27/08/2020
МХЗЭ-ийн ахмадын мэндчилгээ
Өнөөдөр монголын залуучуудын өдөр. Залуучуудын байгууллагын үе үеийн удирдах ажилтнууд, гишүүд, дэмжигчид болон нийт залуучууддаа Монгол улсад Залуучуудын байгууллага үүсэн хөгжсөний 99 жилийн ойн өдрийн мэндийг дэвшүүлье!
Монголын үндэсний эх орончдын мятаршгүй тэмцлийн үр дүнд манай монголд ялсан 1921 оны Ардын хувьсгалын дараахан нь их жанжин Д.Сүхбаатар, Х.Чойбалсан нарын санаачлагаар манай улсад анхны залуучуудын байгууллага “Бошгыг халах залуучуудын эвлэл” нэртэйгээр үүсэн бий болсон билээ. Ардын Хувьсгал бол харийн булаан эзлэгчдийг эх орноосоо хөөн зайлуулж эрх чөлөө, тусгаар тогтнолын төлөө тэр үеийн залуу эх орончдын хурц ширүүн тэмцлийн үр дүн байсан. Анхны залуучуудын байгууллагыг үүсгэн байгуулагчид нь Ардын хувьсгалыг маналайлагчдын нэг хэсэг нь байсан бөгөөд тэд монголын залуучуудын ууган байгууллага болох Монголын Хувьсгалт Залуучуудын Эвлэлийг байгуулалцсан билээ.
Монголын Хувьсгалт Залуучуудын Эвлэл нь улс орныхоо тусгаар тогтнолыг хамгаалах, монгол улсыг аж үйлдвэр, хөдөө аж ахуйн орон болгон хөгжүүлэх, соёлын довтолгоог өрнүүлэх, атар газар эзэмших, шинэ хот суурин, үйлдвэр завод байгуулах үйл хэрэгт маналайлан оролцохын хамт монголын нийт ард түмнийг соён гэгээрүүлэх, залуу үеийнхнийг ахмад үеийн эх оронч, хөдөлмөрч уламжлалаар төлөвшүүлэн хүмүүжүүлэх үйлст онцгой үүрэг гүйцэтгэсэн учраас МХЗЭ-ийг Монгол төрөөс 6 одонгоор шагнасан билээ.
Монголын Хувьсгалт Залуучуудын Эвлэлийн олон арван ажилтан өнөөдөр ч төр, нийгэм, эдийн засгийн олон салбарт нэр төртэй ажиллаж явааг тэмдэглэхэд таатай байна.
Энэ онд болсон Улсын Их Хурлын ээлжит сонгуулиар эрдэм чадвар төгс, өндөр боловсролтой олон залуу төрийн түшээдээр сонгогдсонд талархаж, улс орноо хөгжүүлэхэд үнэтэй хувь нэмрээ оруулна гэдэгт МХЗЭ-ийн ахмад ажилтнууд бид итгэж найдаж байна.
Нийгмийг ардчилах өөрчлөлт шинэчлэлтийн нөлөөгөөр 1991 онд МХЗЭ-ийн суурин дээр үүсгэн байгуулагдсан Монголын Залуучуудын Холбоо нь Монголын Хувьсгалт Залуучуудын Эвлэлийн албан ёсны залгамжлагч юм. Монголын Залуучуудын Холбооноос нийгмийн ардчилал, зах зээлийн эдийн засгийн цоо шинэ харилцаа бүрэлдэн тогтох үеийн залуучуудын нийгмийн сэтгэлгээ, оюун санааны хөгжлийг зөв төлөвшүүлэх, тэдний нийтлэг хүсэл сонирхол, эрх ашгийг хамгаалахад чиглэсэн үйл ажиллагаа явуулж, бүтээлч эерэг хандлагатай, эрх чөлөө, шударга ёсыг эрхэмлэгч, өв уламжлалаа тээгч монгол залуу хүнийг төлөвшүүлэх, хүмүүжүүлэх зорилго чиглэлтэй ажиллаж байгааг Монголын Хувьсгалт Залуучуудын Эвлэлийн Ахмад Ажилтны Холбоо дэмжин ажиллаж байна.
Монгол орон мандан бадрах болтугай!
Монголын залуучуудын яруу алдар улам бадартугай !
МХЗЭ-ИЙН АХМАД АЖИЛТНЫ ХОЛБООНЫ
ТЭРГҮҮН , АКАДЕМИЧ
Д.ДАШЖАМЦ
2020.08.25
