11/06/2026
ထိုင်းနိုင်ငံရှိ ဒုက္ခသည်များကို တရားဝင်နေထိုင်ခွင့်ကတ်ပြားများ စတင်ထုတ်ပေး
ဇွန်လ ၁၀ ရက်၊ ၂၀၂၆ ခုနှစ်။ ကေအိုင်စီ
ထိုင်းနိုင်ငံအတွင်း ခိုလှုံနေထိုင်ကြသည့် မြန်မာဒုက္ခသည်များအား လူ့ဂုဏ်သိက္ခာနှင့်အညီ တရားဝင်နေထိုင်ခွင့်နှင့် အလုပ်လုပ်ကိုင်ခွင့်ပြုမည့် "ထိုင်းနိုင်ငံသားမဟုတ်သူများဆိုင်ရာ မှတ်ပုံတင်ကတ်" (ဘတ်ပန်းရောင်) ကို ဇွန်လ ၈ ရက်နေ့မှစတင်ကာ ထိုင်းအာဏာပိုင်များက အစမ်းထုတ်ပေးနေပြီဖြစ်ကြောင်း သိရသည်။
ဒုက္ခသည်များအား သက်သေခံကတ်ပြားထုတ်ပေးသည့် လုပ်ငန်းစဉ်နှင့်ပတ်သက်၍ ကုလသမဂ္ဂ ဒုက္ခသည်များဆိုင်ရာမဟာမင်းကြီးရုံး (UNHCR) မှ တာဝန်ရှိသူများသည် ဘန်ကောက်မြို့နှင့် ပထုံဌာနီခရိုင်ရှိ လူဦးရေနှင့် သန်းခေါင်စာရင်းရုံး၌ ကတ်ပြားစမ်းသပ်ထုတ်ပေးနေမှုကို သွားရောက် လေ့ လာခဲ့ပြီး စခန်းပြင်ပသို့ ရွှေ့ပြောင်းအလုပ်လုပ်ကိုင်နေသည့် ဒုက္ခသည်များနှင့်လည်း တွေ့ဆုံခဲ့ကြသည်ဟု သိရသည်။
အဆိုပါအစီအစဉ်သည် UNHCR ၏ ကူညီထောက်ပံ့မှုဖြင့် ဆောင်ရွက်ခြင်းဖြစ်ပြီး စစ်ဘေးရှောင်များ တရားဝင်အလုပ်လုပ်ကိုင်ခွင့်ရရှိစေရန်နှင့် လူနေမှုဘဝမြှင့်တင်ပေးနိုင်ရန် လမ်းစဖွင့်ပေးသည့် ခြေလှမ်းတစ်ခုဖြစ်ကြောင်း UNHCR ဘက်က ဆိုသည်။
ထိုင်းနိုင်ငံအနေဖြင့် စစ်ဘေးရှောင်များအပေါ် ယခုကဲ့သို့ လမ်းစဖွင့်ပေးခြင်းသည် ကမ္ဘာတစ်ဝန်းရှိ အခြားနိုင်ငံများအတွက်ပါ စံပြဖြစ်သလို UNHCR အနေဖြင့်လည်း ထိုင်းအစိုးရ၏ လုပ်ဆောင်ချက်ကို ချီးကျူးကြောင်း ထိုင်းသတင်းဌာန တစ်ခုဖြစ်သည့် The Reporters က ဖော်ပြထားသည်။
၎င်းအပြင် ထိုင်းနိုင်ငံသားမဟုတ်သူများဆိုင်ရာ သက်သေခံကတ်ပြား ထုတ်ပေးမည့်လုပ်ငန်းစဉ်ကို လာမည့် ဇွန်လ ၁၇ ရက်နေ့တွင် အပြည့်အဝ စတင်အကောင်အထည်ဖော်တော့မည်ဖြစ်ကြောင်းလည်း သိရသည်။
