30/01/2026
Gelaender Kènjeroptoch - Zaoterdig 7 fibberwari 13:11 - Centrum
De “Doog Mit Gaef Door” Kènjeroptoch trèk op Zaoterdigmiddig 7 fibberwari vanaaf 13:11 door ‘t Gelaense Centrum.
Aafgeloupe oktober maakte veer bekènd dat v’r d’rveur gekaoze höbbe om de Kènjeroptoch veurtaan oppe Zaoterdig ein waek veur de Vastelaovend te organiseere.
Nao intensieve aafsjtömming mit de anger vereniginge bènne de Vief, zeen veer bliej uch mit te deile, dat onger meë door ‘t vervreuge van de sjtarttied nao 13:11, dit jaor 4 van “De Vief” vereniginge mit zulle trekke en vanaaf volgend jaor alle Vief dit weer kènne inpasse in hun program. Nogmaals dank names de Optochkemissie aan de besjture en vief raode van Ellef van de Vereniginge. 👏
Dus kóm op zoaterdigmiddig 7 fibberwari vanaaf 13:11 gezellig nao ‘t centrum om de Gelaense jeugprinse, jeugprinsessen, jeugraode en optochdeilnömmers te bewonjere in eine gezellige en kleurrieke kenjeroptoch. Of sjrief uch in, en doot zelf mit. ☺️❤️💛💚
De Kènjeroptoch is natuurlik neet allein mer op de jeug gerich mer ouch op jederein dae dat sjoane vastelaovesgeveul aan ein volgende generasie of aan nuuj inwoners van de Waereldsjtad wilt doorgaeve.
Dit jaor sjteit de Kènjeroptoch in ‘t teike van ós motto “Gelaen, dao zit meziek in !”. Loup dus, es einzelgänger, duo, kleine of groate groep mit en laot zeen wie en aan wae se de vastelaovend doorgeufs mit meziek, loup mit mit eine rammellesjang, panne en potte, of get angesj vanoet dees gedachte same mit ós jeug.
Opa, oma mit de kleinkènjer, nonk of tant, meister en juffrouw mit de klas, diene sjport trainer of coach mit uch team, dansgroep, awd prins of awd adjudant, diene buurman of sjtraotgenoot.
D’r is oetgebreijde ruimte veur leuke kreatieve ideeje die zónger al te väöl veurbereidinge op ‘t letste momènt nog ineingesjteveld kènne waere, wobie ’t thema op versjillende manere kènt waere oetgebeeld en alles wat geluid en meziek maak welkom is.
Insjrieve (en meë info euver de route) kènt via www.flaarisse.nl/kenjeroptoch of oppe daag zelf vanaaf 12:00 oer (locatie insjrieve wurt woonsdigaovend 4 februari gedeild).
