ММСУХ-Монголын Морин Спорт, Уяачдын Холбоо

15/04/2026

15/04/2026

Уралдаанч хүүхдийг хурдан морины уралдаан, сунгаа, үсэргээнд оролцуулахдаа эцэг, эх, асран хамгаалагчийн бичгээр зөвшөөрлийг авч, нотариатын цахим системд бүртгэн баталгаажуулах шаардлагыг мөрдөж эхэллээ.

Иймд уяачид та бүхэн холбогдох хууль, журмыг мөрдөж, зөвшөөрлийг албан ёсоор баталгаажуулахыг анхаарна уу. Мөн уралдаанч хүүхдийг даатгалд хамруулж, иж бүрэн хамгаалалтын хувцас, хэрэгслээр ханган үсэргээ, сунгаанд оролцуулахыг уриалж байна.

03/04/2026

Монголын Морин Спорт, Уяачдын Холбооны аймаг, нийслэлийн салбар холбоодын 2026 онд зохион байгуулагдах бүсийн хурдан морины уралдаануудын хуваарь

02/04/2026

Монголын Морин Спорт, Уяачдын Холбоо-ны нэрэмжит “ДҮНЖИНГАРАВ-2026” хаврын хурдан морины уралдаан 2026 оны 05 дугаар сарын 01-ний өдөр Хүй долоон худаг, Цагаан хөтөлд зохион байгуулагдана. Тус уралдаан ИХ НАС, СОЁОЛОН, СОНГОМОЛ ДУНД насны ангиллаар зохион байгуулагдах бөгөөд уяачид, морь сонирхогч та бүхнийг өргөнөөр оролцохыг урьж байна.

Жич: “ДҮНЖИНГАРАВ-2026” хаврын хурдан морины уралдаан нь улсын бүсийн зэрэглэлгүй болно.

Үндэсний их баяр наадмын тухай хуулийн 10 дугаар зүйлийн 10.18-д “Засгийн газрын шийдвэрээр нэгэн зэрэг дөрөв хүртэл бүсэд хурдан морины шигшмэл, бүсийн уралдааныг зохион байгуулна” гэж заасныг үндэслэн Монголын Морин Спорт, Уяачдын Холбооны Тэргүүлэгчдийн 2026 оны 01 дүгээр сарын 13-ны өдрийн хуралдаанаар аймаг, салбар холбоодоос ирүүлсэн “Улсын чанартай бүсийн хурдан морины уралдааныг орон нутагт зохион байгуулах тухай” саналуудыг хэлэлцэн бүсийн хурдан морины уралдааныг дараах аймгуудад 2026 оны 07 дугаар сарын 24-26-ны өдрүүдэд тус тус зохион байгуулах саналыг Монгол Улсын Засгийн газарт уламжилсан билээ. Үүнд:
• Говийн бүс – Дундговь аймаг
• Зүүн бүс – Сүхбаатар аймаг
• Баруун бүс – Завхан аймаг
• Төвийн бүс – Сэлэнгэ аймаг

Иймд дээрх хуулийн заалт болон бүсийн уралдаануудын зохион байгуулалтын хүрээнд Монголын Морин Спорт, Уяачдын Холбооны “ДҮНЖИНГАРАВ-2026” хаврын хурдан морины уралдаан нь бүсийн уралдааны ангилалд хамаарахгүй ММСУХ-ны нэрэмжит уралдаанаар энэ жил зохион байгуулагдах юм.

Хэрэв “ДҮНЖИНГАРАВ-2026” хаврын уралдааныг Засгийн газрын шийдвэртэй бүсийн уралдаан болгох тохиолдолд дээр дурдсан дөрвөн бүсийн уралдааны аль нэг нь хуулийн дагуу зохион байгуулагдах боломжгүй болох нөхцөл үүсэхийг анхаарна уу.

Иймд эрхэм хүндэт уяачид Та бүхэн хуулийн холбогдох заалтыг зөвөөр ойлгон, дээрх нөхцөл байдлыг харгалзан үзэхийг хүсье.

Монголын Морин Спорт, Уяачдын Холбоо

31/03/2026

🐎 СЭТГЭЛИЙН ХАНДИВЫН УРИАЛГА 🐎

Өвөрхангай аймгийн Уянга сумын харьяат, Аймгийн алдарт уяач Цэрэнгийн Пүрэвжав нь 1968 онд төрсөн бөгөөд 1989 оноос хойш хурдан хүлгээ сойн уяж, залуу хойч үедээ мэдлэг туршлагаа харамгүй хуваалцсаар ирсэн эрхэм хүмүүн билээ.

