05/09/2026
SAƘON TA’AZIYYA
NACO 2017 TA MIƘA SAƘON TA’AZIYYA GA ƊAYA DAGA CIKIN MEMBOBINTA
Ƙungiyar Tsofaffin Ɗalibai ta Shekarar 2017 (NACO 2017 – Nahuche Class of 2017), ƙarƙashin jagorancin Nurse Kamaluddeen Aminu, na miƙa saƙon ta’aziyyarta bisa rasuwar Malam Lawali Yargungun, mahaifin ɗaya daga cikin membobin ƙungiyar, Sanusi lawali.
Ƙungiyar ta bayyana matuƙar alhininta da jimamin wannan babban rashi, tare da miƙa ta’aziyya ga iyalan marigayin, ‘yan uwa, abokan arziki da daukacin al’ummar da wannan rashi ya shafa.
A yayin miƙa ta’aziyyar, Shugaban Ƙungiyar ya bayyana rasuwar Malam Lawali Yargungun a matsayin babban rashi ga iyalinsa da kuma al’umma baki ɗaya, duba da irin gudunmawar da marigayin ya bayar wajen koyarwa, tarbiyya da hidima ga al’umma.
Ya ƙara da cewa, rasuwar mutum mai irin wannan matsayi ba ta tsaya ga iyalinsa da ‘yan uwansa kaɗai ba; illa tana shafar dukkan waɗanda s**a taɓa amfana da iliminsa, tarbiyyarsa da kyakkyawar mu’amalarsa.
A madadin Shugabanni da daukacin membobin NACO 2017, muna miƙa ta’aziyya ta musamman ga ɗan uwanmu Sanusi Lawali da sauran iyalan marigayin. Muna roƙon Allah Ya ba su haƙuri da juriya wajen jure wannan babban rashi.
Allah ya gafarta masa
Allah ya karbi kyakkyawan ayyukan sa.
Ameen ya Allah
23/03/1448AH
05/09/2026
✍️: Najeeb Sani
Publicity Secretary NACO 2017
