25/03/2026
ЭМГЭНЭЛ🕊️🙏
Монгол Улсын спортын салбарын нэрт зүтгэлтэн, Уулын цанын Олон улсын хэмжээний мастер, Уулын спортын Олон улсын хэмжээний мастер, Тэшүүрийн спортын мастер, Дугуйн спортын мастер ахмад тамирчин Доржготов овогтой Чагнаа агсны гэгээн дурсгалд гүн эмгэнэл илэрхийлж байна.
Доржготовын Чагнаа нь Булган аймгийн Сайхан сумын харьяат бөгөөд 1942 оны 3 дугаар сарын 15-ны өдөр төрсөн. Тэрбээр залуу наснаасаа спортод дурлан, дугуй, тэшүүр, уулын болон Адал явдалт явган аялал зэрэг олон төрөлт спортын чиглэлээр тасралтгүй хичээллэж, Монголын спортын хөгжилд үнэтэй хувь нэмэр оруулсан эрхэм хүн байлаа.
Тэрээр 1981 онд спортын мастер цол хүртэж, улмаар олон улсын хэмжээний мастер болж, эх орныхоо нэрийг олон улсын тэмцээн уралдаанд өндөрт өргөж явсан шилдэг тамирчин байсан юм. Монголын багийн тамирчны хувиар олон тэмцээнд амжилттай оролцож, шагналт байр эзэлж, нэр хүндтэй шагнал урамшууллуудаар шагнагдсан.
Чагнаа агсан нь зөвхөн тамирчин байгаад зогсохгүй, чадварлаг дасгалжуулагч, удирдагч байж, олон шавь бэлтгэн гаргасан. Түүний шавь нар улсын болон олон улсын тэмцээнд амжилт гаргаж, багшийнхаа нэрийг алдаршуулж явна.
🎿⛷️🧗♂️🏔️🏕️
Мөн уулын спорт, хаданд авиралт, дугуй, тэшүүр, Адал явдалт явган аялал зэрэг олон төрлийн спортыг эх орондоо хөгжүүлэхэд үнэтэй хувь нэмэр оруулсан юм.
Түүний хөдөлмөр зүтгэлийг төр засаг өндрөөр үнэлж, төрийн болон салбарын шагналуудаар шагнасан бөгөөд “Алтан од”, спортын салбар үүсэж хөгжсөний 100 жилийн ойн медаль Хөдөлмөрийн гавъяаны улаан тугын одон зэрэг олон шагналын эзэн байлаа.
Доржготовын Чагнаа агсан нь Монгол Улсын иргэдийн бие бялдар, эрүүл мэндийг дэмжих, залуу үеийг спортоор хичээллүүлэх үйлсэд бүхий л амьдралаа зориулсан, хөдөлмөрч, тууштай, эх оронч хүн байв.
Түүний гэгээн дүр төрх, хийж бүтээсэн үйл хэрэг нь бидний сэтгэл зүрхэнд үүрд хадгалагдан үлдэх болно.
Талийгаачийн гэр бүл, үр хүүхэд, төрөл төрөгсөд, хамтран зүтгэгчдэд нь гүн эмгэнэл илэрхийлье.
⸻
Монголын Цанын Холбоо
