Radio Maria Malawi

05/10/2026

Unduna wa za maphunziro ndi luso la makono wati ukuyembekezeka kulemba ntchito aphunzitsi owonjezera okwana 1,100 m'sukulu za sekondale pofuna kuthana ndi vuto la kuchuluka kwa chiwerengero cha ophunzira omwe mphunzitsi m'modzi amaphunzitsa mkalasi.

Nduna ya zamaphunziro a Bright Msaka yayankhula izi ku Lilongwe pa mwambo wokumbukira aphunzitsi pa dziko lonse lapansi - World Teachers Day.

Iwo ati aphunzitsi amagwira ntchito yotamandika ndipo boma lichita chotheka monga kupereka ndalama zokwanira komanso kuwapatsa zofunikira zonse zomwe zingapangitse aphunzitsiwa kumagwira ntchito mokhulupirika.

Tsikuli chaka chino likukumbukiridwa pa mutu wakuti "Kuyima limodzi ndi aphunzitsi kwa zaka 60 zokweza ntchito zawo ndi kuwateteza pa kukonza tsogolo lathu"

04/10/2026

Kodi munaphonyana ndi Pologalamu yathu? Tsopano mukhonza kumvetseranso.

Pezani link ya podcast pa page yathu ino ya Facebook ya ena mwa mapologalamu athu omwe awulutsidwa kale, ndipo m***a kumvera nthawi iliyonse, kulikonse pa nthawi yomwe Inu mukufuna,.....
https://www.radiomaria.mw/extvs_programme/program-yapadera/

04/10/2026

Mamembala a mabungwe osiyanasiyana mu mpingo wa Katolika, awapempha kuti apewe mpikisano pamene akutumikira Mulungu kudzera m'mabungwe awo.

Mlangizi wa dinale ya Likuni mu Arkidayosizi ya Lilongwe, Bambo Cornelius Kanyambo anena izi loweruka pambuyo pa m'bindikiro wa masiku atatu omwe amayi mu dinaleyo a m'bungwe la Catholic Women Association (CWA) anali nawo ku parishi ya Likuni.

Bambo Kanyambo ati mabungwe ndi othandiza kuti munthu atumikire bwino Mulungu koma akhristu akuyenera kupewa kupikisana mu mpingo kaamba koti za Mulungu zilibe munthu yemwe ali patsogolo pa mzake.

Poyankhulapo mlangizi wa bungweli, Sister Priscilla Mwamba, wayamikira amayi a mu dinaleyi chifukwa chotuluka mwaunyinji ndi kukhala nawo pa m'bindikirowu.

Amayi ochokera m'maparishi atatu omwe ndi a Likuni, Nathenje ndi Mlale ndi omwe anafika ku msonkhanowu.

04/10/2026

Phungu wa dera la Dedza Golomoti, Allan Essau Phiri wayamikira boma pokhazikitsa ntchito za chitukuko zitatu ku dera lake kupyolera mu ndalama za mu thumba la zachitukuko chakudera la Constituency Development Fund (CDF).

Zitukuko zomwe zigwiridwe ku delari ndi monga kubweretsa madzi ku dera la Kabulika 1, kumanga chipatala chaching'ono pa Kapiri komanso kumanga kalasi ziwiri zophunzilira pa Kamwendo Junior Primary School.

Phunguyu walangiza omwe agwire ntchitoyi kuti amange zinthu zolimba komanso zokhalitsa.

Mayi Julia Qoto omwe ndi mkulu wa zomangamanga ku khonsolo ya boma la Dedza, ati awonetsetsa kuti ntchito zonsezi zithe m'masiku 120 monga zilili mu mgwirizano wa boma ndi ogwira ntchitoyi.

04/10/2026

Episkopi wopuma wa Dayosizi ya Zomba, Ambuye Allan Chamgwera, akumbutsa akhristu za udindo omwe ali nawo wothandiza kufalitsa uthenga wa chipulumutso ndi kupewa kusiyira ntchitoyi ansembe okha.

Iwo ayankhula izi loweruka ku Thondwe mu dayosizi ya Zomba pomwe gulu la abwenzi a Arkidayosizi ya Blantyre koma amakhala mu Dayosizi ya Zomba, anapita kukawachezera.

Iwo apempha akhristuwo kuti azikonda komanso kusamalira mabanja awo.

M'mawu ake wapampando wa gululo, a Alfred Chasowa ati anachiona chofunika kuti akawachezere Ambuye Chamgwera ndi cholinga chokawaona, kukalandira madalitso ndi upangiri pa zinthu zosiyana-siyana ngati aKatolika osayiwala kuwatengera mphatso.

A Chasowa alimbikitsa magulu osiyanasiyana mu Mpingo kuti azikonda kukayendera episkopiyu.

Ambuye Allan Chamgwera omwe anapuma ngati episkopi wa Dayosizi ya Zomba m'chaka cha 2004, padakali pano ali ndi zaka 98 zakubadwa.

04/10/2026

Tatsiliza motero mwambo wa Nsembe ya Ukalistia wotsekulira Mariatona wa Mwezi wa October umene umakufikani kuchokera kuno ku Radio Maria Malawi Grotto Mangochi Main Studio. Nthawi zonse kondani kumvera,kuthandiza komanso kupempherera Radio Maria Malawi

Mverani Radio Maria Malawi kudzera ku ma Frequency awa.FM 91.2 MHz komanso 91.4 MHz. Komanso pitirizani kutsatira maprogram pa Website yathu ya www.radiomaria.mw.

Tsiku labwino Kwa Inu nonse

04/10/2026

‎Mwambo wa Nsembe ya Ukalistia wotsekulira Mariatona wa Mwezi wa October kuchokera ku Radio Maria Malawi Mangochi Main Studio . Mariatona wa Chaka Chino tikutsogoleredwa ndi Mutu wakuti." Muchikondi Muli Kupambana "
‎
‎Tsatirani Mwambo Wonsewu pano komanso pa wailesi kudzera pa 91.2 FM komanso 91.4 FM

04/10/2026

Nthawi ikakwana 11:00 Am tikupatsirani mwambo wa Nsembe ya Ukalistia wotsekulira Mariatona wa Mwezi wa October kuchokera ku Radio Maria Malawi Mangochi Main Studio.

Tsatirani mwambo onse pano komanso pa wailesi.91.2 FM komanso 91.4 FM

01/10/2026

01/10/2026

Episkopi wothandizira mu Arkidayosizi ya Lilongwe, Ambuye Vincent Mwakhwawa, lero akutsogolera nsembe ya Ukaristia yotsekulira mwezi wa Chibalalitso cha mpingo wachaka chino ku tchalitchi la Mzimu Woyera Kamphulu yomwe ndi nthambi ya parishi ya St. Francis de Sales Manyani mu arkidayosiziyo.

Pa mwambowu, pafika akhrisitu ochokera m'matchalitchi onse ozungulira parishi ya Manyani komanso ansembe omwe amatumikira pa parishiyo.

Mpingo wa Katolika udakhazikitsa mwezi wa October chaka chilichose kukhala mwezi wa Chibalalitso cha mpingo komanso kupemphera Kolona pofuna kuzamitsa moyo wa mapemphero ndi kufikitsa ponse ponse mawu a Mulungu.

Mutu wa chaka chino ndi wakuti "Akhristu khalani amodzi ndi Yesu Khristu ndi wogwirizana mu utumiki"