24/08/2026
AĠĠORNAMENT IMPORTANTI DWAR XOGĦLIJIET TA’ INFRASTRUTTURA FIL-MARSA
Għeżież residenti,
Nixtieq inżommkom infurmati dwar numru ta’ xogħlijiet infrastrutturali li se jkunu qed isiru fil-ġimgħat li ġejjin f’diversi toroq fil-Marsa.
Il-ġimgħa li għaddiet saret laqgħa ta’ koordinazzjoni sabiex ix-xogħlijiet bejn l-entitajiet differenti jiġu ppjanati bl-aħjar mod possibbli, b’mod partikolari biex kemm jista’ jkun innaqqsu l-inkonvenjent għar-residenti, inżommu l-aċċess għat-toroq u nevitaw konġestjoni żejda tat-traffiku.
Ix-xogħlijiet huma ppjanati li jibdew ILLUM.
Triq is-Salib tal-Marsa / Triq l-Irħam
L-ewwel fażi tax-xogħlijiet se tibda minn Triq is-Salib tal-Marsa, min-naħa ta’ Triq l-Irħam.
Ingħatat prijorità lil Triq l-Irħam sabiex ix-xogħol f’din it-triq isir kemm jista’ jkun malajr u jiġi evitat aktar inkonvenjent meta jerġgħu jibdew l-iskejjel.
Il-pjan huwa li l-pajpijiet jitqiegħdu u t-trinka tingħalaq fi żmien kemm jista’ jkun qasir. Dan huwa partikolarment importanti għaliex, bħalissa, Triq l-Irħam qed isservi bħala rotta importanti ta’ ħruġ minħabba li Triq Balbi tinsab magħluqa.
Importanti wkoll li, fil-parti ta’ Triq l-Irħam fejn se jsiru dawn ix-xogħlijiet, it-triq se terġa’ tingħata l-wiċċ tagħha fuq il-wisa’ kollu, u mhux biss fuq il-parti tat-trinka.
Triq is-Salib
Skont il-Pjan ta’ Ġestjoni tat-Traffiku għall-ewwel fażi, waqt li jkunu għaddejjin ix-xogħlijiet fi Triq is-Salib tal-Marsa, il-parkeġġ fuq iż-żewġ naħat tal-parti affettwata se jitneħħa temporanjament sabiex it-triq tkun tista’ tibqa’ miftuħa għat-traffku fiż-żewġ direzzjonijiet, bl-assistenza ta’ uffiċjali fejn meħtieġ.
Wara x-xogħol tal-Enemalta, il-wiċċ tat-triq se jiġi rranġat fuq il-wisa’ tat-trinka. Dan għaliex il-GHRC mistennija wkoll iwettqu xogħlijiet f’din it-triq fix-xhur li ġejjin, u għalhekk irridu nevitaw kemm jista’ jkun xogħol doppju u ħela ta’ riżorsi pubbliċi.
Triq is-Sajjieda
Fir-rigward ta’ Triq is-Sajjied, il-Kunsill Lokali se jkun qed jingħata avviż ta’ madwar ġimgħa qabel jibdew ix-xogħlijiet tal-Enemalta.
Malli jitlesta x-xogħol tal-Enemalta f’din it-triq, ikun jista’ jitkompla x-xogħol tal-WSC, sabiex ix-xogħlijiet tal-entitajiet differenti jsiru f’ordni u ma jkollniex għalfejn nerġgħu niftħu l-istess triq bla bżonn.
Triq Balbi
Ix-xogħlijiet tal-Enemalta fi Triq Balbi mistennija jibdew wara li tingħalaq it-trinka tax-xogħlijiet tal-GHRC.
Dan kollu qed jiġi kkoordinat sabiex ma jkollniex diversi toroq importanti affettwati fl-istess ħin u sabiex l-aċċess għar-residenti jinżamm kemm jista’ jkun.
Nifhem perfettament li xogħlijiet ta’ din ix-xorta jġibu magħhom inkonvenjent, speċjalment fejn jidħlu parkeġġ, traffiku u aċċess għar-residenzi.
Għalhekk qed ninsisti li jkun hemm koordinazzjoni kontinwa bejn l-entitajiet kollha involuti u li x-xogħlijiet jitlestew bl-aktar mod effiċjenti possibbli.
Bħala Sindku se nkompli nsegwi dawn ix-xogħlijiet mill-qrib u nżommkom aġġornati dwar id-dati, it-tibdil fit-traffiku u kwalunkwe arranġament ieħor hekk kif ikollna aktar informazzjoni kkonfermata.
Grazzi tal-paċenzja u l-koperazzjoni tagħkom.
Luke Farrugia
Sindku tal-Marsa
