Kaŭno en 2028.

UEA kore dankas al LEA kaj al ĉiuj lokaj organizantoj kaj partneroj, kiuj jam vigle laboras por prepari sukcesan kaj memorindan UK-on en Kaŭno.

🔗Por aliĝi al la 111-a UK kaj profiti de la lasta kun rabato aliĝperiodo (ĝis la 30-a de junio 2026) aliru https://uk.esperanto.net.

Pliaj detaloj troviĝas ĉe uea.org/gk/1301a1

21/05/2026

🏡Kandidatiĝoj re-malfermitaj: iĝu landa organizanto ĉe Pasporta Servo!

Pasporta Servo, la tutmonda reto de esperantistaj gastigantoj, denove aperos en libreta formo en 2026 — kaj ni bezonas vian helpon por teni ĝin aktuala kaj utila por ĉiuj!

🔎TEJO kaj UEA serĉas volontulojn por kunordigi la gastigantojn en diversaj landoj.

Kiel landa organizanto vi:
• kontrolos kaj ĝisdatigos la informojn de gastigantoj en via lando;
• kontaktos gastigantojn por certigi la ĝustecon de datumoj;
• helpos konservi Pasportan Servon fidinda kaj vivanta reto por la tuta komunumo.
La laboro estas tute volontula kaj fleksebla laŭ via disponeblo.

📅 Kandidatiĝoj estas malfermitaj ĝis la 31-a de majo!

📩 Kandidatiĝu aŭ demandu pli ĉe: [email protected]

Pli da informo estas en nia retejo. La ligilo estas en la komentoj.