22/09/2025
ЭРҮҮЛ МЭНДИЙН ӨДӨРЛӨГ-2025.09.20 өдөр амжилттай зохион байгуулагдлаа.
“Монгол улсад хүүхэд өсвөр үеийнхний целиакийн оношилгоо болон эмчилгээг сайжруулах” төслийн хүрээнд целиак өвчнийг таниулах, ард иргэдэд зөв, цэгцтэй мэдлэг олгохыг зорьсон бөгөөд энэхүү өдөрлөгт урилгаар АУ-ы доктор профессор, Хүний гавьяат эмч, МЯЭ-ийн Зөвлөх эмч , Монголын целиакийн холбооны хүндэт гишүүн Н.Бира, АШУҮИС, АУС, ХБЭСТэнхимийн эрхлэгч Анагаах ухааны доктор, хүндэт гишүүн Ц.Бямбажав, ЭХЭМҮТөвийн ХБЭСТ-ийн эмч Б.Мандуул, ШУТИС-ийн доктор, дэд профессор хоол зүйч багш М.Пүрэвжав, АУ-ы доктор, АШУҮИС, АУС, ХБЭС-ын тэнхимийн ахлах багш, МЯЭ-ийн Дурангийн тасгийн эрхлэгч, хүндэт гишүүн Г.Сарантуяа, Улсын 2-р төв эмнэлэгийн ХБЭС-ын тасгийн эмч С.Мягмаржаргал, Улсын 1-р төв эмнэлгийн ХБЭС-ын тасгийн эмч Д.Ариунзул, Улсын 3-р төв эмнэлгийн ХБЭС-ын тасгийн эмч А.Хас, Ж.Мөнхжин, нийслэлийн 157-р цэцэрлэгийн эрхлэгч Ж.Болортуяа, Басархан цэцэрлэгийн эрхлэгч Ж.Наран, УИХ-ын гишүүн Ж.Золжаргалын зөвлөх, ажлын албаны дарга Г.Золбоот, Евростандарт лабораторийг төлөөлөн Х.Надмид нар хүрэлцэн ирж оролцлоо.
Төслийн хүрээнд нийслэлийн 157-р цэцэрлэг болон Басархан хүүхдийн цэцэрлэгүүдийг өргөмжлөх үйл ажиллагаа боллоо. Энэ нь глютенд мэдрэмтгий хүүхдүүдийн онцлог хэрэгцээг ойлгож, тэдний эрүүл, аюулгүй, зохистой хооллолтыг хангах үйлсэд өөрсдийн хувь нэмрээ оруулж буйд нь талархаж хүүхдэд ээлтэй байгууллагаар өргөмжлөв. Целиактай хүүхдүүд цэцэрлэгт явах боломжийг олгож байгаад баярлалаа. Бид цаашид улсын болон хувийн цэцэрлэг, сургуулиудтай хамтран ажиллаж эрүүл мэндийн зөв ойлголтыг хүргэж энэхүү ажлыг улам өргөжүүлэхийг зорьж байна.
Өдөрлөгт 140 орчим хүн ирсэн бөгөөд глютенгүй бүтээгдэхүүн үйлдвэрлэгчид, лактозгүй сүүний үйлдвэр болон эрүүл чанартай хүнс импортлогч байгууллагын төлөөлөл хүрэлцэн ирж ирсэн зочдод өөрсдийн бүтээгдэхүүнээ танилцууллаа.
Мөн эрүүл мэндийн өдөрлөгийг зохион байгуулахад тохитой, тухтай орчинг бэлдэж өгсөн Ц.Баярмаа захиралтай Техник Технологийн Их Сургуулийн хамт олондоо талархаж байна. Тус сургуулийн хоол үйлдвэрлэлийн ангийн оюутнууд сайн дурын ажилд оролцож дэмжин ажиллалаа.
Монголын целиакийн холбоо нь:
Целиактай хүүхэд болон насанд хүрэгчдийг
• эрт оношлон мэдэх, эрүүл мэндийн үзлэгт хамруулах
• зөв хооллолт, баталгаатай хүнсний бүтээгдэхүүн хэрэглэх
• хэвийн өсөлтөнд анхаарч, бие бялдрыг чийрэгжүүлэх
• мэргэжлийн эмчийн зөвлөгөө авч хяналтанд байх
• хүнсний бүтээгдэхүүний сургалт гэх мэт тэдэнд хамааралтай нийгмийн бусад олон асуудлууд дээр анхаарч, зөв мэдлэг мэдээллээр хангахыг зорьж энэхүү төслийг ХБНГУ-ын Баден-Вюрттемберг мужийн засгийн газрын санхүүгийн дэмжлэгтэйгээр Баден-Вюрттембергийн хөгжлийн хамтын ажиллагааны сангаар дамжуулан ХБНГУ-ын Штутгарт хот дахь Монголын харилцаа, хамтын ажиллагааны холбоо, Герман дахь эрүүл мэндийн салбар зөвлөл болох эмч, эмнэлгийн ажилчдын Монмедекс групп болон Монголын Целиакийн холбооноос хамтран гүйцэтгэж байна.
