NRNA NCC Netherlands

29/09/2026

भाद्र १० गते भोटेकोशी–त्रिशूली बाढीबाट प्रभावित नेपाली दाजुभाइ तथा दिदीबहिनीहरूको पीडामा साथ दिन भुटानी समाज नेदरल्याण्ड्स (BCN) ले २,४२८ अमेरिकी डलर (रु. ३,७१,७२८.८०) सहयोगस्वरूप २१ सेप्टेम्बर २०२६ मा नेपाल सरकारको प्रधानमन्त्री दैवी प्रकोप राहत कोषमा जम्मा गरेको छ।

उक्त सहयोग रकम जम्मा गरिएको आधिकारिक प्रमाण नेपाल सरकारसमक्ष पुर्‍याउने उद्देश्यले भुटानी समाज नेदरल्याण्ड्स (BCN) का अध्यक्ष श्री गोपाल गुरुङज्यूले आज गैरआवासीय नेपाली संघ (NRNA) राष्ट्रिय समन्वय परिषद् नेदरल्यान्ड्सका अध्यक्ष श्री विष्णु पोखरेलज्यूलाई हस्तान्तरण गर्नुभएको छ।

वर्षौंअघि नेपालले भुटानी समुदायलाई दिएको आश्रय, सुरक्षा र मानवीय सहयोगप्रतिको कृतज्ञता स्मरण गर्दै, आज नेपाल प्राकृतिक विपत्तिको पीडामा रहेको अवस्थामा आफ्नो तर्फबाट मानवीय सहयोग प्रदान गरिएको भुटानी समाज नेदरल्याण्ड्सले जनाएको छ।

यसै अवसरमा, नेपालका विभिन्न शिविरमा अझै रहेका भुटानी शरणार्थीहरूको दीर्घकालीन र सम्मानजनक समाधानका लागि तेस्रो मुलुकमा पुनर्स्थापना अथवा आफ्नो जन्मभूमि फर्किन चाहनेहरूका लागि सम्मानजनक वातावरण निर्माण गर्न आवश्यक पहल गरिदिन NRNA नेदरल्यान्ड्समार्फत नेपाल सरकारको ध्यानाकर्षण गराइदिन अध्यक्ष श्री गोपाल गुरुङज्यूले आग्रह गर्नुभएको छ।

मानवीयता, सहकार्य र पारस्परिक सम्मानको यो भावनात्मक सम्बन्धले नेपाली तथा भुटानी समुदायबीचको आत्मीयता अझ बलियो बनाउने विश्वास लिएका छौँ।

संकटको समयमा साथ दिनुभएकोमा भुटानी समाज नेदरल्याण्ड्स (BCN) प्रति गैरआवासीय नेपाली संघ, राष्ट्रिय समन्वय परिषद् नेदरल्यान्ड्स हार्दिक आभार तथा सम्मान व्यक्त गर्दछ। 🙏

🇳🇵 मानव सेवा नै सबैभन्दा ठूलो धर्म। 🇳🇵

गैरआवासीय नेपाली संघ (NRNA)
राष्ट्रिय समन्वय परिषद्, नेदरल्यान्ड्स

21/09/2026

गैरआवासीय नेपाली संघ राष्ट्रिय समन्वय परिषद् नेदरल्याण्ड्सको साधारणसभा सम्बन्धी सूचना,

आदरणीय नेदरल्याण्ड्स निवासी आमाबुबा, दाजुभाइ तथा दिदीबहिनीहरूमा सादर नमस्कार,

गैरआवासीय नेपाली संघ राष्ट्रिय समन्वय परिषद् नेदरल्याण्ड्सले आफ्नो वार्षिक साधारणसभा आगामी ०५ अक्टोवर २०२६ मा आयोजना गर्न गइरहेको जानकारी गराउन चाहन्छौँ।

विगतका केही समयदेखिका विभिन्न मतभेदलाई संवाद, सहकार्य र आपसी समझदारीका माध्यमबाट समाधान गर्दै एनआरएनए अब विवादरहित, समावेशी र एकताबद्ध वातावरणतर्फ अघि बढिरहेको छ। यही सकारात्मक परिवेशलाई अझ सुदृढ बनाउँदै नेदरल्याण्ड्समा रहेका सम्पूर्ण एनआरएनएका पञ्जीकृत सदस्यहरू तथा नेपाली समुदायलाई एकताका साथ अगाडि बढ्ने दृढ संकल्पसहित बृहत एकताको साधारणसभा आयोजना गर्न लागिएको हो।

यस ऐतिहासिक तथा महत्वपूर्ण साधारणसभामा सम्पूर्ण पञ्जीकृत सदस्यहरू, सरोकारवाला व्यक्तित्वहरू तथा नेदरल्याण्ड्सवासी सम्पूर्ण नेपाली दाजुभाइ तथा दिदीबहिनीहरूलाई उपस्थितिका लागि सादर निमन्त्रणा गर्दछौँ।



धन्यवाद !!!

