31/12/2025
Эрхэм хүндэт хатагтай, ноёд оо!
Элэг нэгт Монголчууд аа, Эх орондоо болон дэлхийн өнцөг булан бүрт амьдарч буй Монгол ахан дүүс ээ!
Цаг хугацааны хүрд тасралтгүй эргэж, түүхийн хуудас болон үлдэж буй 2025 оноо үдэж, итгэл найдвар, их бүтээн байгуулалт, шинэ тэмүүлэл дүүрэн 2026 оноо Та бид угтан авч байна.
2025 он бол Монголын нийгэм, эдийн засаг, эрүүл мэнд, боловсролын салбарт сорилт ихтэй, гэхдээ сургамж арвин, ирээдүйгээ илүү тодорхой харах боломж олгосон жил байлаа. Бидний өмнө тулгарсан бэрхшээлүүд нь гадаад, дотоод нөхцөл байдлаас үл хамааран зөвхөн ухаалгаар сэтгэж, шинжлэх ухаанд тулгуурлан, хариуцлагатай шийдвэр гаргахын үнэ цэнийг дахин дахин сануулсан он байв.
Хувийн амьдралын хувьд энэ жил бидний хувьд нэгэн шинэ хуудас нээгдлээ. 2025 оны 09-р сард хүү Аргун маань Станфордын их сургуульд элсэн орж, эгч Есүгэнтэйгээ нэгдэн, эрдмийн их аянд дөрөө харшсанаар гэргий бид хоёр үр хүүхдүүдээрээ бахархах сэтгэл дүүрэн байна.
Бизнес болон хөрөнгө оруулалтын салбарт бид олон улсын түвшинд үйл ажиллагаагаа тэллээ. Тухайлбал, манай хөрөнгө оруулалтын сангийн охин компани 2026 онд Америкийн Нэгдсэн Улсад хийгдэх томоохон бүтээн байгуулалтад оролцох үүд хаалгаа нээлээ. Мөн хөрөнгө оруулалтын сангаараа дамжуулан эрүүл мэнд, оношилгооны салбарт хамтарсан шинэ төслийг эхлүүлэх, хиймэл оюун ухаанд суурилсан технологийг дэлхийн зах зээлд гаргах зэрэг томоохон ажлуудын суурийг тавилаа.
Ирээдүй гэдэг бол өөрөө аяндаа ирдэг зүйл биш. Ирээдүйг мэдлэг бүтээж бүтээсэн мэдлэгээ бодит байдалд хэргэлдэг, уйгагүй хөдөлмөрч, өндөр ёс зүйтэй хүмүүс л бүтээдэг. Тиймээс Монголын хөгжил дэвшлийн гол тулгуур нь байгалийн баялаг биш, харин эрдэм мэдлэгтэй, эрүүл саруул, хариуцлагатай хүн юм.
Оном сангийн хувьд 2025 онд эхлүүлсэн болон үргэлжлүүлж буй эрдэм шинжилгээ, эмнэлзүйн судалгаа, нийгмийн эрүүл мэндийн хөтөлбөрүүд маань бодит үр дүнгээ өгсөөр байна. Халдварт болон халдварт бус өвчнөөс урьдчилан сэргийлэх, эрт илрүүлэх, нотолгоонд суурилсан эмчилгээ, үндэсний хэмжээний судалгаануудыг хэрэгжүүлэх чиглэлээр манай эрдэмтэн, судлаач, эмч нарын баг тууштай ажиллалаа. Олон улсын шинжлэх ухааны сэтгүүлүүдэд эрдэм шинжилгээ судалгааны ажлаа олныг хэвлүүлэн гаргав.
Хепатитийн В, С, Д вирүсийн халдвар, тэдгээрээс шалтгаалсан элэгний хорт хавдар, хатууралтай тэмцэх үндэсний зорилтууд маань шинжлэх ухааны бодит үндэслэл дээр урагшилж, Монгол Улс дэлхий дахинд хариуцлагатай, үр дүнтэй жишиг загвар болж байгааг олон улсын хамтын ажиллагаа нотолж байна.
2026 он бол бидний хувьд шинэ шатанд гарч, хийж эхэлсэн ажлаа гүнзгийрүүлж, чанаржуулах жил байх ёстой. Сайн бодлого тасралтгүй хэрэгжиж байж л үр дүн өгдөг. Нэг удаагийн шийдвэр, нэг удаагийн уриа улс орныг өөрчилдөггүй. Харин тууштай, ухаалаг, шинжлэх ухаанд суурилсан үйл ажиллагаа л Монголын ирээдүйг гэрэлтүүлнэ.
Бид улс төрийн хийрхэл, богино ашиг сонирхол, хариуцлагагүй шийдвэрүүдээс болж хүн ардынхаа амь нас, эрүүл мэнд, итгэлийг золиослох ёсгүй. Үнэн зөв мэдлэг, ил тод байдал, мэргэжлийн ёс зүй нийгмийн дархлаа болж байж Монгол улс урагшилна.
Ирж буй 2026 онд:
* Монгол хүн бүр эрүүл энх байж,
* Хүүхэд залуус маань чанартай боловсрол эзэмшиж,
* Эрдэм мэдлэг дээдлэгдэж,
* Хөдөлмөр шударгаар үнэлэгддэг,
* Ирээдүйдээ итгэдэг нийгэм улам бүр төлөвших болтугай.
Бид хамтдаа ухаалгаар зүтгэвэл Монголын ирээдүй заавал гэрэлтэй болно. Бидний эхлүүлсэн ажил, тарьсан үр бүхэн Монгол хүний сайн сайхны төлөө соёолон ургах болтугай!
Ирж буй шинэ онд Та бүхэндээ эх нутагтаа элэг бүтэн, эрүүл энх, сэтгэл тэнүүн, ажил үйлс нь өөдрөг байхыг хүсэн ерөөе.
Шинэ он, шинэ жилийн мэнд хүргэе!
Гүнээ хүндэтгэсэн,
Оном сангийн Төлөөлөн удирдах зөвлөлийн дарга Шинжлэх ухааны доктор, биофизикч Оном овогтой Дашдоржийн Наранбаатар
2025 оны 12 сарын 31