အဆိုပါလုပ်ငန်းစဉ်သည် တစ်ဦးခြင်းလုံခြုံမှုရှိသည့်အပြင် ထိုင်းအာဏာပိုင်အနေဖြင့်လည်း ၎င်းတို့ အနေဖြင့် မည်သူဖြစ်ကြောင်း၊ မည်သည့် ဒေသတွင်နေထိုင်ကြောင်း ကိုယ်ရေးအချက်အလက်များ နောက်ကြောင်းရှာဖွေနိုင်မည်ဖြစ်သောကြောင့် နှစ်ဖက်စလုံးအတွက် အကျိုးရှိမည်ဟု မြန်မာရွှေ့ပြောင်း အလုပ်သမားအရေး ကူညီဆောင်ရွက်ပေးနေသည့် ထိုင်းအရပ်ဘက် လူမှုအဖွဲ့အစည်းကွန်ရက်မှ မစ္စတာ ဆီဝါဝေါင်း ( Mr. Siwawong Sooktawee )က The Reporters သတင်းဌာနတွင် ပြောသည်။
ထို့အပြင် နောင်အနာဂတ်အတွက် ထိုင်းလူ့အဖွဲ့အစည်းအတွင်အတူတကွ ယှဉ်တွဲနေထိုင်နိုင်ရန် အရေးပါသည့် အုတ်မြစ်ဖြစ်ကြောင်းလည်း မစ္စတာ ဆီဝါဝေါင်း ဆက်ပြောသည်။
လက်ရှိတွင် ဒုက္ခသည်စခန်းများအတွင်း ရိက္ခာထောက်ပံ့မှု တဖြည်းဖြည်းလျော့နည်းလာနေချိန်ဖြစ်ရာ ရရှိလာသည့် အခွင့်အရေးကို လက်လွတ်မခံဘဲ အသုံးချတတ်ရန် လိုအပ်ကြောင်း မယ်လ ဒုက္ခသည် စခန်းတာဝန်ခံ စောဆန်းဒေးက တိုက်တွန်းသည်။
၎င်းက “ကျနော်တို့တွေ မျက်စိဖွင့် နားစွင့်ထားရမယ့်အချိန် ရောက်ပါပြီ။ ထိုင်းအစိုးရနဲ့ UNHCR လုပ်ပေးတဲ့ အစီအစဉ်ဟာ ဒုက္ခသည်တွေအတွက် အခွင့်အရေးကောင်းတစ်ခုပါ။ ရလာတဲ့ အခွင့်အရေးကိုလည်း ယူတတ်ဖို့ လိုတယ်” ဟု ကေအိုင်စီသို့ ပြောသည်။
တာ့ခ်ခရိုင်အတွင်းရှိ ဒုက္ခသည်စခန်းများတွင် သက်သေခံကတ်ပြား ထုတ်ပေးမည့် အစီအစဉ်ကို လာမည့် ဩဂုတ်လအတွင်း ကွင်းဆင်းဆောင်ရွက်ရန်ရှိပြီး စခန်းပြင်ပတွင် အလုပ်လုပ်ကိုင်နေသူများအနေဖြင့် မိမိတို့ရောက်ရှိနေသည့် မည်သည့်ခရိုင်တွင်မဆို သက်ဆိုင်ရာ မြို့နယ်အုပ်ချုပ်ရေး (အန်ဖို) ရုံးများ၌ သွားရောက်လျှောက်ထားနိုင်ကြောင်း သိရသည်။
ထိုင်းနယ်စပ်ရှိ ဒုက္ခသည်စခန်း (၉) ခုအတွင်း စခန်းပြင်ပ ထွက်ခွာအလုပ်လုပ်ကိုင်ခွင့် စတင်ပြုလုပ်သည့် ၉ လတာကာလအတွင်း တရားဝင်ခွင့်ပြုချက်ရရှိထားသူ ၃,၅၇၀ ဦးရှိနေပြီး နောက်ထပ် အလုပ်ထွက်လုပ်ရန် အဆင်သင့်ရှိနေသည့် ဒုက္ခသည် ၄၀,၀၀၀ ကျော်ရှိကြောင်း နယ်စပ်ရေးရာနှင့် ဒုက္ခသည်များဆိုင်ရာဌာနခွဲ ညွှန်ကြားရေးမှူး၏ ပြောကြားချက်အရ သိရသည်။
Credit: Karen News
Photo: กรมการปกครอง fanpage