Тэрээр аймаг, бүсийн уралдаанд 17 түрүү, 50 гаруй айраг, сум болон бусад наадмаас 200 гаруй түрүү айраг хүртсэн бахдам амжилтын эзэн юм.

Харамсалтай нь Пүрэвжав нь сахарын өвчинтэй 8 жилийн турш тэмцэж, улмаар бөөрний архаг дутагдал гэсэн оноштой болсон тул Турк улсад бөөр шилжүүлэн суулгах яаралтай хагалгаанд орох шаардлагатай болоод байна.

Хагалгааны нийт зардалд 198,000,000 төгрөг шаардлагатай байгаа тул Монголын Морин Спорт, Уяачдын Холбооноос моринд хайртай ард түмэн, нийт уяачид та бүхнийг энэхүү хандивын аянд нэгдэж, сэтгэлийн дэм үзүүлэхийг уриалж байна.

🙏 Сайн үйлс дэлгэрэх болтугай 🙏

💳 Хандивын данс: Хаан банк
IBAN: 690005005563003957
Нэр: Пүрэвжав

Нэгнийгээ гэсэн сэтгэл, нэгдмэл хүчээр элэг нэгт уяачдаа дэмжицгээе!

22/03/2026

НАРНЫ БАЯР – НАУРЫЗЫН БАЯРЫН МЭНД ХҮРГЭЕ.

Өвлийн хүйтнийг өнтэй давж, урин хавартай золгосны бэлгэдэл, Казах түмний түүхэн уламжлалт “Наурызын баяр”-ын мэндийг хүргэе! 🌞🦅

Эрхэм хүндэт Казах түмэн Та бүхэн Наурыз баяраа хотол олон, ахан дүүсээрээ амар мэндийн учралтай, өргөн дэлгэр сайхан тэмдэглээрэй.

Наурыз мерекелеріңіз құтты болсын!
Ұлыс оң болсын, ақ мол болсын. 🌷🪕

Монголын Морин Спорт Уяачдын Холбоо

18/03/2026

Монголын Морин Спорт, Уяачдын Холбоо-ны 30 жилийн ой, “Их хурд-Х” уралдааны журмын дагуу нийт уяачдын эрх ашгийг хангах үүднээс дахин хэмжилтийг явуулахад Монголын Морин Спорт, Уяачдын Холбоо-ны тэргүүлэгч гишүүн, Говь-Алтай аймгийн Халиун сумын уугуул, “Их хурд-Х” уралдааны ерөнхий ивээн тэтгэгч, 300 сая төгрөгийн хандивлагч Г.Чинзоригийн Дөлгөөн халтар морь их насны ангилалд сэрвээний дахин хэмжилтээр морины хариуцаж хөтлөж ирсэн эзнийг байлцуулж стандарт хэмжил зүйн газраар баталгаажуулсан төхөөрөмжөөр үр дүн 141.6 см гэж заагдан хасагдсан бөгөөд нийт уяачдыг үзэл бодлоо чөлөөтэй илэрхийлэхийг уриалж байна.

#ШударгаУралдаан #НийтУяачдынЭрхАшиг

Спортын Арбитрын шүүхийн шийдвэр гараагүйг анхаарна уу.

18/03/2026

ЭМГЭНЭЛ

БАТ-ОЧИРЫН ЦЭРЭНБАЛТАВ
(1953–2026)

Сүхбаатар аймгийн Баяндэлгэр сумын уугуул, Монгол Улсын Алдарт уяач, Монгол Улсын Гавьяат хуульч Бат-Очирын Цэрэнбалтав таалал төгссөнд Монголын Морин Спорт, Уяачдын Холбооны хамт олон, нийт уяачдын нэрийн өмнөөс гүн эмгэнэл илэрхийлье.

Тэрбээр 2009 оноос тус холбооны тэргүүлэгч гишүүнээр, 2024 оноос Сахилгын зөвлөлийн гишүүнээр ажиллах хугацаандаа морин спортын хөгжил дэвшил, үндэсний хурдан морины уралдааны ёс жаяг, дүрэм журам, хууль эрх зүйн орчныг боловсронгуй болгоход үнэтэй хувь нэмэр оруулсан, алсын хараатай, зарчимч, шударга эрхэм байлаа. Холбооны үйл ажиллагаанд чин сэтгэл, итгэл үнэмшлээрээ тууштай зүтгэж, монгол адууны соёл, уяачдын нэр төрийг хамгаалан бэхжүүлэх, хурдан морины уралдааны хөгжлийг дэмжихэд өөрийн мэдлэг, туршлагаа харамгүй зориулсан нь бидний сэтгэлд үүрд тодхон үлдэх болно.

