27/09/2025
"FDI WORLD DENTAL CONGRESS 2025" - ДЭЛХИЙН ШҮДНИЙ ХОЛБООНЫ ХУРАЛ БОЛЛОО.
МШМХ (Монголын шүдний мэргэжилтнүүдийн холбоо)-ны төлөөллүүд 2025 оны 9 сарын 9-12-нд БНХАУ-ын Шанхай хотод зохион байгуулагдсан FDI Дэлхийн Шүдний Холбооны ээлжит хуралд оролцлоо. Энэхүү хурал нь жилд зохион байгуулагддаг хурлуудаас хамгийн чухал үйл ажиллагаа бөгөөд энэ удаад 150 орны төлөөлөл 35 000 гаруй шүдний мэргэжилтнүүд оролцов.
Уг хурлын үеэр FDI Дэлхийн Шүдний Холбооны УЗ гишүүд сонгох сонгууль болж, эрдэм шинжилгээний хурлууд болон салбарын үзэсгэлэн яармаг зохион байгуулагдаж өндөрлөлөө.
УЗ гишүүдийг сонгох үр дүнгээс танилцуулахад:
📍 2025 – 2027 онуудад Холбооны ерөнхийлөгчийн албан тушаалд Болгар улсын Asst.Prof. Nikolai Sharkov
📍 President-elect буюу түүний дараагийн ерөнхийлөгчийн албан тушаалд БНСУ-ын Prof. Yong Guk Park тус тус сонгогдов.
Мөн 2025 онд алба нь дуусч байгаа гишүүдийн дахин болон шинэ гишүүд сонгох сонгууль болов. Үүнд:
- Treasurer (Нярав)
- Council member (Зөвлөлийн гишүүн)
- Standing committee (Байнгын хороо)
- Membership Liaison & Support committee (Гишүүнчлэл болон дэмжих хороо)
- Dental Practice committee (Шүдний эмчилгээ хариуцсан хороо)
- Education committee (Боловсролын хороо)
- Science committee (Шинжлэх ухаан хариуцсан хороо)-ны гишүүдийг сонголоо.
Жил бүрийн 3 сарын 20-ны өдөр Дэлхийн амны хөндийн өдөр тохиодог ба 2026 оны тус өдрийн уриа үгийг “Happy mouth is a Happy life” буюу “Эрүүл ам – Эрүүл амьдрал” болгохоор шийдвэрлэв.
FDI-н ээлжит хурлаар дараах 9 бодлогын чанартай асуудлыг авч хэлэлцлээ:
1️⃣ Caries management with Silver Diamine Fluoride
Шүд цоорлын өвчлөлөөс урьдчилан сэргийлэх идэвхитэй бөгөөд зардал багатай арга нь цоорол зогсоох түрхлэг юм. Цоорол зогсоох түрхлэгийг ялангуяа сүүн шүдэн дээр цоорлын хөндий паалан болон тугалмайн түвшинд байгаа тохиолдолд хэрэглэхийг зөвлөдөг. Энэ түрхлэг нь нянгийн эсрэг үйлчлэлтэй бөгөөд шүдийг дахин эрдэсжүүлэхэд мөн оролцдог. Уг түрхлэгийг хүүхдийн сүүн шүдэнд, өндөр настай хүмүүст болон шүдний цогц эмчилгээ авах боломжгүй хөгжлийн тусгай хэрэгцээт хүмүүсийн шүдний цоорлыг зогсоох зорилгоор хэрэглэж болохыг зөвлөж байна. Цоорол зогсоох түрхлэг нь шүдний гадаргууг харлуулах учраас хэрэглэхээс өмнө өвчтөндөө зайлшгүй энэ талаар тайлбарласан байх ба өвчтөн зөвшөөрсөн байх ёстой.
2️⃣ The use of Topical Fluoride for Caries Prevention
1970 оноос хойш фтортой шүдний оо хэрэглэх нь шүд цоорлын өвчнөөс урьдчилан сэргийлэх ач холбогдолтойг дурьдсаар байгаа билээ. Ялангуяа шүдний оонд 1000-1100ppm фтор агуулагдах нь шүд цоорлын өвчнөөс урьдчилан сэргийлэх, зогсоох болон эмчлэх ач холбогдолтой нь судалгаагаар батлагдсан. Шүдээ өдөрт багадаа өглөө болон орой унтахын өмнө 2 удаа 2 минутаар угаахыг зөвлөдөг. Ингэхдээ шүдний оо түрхэснээс хойш амаа усаар зайлахгүйгээр угаах хэрэгтэй гэж үздэг. Мөн өвчтөний шүд цоорох эрсдлийн түвшингээс хамаарч жилд 1-4 удаа фторт түрхлэг, гелийг шүдний эмнэлэгт түрхүүлэхийг зөвлөдөг. Хүүхдийн эхний шүд цухуйснаас эхлээд насан туршид фторт оогоор угаах шаардлагатай. FDI Дэлхийн Шүдний Холбооноос улс орны удирдлагуудад хандаж фтортой шүдний оо хэрэглэхийн ач холбогдлыг 10 жилийн сургуулийн сурагчдад таниулах, фтортой ооноос авах татварыг бууруулахыг санал болгож байна.
