28/08/2026
Labarin Alhaji Nafiu Isyaku Rabiu: Arziki, Kisa da Shari’ar da Ta Girgiza Kano
Alhaji Nafiu Isyaku Rabiu ya kasance fitaccen attajiri kuma ɗan kasuwa a Kano a shekarun 1970. Shi ne babban ɗan marigayi Sheikh Isyaku Rabiu, kuma babban ɗan’uwa ga hamshakin attajiri Abdul Samad Rabiu, wanda ya kafa rukunin Kamfanonin BUA wato (BUA Group).
A wancan lokaci, Nafiu ya shahara da rayuwar alfarma. An ce yana da motocin Rolls-Royce guda biyu, wasu motocin tsada da kuma jiragen sama masu zaman kansu guda biyu. Rayuwarsa ta alfarma har ta fito a wani shirin BBC da NTA na shekarar 1984 mai suna Nigeria: A Squandering of Riches.
Sai dai rayuwarsa ta sauya gaba ɗaya bayan mutuwar matarsa, Fatima Rabiu, a ranar 10 ga Mayu, 1979.
A daren 9 ga Mayu, Nafiu da Fatima sun shirya liyafar cin abinci a gidansu da ke Dawaki Road, Kano. Baƙi sun bar gidan da misalin ƙarfe 11 na dare, kuma sun ce ma’auratan suna cikin koshin lafiya.
Washegari, an gano Fatima a cikin ɗakinta a mace. An kuma ga alamun raunuka da ake zargin sun shafi shakewa a wuyanta.
Lamarin ya tayar da hankali sosai saboda Fatima ’yar shahararren attajirin Kano, Tijjani Aliyu Dagazau, ce, yayin da Nafiu shi ma yake daga cikin manyan attajiran lokacin.
Gwamnatin Kano ƙarƙashin Gwamna Muhammadu Abubakar Rimi ta matsa sosai wajen ganin an gurfanar da Nafiu tare da neman hukuncin kisa.
Sai dai a shari’ar farko, lauyoyin Nafiu sun yi amfani da wasu kura-kurai a cikin shaidun likitoci, musamman kan ko an tabbatar da cewa shakewa ce ta haddasa mutuwar Fatima. A ƙarshe, Babbar Kotun ta wanke Nafiu.
Hukuncin ya jawo fushi da zanga-zanga daga wasu jama’a waɗanda s**a yi ganin cewa kuɗi da matsayi na iya ba mutum kariya daga doka.
Gwamnatin Kano ta ɗaukaka ƙarar zuwa Kotun Ɗaukaka Ƙara. Kotun ta soke hukuncin wanke Nafiu, ta same shi da laifin culpable homicide, wato kisan kai wanda ba ya ɗaukar hukuncin kisa, sannan ta yanke masa hukuncin ɗaurin shekaru huɗu.
Nafiu bai yarda da hukuncin ba, ya garzaya Kotun Ƙoli. Ya ɗauki shahararren lauya Chief F.R.A. Williams, SAN, yayin da gwamnati ta samu wakilcin Kehinde Sofola, SAN.
Babban abin da lauyan Nafiu ya ƙalubalanta ba wai kawai batun kisan ba ne, sai dai ikon gwamnati na ɗaukaka ƙarar mutum da aka wanke daga laifi. Wannan ya haifar da wata muhimmiyar shari’a mai suna Nafiu Rabiu v. The State (1980).
Kotun Ƙoli ta tabbatar da cewa gwamnati tana da ikon ɗaukaka irin wannan ƙara, tare da kafa muhimmiyar ƙa’ida kan yadda ake fassara Kundin Tsarin Mulkin Najeriya.
An kuma samu cewa gwamnatin Kano ta janye ƙarar da take neman a yanke wa Nafiu hukuncin kisa. Saboda haka, Kotun Ƙoli ba ta iya ƙara masa hukunci sama da abin da ke gaban ta ba. Daga ƙarshe, Nafiu ya ci gaba da ɗaurin shekaru huɗu.
Bayan fitarsa daga gidan yari, Nafiu ya janye gaba ɗaya daga rayuwar alfarma da shahara. Ya daina fitowa a tarukan jama’a, ya bar rayuwar motocin alfarma da jiragen sama, kuma ya kasance cikin sirri har tsawon rayuwarsa.
A yau, shari’ar Nafiu Rabiu tana daga cikin shari’o’in da s**a yi tasiri sosai a tarihin tsarin shari’a na Najeriya. Kotun da aka gudanar da shari’ar a Kano har yanzu wasu ke kiranta da “Kotun Nafiu.”
Rahoto TY Hausa