Мөн тэрбээр шударга ёсыг дээдлэн сахиж, зөвийг дэмжин, бурууг засахын төлөө тууштай зогсож, холбооны нэр хүнд, үнэт зүйлсийг хамгаалан ажилласан нэр хүндтэй эрхэм хүмүүн байсан юм.

Түүний уясан хурдан хүлгүүд улс, бүсийн уралдаанд удаа дараа айраг, түрүү хүртэж, удамт хурдан хүлгүүдийг тодруулан гаргасан нэрт уяач байсныг бид бахархан дурсан санаж байна.

Бат-Очирын Цэрэнбалтав агсны гэгээн дүр, үнэнч шударга зан чанар, Монгол түмний уламжлалт өв соёлыг эрхэмлэн дээдэлсэн үйл хэрэг нь бидний зүрх сэтгэлд үүрд мөнхөд орших болно.

Талийгаачийн гэр бүл, үр хүүхэд, төрөл төрөгсөд, анд нөхдөд гүн эмгэнэл илэрхийлье.

МОНГОЛЫН МОРИН СПОРТ, УЯАЧДЫН ХОЛБОО

18/03/2026

Орчин цагийн Зэвсэгт хүчин үүсэн байгуулагдсаны түүхт 105 жилийн ой, Монгол цэргийн баярын мэндийг өргөн дэвшүүлье.

Монголын Морин Спорт, Уяачдын Холбоо

12/03/2026

МОНГОЛЫН ҮНДЭСНИЙ ОЛИМПЫН ХОРООНЫ IX ЧУУЛГАН ЭХЭЛЛЭЭ

Монголын Үндэсний Олимпын Хорооны IX чуулган өнөөдөр эхэллээ. Чуулганд оролцвол зохих 171 гишүүнээс 136 нь хүрэлцэн ирснээр чуулган албан ёсоор нээлтээ хийв.

Тус чуулганд Монголын Морин Спорт, Уяачдын Холбоо Монголын Үндэсний Олимпын Хорооны гишүүн байгууллагын хувиар оролцож байгаа бөгөөд ММСУХ-ны Ерөнхийлөгч Д.Дагвадорж оролцож байна.

Чуулганы үеэр Монголын спортын салбар, олимпын хөдөлгөөний цаашдын үйл ажиллагаа, хамтын ажиллагааны талаар хэлэлцэх юм.

11/03/2026

Монголын Морин Спорт, Уяачдын Холбоо хурдан морь уралдаанч хүүхдийн хамгаалалтын хувцас, хэрэгслийн стандартыг шинэчлэх ажилтай холбогдуулан хамгаалалтын хувцас, хэрэгсэл импортлон оруулж ирдэг болон худалдаалдаг байгууллага, хувь хүмүүстэй уулзалт зохион байгуулах тул дээрх чиглэлээр үйл ажиллагаа явуулдаг байгууллага, хувь хүмүүс дараах дугаараар холбогдоно уу.

Утас: 8807-3024

08/03/2026

Монголын Морин Спорт Уяачдын Холбооноос Монголынхоо нийт эрхэмсэг бүсгүйчүүд болон хурдан хүлгийн уяа сойлго, уяачдын үйл хэрэгт бат ар тал түшиг тулгуур нь болж явдаг уяачдын гэргий нар, уяач эмэгтэйчүүд, морь сонирхогч охид бүсгүйчүүд Та бүхэндээ Олон улсын эмэгтэйчүүдийн эрхийг хамгаалах өдрийн халуун мэндийг өргөн дэвшүүлж байна.

Монгол түмний бахархалт өв соёл, хурдан хүлгийн уяа сойлгын үйл хэрэгт Та бүхний оролцоо, хичээл зүтгэл, ухаан тэвчээр, халуун сэтгэл үнэлж баршгүй хувь нэмэр болсоор ирсэн билээ. Уяачдын амжилт бүтээлийн ард гэр бүлийн халуун дулаан уур амьсгал, эхнэр гэргий, ээжүүдийн түшиг, эмэгтэйчүүдийн нөр их хөдөлмөр оршдог.

Иймд моринд хайртай, өв соёлоо дээдэлдэг Та бүхэндээ эрүүл энх, аз жаргал, амжилт бүтээлийн дээдийг хүсэн ерөөж, өрх гэр тань баяр хөөрөөр дүүрэн байхын ерөөлийг өргөн дэвшүүлье.