3️⃣ Electronic Health Records
Нэгдсэн цахим эрүүл мэндийн бүртгэл нь эмнэлгийн болон шүдний салбарыг багтаасан, тухайн хүний бүх эрүүл мэндийн мэдээллийг багтаасан цогц бүртгэл юм. Давуу тал нь эрүүл мэндийн тусламж үйлчилгээг харилцан уялдуулж, тасралтгүй байх боломжийг бүрдүүлэн өвчтөний эрүүл мэндийн талаарх иж бүрэн, цогц дүр зургийг гаргаж өгөх боломжтой болох юм.
4️⃣ Alignment of oral health care with ISO Standards
FDI Дэлхийн Шүдний Холбоо болон ISO/TC 106 нь амны хөндийн эрүүл мэндийг сайжруулах, шүдний салбарын стандартыг боловсруулж, оновчтой тусламж үйлчилгээг явуулахыг дэмжих ижил зорилготойгоор ажилладаг. Энэ нь ISO/TC 106-ийн хүрээнд хамаарах баримт бичгийн боловсруулалт, ашиглалтыг дэмжих тухай бодлого юм.
5️⃣ Digital Dentistry
Дэлхий нийтээр амны хөндийн тусламж үйлчилгээ үзүүлэхэд дижитал технологи руу хурдацтай шилжиж, хөгжүүлж байгаа билээ. Дижитал технологи нь амны хөндийн эрүүл мэндийг хянах, өвчлөл болон эрсдэлийг илрүүлэх, өвчтөнд мэдлэг олгох болон алсын зайны тусламж үйлчилгээ үзүүлэхэд хэрэглэгдэж байна. Дижитал технологийн гол зорилго нь амны хөндийн тусламж үйлчилгээний чанар, аюулгүй байдал, үр ашгийг нэмэгдүүлэхэд оршино.
6️⃣ Noma – eradicating a preventable disease to save lives
Нома нь халдварт бус, амны хөндийн үхжилтэт үрэвсэлт өвчин бөгөөд ядуу буурай орны хүмүүст тохиолддог ба Африк тивд ихэнх тохиолдол бүртгэгддэг. Энэхүү өвчнөөс урьдчилан сэргийлэх бүрэн боломжтой. Олон улсад эмч мэргэжилтнүүдийн дунд номагийн талаарх мэдлэг, ойлголтыг нэмэгдүүлэх замаар өвчнийг эрт илрүүлэх, цаг алдалгүй эмчлэхийг уриалж байна.
7️⃣ Advertising in Dentistry
Нүүр ам судлалын салбар дахь сурталчилгаа нь шүдний мэргэжилтнүүдийн мэргэжлийн ёс зүй болон нийгмийн үнэлэмжинд нөлөөлөх боломжтой. Эмчилгээ үйлчилгээтэй холбоотой сурталчилгааг өвчтөн болон олон нийтийн эрүүл мэндийг хамгаалж, нотолгоонд суурилсан, эмчилгээний үр дүнг нарийн бөгөөд үнэн зөв, гуйвуулалгүй танилцуулж, мэргэжлийн ёс зүйг чанд баримталж, мэргэжлийн нэр хүндийг унагаалгүй, хууль дүрмийн дагуу хийх хэрэгтэй. Өвчтөнөөс заавал зөвшөөрөл авч сурталчилгаанд оруулах ёстой.
8️⃣ Specialization in Dentistry
Шүдний салбар нь шинэ технологи, шинжлэх ухааны дэвшил, эмчилгээний шинэ арга барил, мөн мэргэжлийн тусгай тусламжийн эрэлт нэмэгдэж байгаатай холбоотой хурдтай өөрчлөгдөж байна. Энэхүү бодлогын хүрээнд шүдний салбар дахь мэргэжлийн чиглэлүүдийн тодорхойлолт, зохицуулалт болон үүргийг хөндсөн.
9️⃣ The Role of Supervision in Dentistry
Энэхүү бодлогын бичиг баримт нь өвчтөнд үзүүлэх тусламжийг аюулгүй хүргэхийн хажуугаар эмчилгээ үзүүлж буй багийн гишүүдийг тасралтгүй мэргэжлийн сургалт, хөгжилд дэмжлэг үзүүлэх зорилготой хяналт тавих тухай юм.
FDI Дэлхийн Шүдний холбооны вэбсайтаар орж илүү дэлгэрэнгүй мэдээлэл авах боломжтой: https://www.fdiworlddental.org/