गैरआवासीय नेपाली संघ
राष्ट्रिय समन्वय परिषद् नेदरल्याण्ड्स

19/09/2026

14/09/2026

🌺 हरितालिका तीजको हार्दिक शुभकामना 🌺

हरितालिका तीजको पावन अवसरमा देश–विदेशमा रहनुभएका सम्पूर्ण दिदीबहिनीहरूमा हार्दिक शुभकामना व्यक्त गर्दछु।

तीज हाम्रो मौलिक संस्कृति, माइती–चेलीको माया, भेटघाट, सुख–दुःख साटासाट र आपसी सद्भावको पर्व हो। यस पावन दिनले सबैको घर–आँगनमा सुख, शान्ति र खुसी ल्याओस्।

सम्पूर्ण दिदीबहिनीहरूको सुस्वास्थ्य, दीर्घायु, सुख–समृद्धि र पारिवारिक खुसीको हार्दिक मंगलमय शुभकामना।

गैरआवासीय नेपाली संघ, राष्ट्रिय समन्वय परिषद्, नेदरल्यान्ड्स

09/09/2026

श्रद्धाञ्जली अर्पणसहित अन्तिम बिदाइ तथा अन्त्येष्टि कार्यक्रम 🙏

हाम्रो नेपाली समाजका पुराना, सम्मानित तथा परिचित व्यक्तित्व स्वर्गीय बसन्त खनालज्यूको दुःखद निधनप्रति हार्दिक श्रद्धाञ्जली अर्पण गर्दछौँ।

उहाँप्रति श्रद्धाञ्जली अर्पणसहित अन्तिम बिदाइ तथा अन्त्येष्टि कार्यक्रम निम्न मिति, समय र स्थानमा हुने भएकाले आफन्तजन, शुभेच्छुक तथा नेपाली समुदायमा उपस्थित भई अन्तिम श्रद्धाञ्जली अर्पण गरिदिनुहुन हार्दिक अनुरोध गर्दछौँ।

📅 मिति: १० सेप्टेम्बर २०२६
📍 स्थान: Ookmeerweg 275, 1067 SP Amsterdam
🕙 समय: बिहान १०:३० बजेदेखि

दिवंगत आत्माको चिरशान्तिको कामना गर्दै शोकसन्तप्त परिवारजनमा हार्दिक समवेदना व्यक्त गर्दछौँ। 🙏🕊️

08/09/2026

हार्दिक श्रद्धाञ्जली तथा हार्दिक समवेदना 🙏

प्रिय भाइ फोटोग्राफर श्री दिलिप खनालज्यूका आदरणीय पिता श्री बसन्त खनाल दाजुको असामयिक निधनको खबरले हामीलाई अत्यन्तै स्तब्ध र मर्माहत बनाएको छ।
दिवंगत आत्माप्रति भावपूर्ण श्रद्धाञ्जली अर्पण गर्दै चिरशान्तिको कामना गर्दछौँ। यस असीम दुःखद घडीमा दिलिप खनालज्यूसहित सम्पूर्ण शोकसन्तप्त खनाल परिवारजनमा गहिरो समवेदना व्यक्त गर्दछौँ।

NRNA NCC Netherlands मा रहेर स्वर्गीय बसन्त खनाल ज्यू ले पुर्‍याउनुभएको सामाजिक योगदानको सम्पूर्ण नेपाली समुदाय उच्च सम्मान गर्दछ। उहाँको योगदान र सेवाभाव हाम्रो समुदायका लागि सदैव स्मरणीय र प्रेरणादायी रहनेछ।

दिवंगत आत्माको चिरशान्तिको कामना गर्दै ईश्वरले शोकसन्तप्त परिवारजनलाई यो अपूरणीय क्षति र पीडा सहन सक्ने धैर्य धारण गर्ने शक्ति प्रदान गरून्।
दिवंगत आत्माले चिरशान्ति पाऊन्।

ॐ शान्ति। 🙏

NRNA NCC Netherlands

04/09/2026

श्रीकृष्ण जन्माष्टमीको यस पावन अवसरमा भगवान श्रीकृष्णको दिव्य कृपा हामी सबैमा सधैं रहोस्। उहाँले हामीलाई सत्यको मार्गमा अडिग रहने साहस, कठिनाइमा धैर्य राख्ने शक्ति, सही निर्णय गर्ने विवेक र मानव सेवामा समर्पित रहने प्रेरणा प्रदान गरून्। 🙏🙏