04/10/2026
ULIED ASTARTE
Salv Sammut
Horizons
Din id-darba, Salv Sammut jagħżel tema ferma oriġinali fil-binja tiegħu ta’ dan ir-rumanz: Astarte, li fil-qedem kienet meqjusa u meqjuma bħala alla tal-imħabba, tal-fertilità u tat-taqbid. Il-kitba f’dan ir-rumanz hija kollha stħajjil tal-kittieb u frott l-immaġinazzjoni tiegħu.
F’dan ir-rumanz, il-qarrej se jsib ritwali li jseħħu fit-tempji tal-Imnajdra fi ljieli ta’ qamar jiddi u qrib sbieħ il-jum. Dawn ir-ritwali jsiru f’kull solstizju u ekwinozju meta l-istaġuni tas-sena jinbidlu. F’dan il-bdil, waqt xi invokazzjoni, tfajla titteħdilha l-verġinità tagħha bħala turija ta’ qima lejn Astarte.
Iżda darba mhux kollox imur sew. Tfajla ma titlifx biss is-safa ta’ xbubitha imma wkoll titlef ħajjitha fuq il-midbaħ tar-ritwal.
Dawn ir-ritwali kienu jitwettqu minn għaqda li sejħet lilha nfisha “Ulied Astarte”. L-imseħbin fiha, fil-bidu tal-inizjazzjoni tagħhom, riedu jaħilfu lealtà, segretezza u solidarjetà għal xulxin. Ilkoll kienu jibżgħu mill-Mastru-Suprem, li ħadd ma kien jaf eżatt min kien għajr dawk taċ-ċrieki tassew ta’ ġewwa.
Fl-aħħar mhux kulħadd ried jibqa’ leali. Daħlu l-biża’, it-theddid, kif ukoll l-eliminazzjoni ta’ min jazzarda jaħseb li jrid jinħall mir-rabta. Stupru vjolenti fuq tfajla verġni kebbes aktar din ix-xewqa.
F’dan ir-rumanz ma tonqosx lanqas l-imħabba ġenwina mal-qerq fi ħdan il-ġustizzja ta’ xi ħadd li kien midħla sewwa tal-għaqda klandestina. B’danakollu, fl-aħħar jitfaċċa bniedem rett u ġust li mhux biss iħarbat ritwal imma wkoll ikisser dik l-Għaqda ta’ Ulied Astarte.
B’hekk, is-sewwa tirbaħ, il-ġustizzja ssir u t-tempji tal-Imnajdra jerġgħu jgħixu u jsaltnu fis-skiet u l-ħemda ta’ ljieli qamrin. Għalhekk, il-qarrej huwa u jaqra se jimxi pass pass ma’ dil-ġrajja eċċitanti u movimentata.
