31/01/2026
Żejtun qed iħejji ruħu għal ġurnata mimlija kulur, mużika u divertiment hekk kif l-Erbgħa 11 ta’ Frar 2026, mill-5:00pm ’il quddiem, se jittella’ d-Defilé tal-Karnival taż-Żejtun. Dan l-avveniment popolari se jibda minn Misraħ Santa Marija bil-Qarċilla mill-4Jays, żfin mill-iskola ta' M'Skaka u jkompli jdur fit-toroq ewlenin tar-raħal, u jwassal l-atmosfera karnivaleska sal-qalba taż-Żejtun.
Il-programm jinkludi parteċipazzjoni varjata ta’ gruppi taż-żfin, maskeruni, baned u skejjel Primarji A u B taż-Żejtun li flimkien se joħolqu spettaklu sabiħ u adattat għall-familja kollha. Fost l-oħrajn se naraw lil Għaqda Banda Żejtun flimkien mal-Allegrija u bis-sehem tal-karru, Banda Beland kif ukoll diversi studios u kumpaniji taż-żfin li se jagħtu ħajja u enerġija lit-toroq tagħna.
Il-qofol tal-attivitajiet se jkun fis-6:45pm quddiem iz-Zuntier tal-Knisja, fejn se jsir żfin minn ħames kumpaniji differenti, segwit minn preżentazzjoni speċjali minn Veronica u Joe d-Dulli.
Dan l-avveniment qed jiġi organizzat mill-Kunsill Lokali taż-Żejtun, b’inizjattiva tat-Taqsima tal-Kultura, immexxija minn Anton Aquilina. Avveniment li jkompli jsaħħaħ l-ispirtu komunitarju u jagħti spazju lill-kreattività u t-tradizzjoni tal-Karnival fiż-Żejtun. 🎭🎶
