06/04/2026
Ƙarin Tunatarwa kan Tsarin Shirin CDP ga Al'ummar Shinkafi 'B' - Kambarawa, Kwaɗo, Modoji, Maƙera, Bakuru da Kadafawa
JADDAWALIN WAKILAN KWAMITIN GUNDUMA (CLC) DA KUMA TSARIN GUDANARWARSU
A ƙoƙarin da muke tayi na juyo da hankulan al'ummar mu kan wannan shiri na raya Gundumomi (Ward Development) da Gwamnan Jihar Katsina Malam Dikko Umaru Raɗɗa, PhD, CON ya kawo domin kyautata rayuwar al'umma, yau, za mu fitar wa al'umma jerin wakilan da ya kamata kowane kwamiti ya ƙunsa da kuma hanyar tafiyar da aikin shi.
A kowace gunduma/mazaɓa (ward), akwai ma'aikata guda uku (3) na ƙaramar hukuma da aka ɗauka aiki wanda kuma suke cikin tsarin ma'aikatan gwamnati tsawon lokaci, sai dai kusan ayyukan da suke yau da goben tsarin aiki ya haɗiye su. Amma ɓullo da wannan shiri na CDP ya busa masu sabon rai a cikin aikin nasu.
Waɗannan ma'aikata su ne;
1. Community Development Officer (CDO)
2. Community Learning Officer (CLO) sai kuma;
3. Community Support Officer (CSO).
Domin kiyaye ƙa'ida da sharuɗɗan aiki, sai aka damƙa alhakin jagorancin wannan kwamiti a hannun su, musamman shi/ita CDO a matsayin shugaban kwamitin.
Sauran wakilan kwamiti su ne kamar haka;
1. Kansila
2. Maigari
3. Dattawa guda uku
4. Liman Ɗariƙa
5. Liman Izala
6. Wakilin masu buƙata ta musamman
7. Wakiliyar Mata
8. Wakilin Matasa
9. Hedimasta
10. Wakilin 'yan kasuwa
11. Malamin Gona
12. Malamin Asibiti
Idan muka haɗa lissafin gaba ɗaya za mu sami mutum goma sha bakwai (17) a matsayin 'yan wannan kwamiti na gunduma, Community Level Committee (CLC).
Waɗannan bayin Allah su aka ɗora ma alhakin tafiyar da wannan kwamiti, domin gudanar da duk ayyukan da s**a shafi gundumar a ƙarƙashin wannan shiri na CDP.
Duk abinda za a nema ko za a gudanar, to wajibi ne duka sai wannan 'yan kwamiti sun zauna sun cimma matsaya kafin gabatarwa ko gudanarwa. Idan faɗin lamarin ya wuce iyawar su, to sai su tara al'umma a ofishin su na gunduma domin a tattauna a sami matsaya.
Babu wani mutum ɗaya da aka ba damar yin gaban kanshi kan duk wani abu da da ya shafi wannan gunduma ba tare da sauran wakilan kwamitin ba.
Maganar gudanar da ayyuka a cikin shirin Naira Miliyan Goma Goma (N10, 000, 000) da aka aje ma kowace gunduma a asusun ajiyar ta na banki, shirin raba kayan noma na zamani, rabon takin zamani, rabon kayan cimaka da ma duk wani abin da ya shafi gunduma, to a wannan tsarin ake tafiyar dashi, inda kuma al'umma s**a fahimci ba kan haka suke ba, to suyi maza su sanar da babban ofishin gudanarwa na CDP wanda ke ƙarƙashin jagorancin Kamaluddeen Kabir Katsina domin yin gyaran da ya kamata.
CDP (Katsina State Community Development Programme) ɗin nan ta al'umma ce kuma don al'umma aka yi ta. Wajibi ne al'umma su maido hankulan su kan ta domin cin gajiyar alheran da tazo dasu.
Ya Allah Ka iya mana, kai mana maganin abinda ya ishe mu.
Shinkafi 'B' Consultative Forum (SCF)
Litinin, 6 ga Afrilu, 2026
18 ga Shawwal, 1447
Katsina State Community Development Programme
Wakeup Katsina-Youth
