27/04/2026
БОРДООНЫ ТУХАЙ ТОВЧХОН ...
За ер нь өнгөрсөн өвөл зүгээр суусангүй, органик бордоо, байгалын гаралтай эрдэс гээд олон түүхий эд хаягдлыг бордоо болгон ашиглах, тариалангийн үйлдвэрлэлийн орц бордооны өөрийн өртгийг багасгах, импортын бордоог орлох агуулга найрлагыг бүрдүүлэх, нийлүүлэгчдийн үнэтэй бордоотой үнийн хувьд өрсөлдөх үнэ цэн байгал дээр эргэн тойронд минь хаана байна гэж салбарын мэргэжилтний хувьд судалж ажиллалаа.
Цаашлаад, ясны бордооны үйлдвэрийн удирдлагатай хэд хэд уулзалдаж кальци, фосфор агуулсан үнэ цэнтэй бордоо хийж байгаа ажлыг нь дэмжиж илтгэл хийж өгч, Ерөнхийлөгчийн тамгын газрынханд мөн чанарыг нь тайлбарлаж танилцуулга хийлээ. Танилцуулга илтгэлээ зургаар дор орууллаа.
Арьс ширний үйлдвэрийн удирдлагатай уулзалдаж харин бид өөрсдөө тэднээс их зүйл сурав. Турк, Итали гээд үнэхээр гоё технологиуд олж судлаад, оруулж ирээд арьс ширний хаягдлыг бордоо болгох ажил дээр туршиж судлах, батлах нотлох ажлыг хийхээр ярилцлаа. Угтаан бол бордоог туршаад байдаггүй, найрлагыг нь үзээд агрономч газар дээр нь ургамал болон зорилгодоо тохируулан бордооны нормыг тооцдог юм байгаан, гэхдээ дүрэм журам, зөвшөөрөл гэж олон алхмын цаана хийсэн бордоогоо борлуулах нөр олон алхмыг яалтай билээ. Нөгөө талаас, энэ гоё дахин боловсруулах ажилд оролцож буйдаа баяртай байна.
Бүүр цаашлаад, байгалын эрдэс иллит, монтмориллинит, гөлтгөнийн уурхайнуудтай холбоо барьж тариалангийн салбарт татаж оруулан түүхий эдийг нь бордоо болгох талаар ярьж, сошиал орчинд бичиж явтал постыг маань үзсэн таньдаг нэгэн захирал дуудаж уулзаад, нэг хоёр уулзав уу үгүй юу ... ямар ч хурдан хөдөлгөөнтэй юм, ямар ч түргэн шуурхай шийдэж, ямар ч том ажлуудыг гялалзуулдаг юм ... байгалын эрдсээр бордоо хийх үйлдвэр худалдаж аваад өнөө маргаашгүй эхлүүлэх болчихсон сайхан мэдээг би яалаа гэж дарж суух вэ.
Байгал дээрээс хажууханд байдаг эрдсүүдийг урд хойно хөршөөсөө аваад байхгүйгээр бордоо болгоод таримлаа бордож, хөрсөө сайжруулах том алхам шүү дээ.
Яг ийм сайхан цаг үед Геологийн салбарынхан тариалангийн салбарт зориулан төсөв тавьж, хүнс хоол хөрсний эрдсээс л ундран ирдэг гэдгийг ойлгон мэдэрч, тариалангийн бүх талбайн хөрсний эрдэс хэмхдэс, геохимийн шинжилгээг хийж, хөрсийг олон улсын ангиллаар ангилан, хээрийн үнэлгээг хийхээр төлөвлөж, хөрс судлалын салбарт үсрэнгүй хөгжил орж ирэх болсон байна шүү. Монгол улсад хөрсний эрдсийн судалгааны ажлын цар хүрээ үүгээр маш том алхам хийх гэж байна даа..
Бордоо ба хөрсний талаар ойрын сонин иймэрхүү, өнтэй өвөл дуусаж, хавар цаг ирэн хөрст дэлхий сааралтаж байснаа ногоорох тийш хандлаа. Хөрс судлалын салбар ч хөгжиж дэвшиж байгааг харахад сайхан байна.
Та бүхний маань бордооны сонголт мэргэн байж, ургамлын ургах гэсэн тэр л хүч энергийг нь дэмжин ажилладаг ургуулах их үйлсдээ амжилт гарган арвин их ургац авахыг ерөөе өө.
