28/09/2026
Ftit tal-jiem ilu kellna l-pjaċir nilqgħu fil-Marsa lill-Ministru Alison Zerafa Civelli, li magħha żorna diversi xogħlijiet li għaddejjin fil-lokal tagħna u ltqajna ma’ għaqdiet Marsin biex nisimgħu aktar dwar il-ħtiġijiet tagħhom.
Il-Ministru qed tkun ta’ appoġġ kbir għall-Marsa. Bis-saħħa tal-kollaborazzjoni max-Xogħlijiet Pubbliċi, qed jitwettqu diversi interventi li jgħinu biex insebbħu l-lokal tagħna, intejbu l-infrastruttura u nieħdu ħsieb l-ispazji li jgawdu minnhom ir-residenti. Din hija kollaborazzjoni li qed tissarraf f’ħidma konkreta għall-Marsa!
🌿 Żorna l-vaska fil-ġnien tas-6 ta’ Awwissu, fejn bħalissa għaddej xogħol ta’ restawr. Il-ħidma se tkompli wkoll fuq il-vaska ta’ maġenbha, biex dan l-ispazju jingħata dehra aktar sabiħa u miżmuma. Ma’ dawn ix-xogħlijiet se jkun hemm ukoll appoġġ permezz ta’ skemi li jgħinu biex titjieb it-tisqija tal-pjanti. Dan jorbot ukoll mal-qasam tal-kunsilli lokali, li jaqa’ taħt ir-responsabbiltà tal-Ministru, u mal-ħidma tagħna biex nieħdu ħsieb aħjar l-ispazji ħodor tal-lokal.
Żorna wkoll ix-xogħlijiet marbuta mal-immaniġġjar tal-ilma tax-xita fi Triq is-Sajjieda. Dawn huma interventi kumplessi li jeħtieġu koordinazzjoni, attenzjoni u żmien, iżda huma importanti biex titjieb l-infrastruttura taż-żona. Napprezzaw il-paċenzja u l-kooperazzjoni tar-residenti waqt li tkun għaddejja din il-ħidma.
Matul iż-żjara tajna importanza wkoll lill-għaqdiet tagħna. Għamilna ħilitna biex nikkomunikaw ma’ kull għaqda tal-lokal, nisimgħu l-ħtiġijiet tagħha u naraw fejn tista’ tingħata għajnuna għal ċerti xogħlijiet meħtieġa, sabiex dawn l-għaqdiet ikunu jistgħu joperaw f’kundizzjonijiet aħjar. L-għaqdiet u l-voluntiera tagħhom jagħtu ħafna lill-komunità tagħna, u l-appoġġ lejhom huwa wkoll investiment fil-ħajja soċjali u kulturali tal-Marsa.
Grazzi lill-Ministru Alison Zerafa Civelli tal-preżenza, tad-disponibbiltà u tal-appoġġ kontinwu tagħha, kif ukoll lill-ħaddiema kollha involuti f’dawn ix-xogħlijiet.
Bħala Sindku, nibqa’ impenjat li nsaħħaħ din il-kollaborazzjoni u nsegwi l-ħtiġijiet tal-lokal tagħna. Flimkien mal-Kunsill Lokali, nibqgħu naħdmu għal Marsa isbaħ, aktar miżmuma u li toffri kwalità ta’ ħajja aħjar lill-Marsin kollha
