31/07/2022
Mu babu wanda za mu matsa ma sa ya kyautata mana, ba za mu ta ƙorafi ga mutum don yayi watsi da mu ko don ya ƙi damuwa da damuwarmu ba. Dalilin haka shine tuni mu ka gane mutane suna kyautatawa da taimakawa wanda suke so ne kaɗai, idan suna son ka ko ba ka matsa mu su za ka ga suna ma daidai, idan ba sa son ka kuwa koda za ka kwana kana nuna mu su yanda ya dace su mu'amalancen ka ba za su ma hakan ba.
Idan mu ka ga mutum bai mana kirki ba hakan baya nuna shi mugu ne illa iyaka dai wataƙila baya son mu ne. Shi kuwa rashin son mu ko ƙin mu sam ba lefi bane, don baya cikin kowane irin sharaɗi a duniya mutum ya so mu, kana iya zama duk wani abu na cikar ɗan adam koda kuwa baka son mu, don haka rashin mana ya kamata ba ya buƙatar mu matsa ma ka, kawai za mu karɓi hakan a matsayin amsar a'a ga tambayar "shin kana son mu?"
Abunda za mu yi shine za mu tabbatar mun matsawa kanmu mun ma ka irin mu'amalar da mu ke ganin ta dace mu yi da wanda ba ya ƙaunar mu, za mu karantar da kanmu abunda ya kamata mu yi ga mutumin da bai damu da mu da al'amarinmu ba, lokaci da ƙarfin da zamu ɓata wajen ganin nuna ma ka su waye mu, za mu yi amfani da shi mu ƙara kyautatawa wanda su ka ɗauke mu da muhimmanci, maimakon mu yi ƙorafi za mu yabawa masu mana daidai, maimakon zaginka za mu yabi masoyanmu, maimakon ma ka gori za mu yi godiya ga masu damuwa da mu.
©Al-AMEEN CHARITY FOUNDITION
