Баян-Өлгий Аймгийн Ардчилсан Залуучуудын Холбоо

19/10/2026

21/09/2026

🔔Материал хүлээн авч байна🔔
✅Ардчилсан залуучуудын холбоо Засгийн газрын хэрэгжүүлэгч агентлаг Удирдлагын академитай хамтран "1000+ хөтөлбөр", Глобал удирдагч их сургуультай хамтран "50+50 хөтөлбөр", БНСУ-ын Wonkwang их сургуультай хамтран "30+ хөтөлбөр"-ийг тус тус хэрэгжүүлэхээр хамтын ажиллагааг эхлүүлээд байна.
✅Эдгээр хөтөлбөрт хамрагдах хүсэлтэй гишүүдийн бүртгэл 09 сарын 25-ныг дуустал 21 аймаг, 9 дүүргийн намын хороо, АЗХ-ын салбар хороодод хийгдэж байна. Гишүүд та бүхэн анхан шатны намын хороо болон АЗХ-ны салбар хороонд хандан өөрийн сонирхсон хөтөлбөрийн бүртгэлээ хийлгэнэ үү.

Хөтөлбөрийн талаар лавлах бол АЗХ-ны сургалт, судалгаа, хөгжил хариуцсан ажлын хэсгийн 83088889 дугаараар холбогдоно уу.

Хэрэг эрхлэх газар

06/05/2026

Ардчилсан Намын Үндэсний бодлогын хорооны 69 дүгээр хуралдааныг нээж Ардчилсан Намын дарга О.Цогтгэрэл үг хэлэв.

Тэрээр "Арван жил үүдээ нээгээгүй Ардчилсан Намын хаалга үүдээ нээж, хана туургаа сольсон шинэчлэлийн ажил үргэлжилсээр намын удирдлагуудаа гүйцээн сонгох, дүрэм журмуудаа эцэслэх ээлжит нэгэн хурал ийн эхэлж байна. Ардчилсан Нам бүх шатандаа сонгуультнуудаа шинээр сонгож төв, анхан, дунд аль ч шатанд сонгуультнуудын 70 хувь нь анх удаа сонгогдсон залуучуудаас бүрдлээ. 1990 онд эхэлсэн Ардчиллын үйл хэрэг ахин дараагийн шатандаа гарсан онцлог сонгууль, шинэчлэлийн үйл явц намд өрнөлөө. Зориг гарган өрсөлдөж, энэхүү өөрчлөлт, шинэчлэлийн эзэд болсон шинээр сонгогдсон ҮБХ нар, тэр тусмаа залуу ҮБХ-ны гишүүддээ онцгойлон талархал илэрхийлье.

Зарчмын улс төр, зарчмын ойлголцол, зарчмын эв нэгдлийг барин фракц, талцал биш бодлого суурьтай намыг бий болгохоор томилгоог санал болгож буйг эрхэм ҮБХ-ны гишүүд ойлгож буй байх. Ялалт үргэлж олных байдаг. Ялагдлын буруутан харин дандаа дарга гэж би боддог. Гэтэл дарга яаж хариуцлага хүлээх вэ? намын даргаас буух нь хариуцлага биш, хариуцлагаа хамтдаа, цугтаа үүрье, асуудлаа ил тод яриад олонхын саналаар томилгоо хийе гэж өмнөх хурал дээр олон хүн хэлснийг эргэн сануулъя.

Нөгөө талаас дарга багаа зарлах эрхгүй, босго давуулах ёстой болсон хатуу дүрэм ч батлагджээ. Аливаа бүхэн цагтайгаас гадна хэмжээ хязгаартай. Нээлттэй, ил тод байх нь сайн ч хэмжээнээсээ хэтэрвэл намаа ч сүйрүүлэх эрсдэлтэй. Дотооддоо үргэлжилж буй хэрүүл тэмцлээ зогсоож, ялалт, амжилт руугаа дөтлөх цаг хэдийн ирснийг сануулъя. Ардчилсан Намын ялалт, бадралын он цагийг эхлүүлэхийн тулд өнөөдөр энд халуун тогоондоо хэлэлцэж генсек, дэд даргаа томилох шаардлага буйг тодотгоё" хэмээв.

28/02/2026

Өлгий сумын 3-р багийн засаг даргын дахин сонгуульд ялалт байгуулж сонгогдсон журмын нөхөр К.Аманбек-т баяр хүргээд ажлын амжилт хүсье.

07/12/2025

🎉 АЗХ байгуулагдсаны 25 жилийн ойн баярын мэнд хүргэе!

Ардчиллын үнэт зүйлсийг түгээн, залуусын манлайллыг бэхжүүлж ирсэн Ардчилсан Залуучуудын Холбооны түүхт 25 жилийн ойн баярын мэндийг өргөн дэвшүүлье. Энэхүү байгууллагыг улс орныхоо ирээдүйд итгэдэг эрхэм улс төрч Батхүү агсан санаачлан байгуулсныг энэ өдөр онцлон дурсаж байна.

Эх оронч, хүсэл тэмүүлэлтэй залуусын хүчээр АЗХ өдгөө улс орныхоо шинэчлэл, хөгжилд үнэтэй хувь нэмэр оруулж буйг бахархалтайгаар тэмдэглэж байна.

Ирээдүйн хөгжлийг залуус бид хамтдаа авч явна.
Ардчилсан залуусын эрч хүч бадраг!

Хүндэтгэсэн Баян-Өлгий аймгийн Ардчилсан Залуучуудын Холбооны тэргүүн Б.Тимур

06/12/2025

Ардчиллын үнэ цэнийг эрхэмлэгч нийт иргэд, эрх чөлөөт нийгмийг бүтээх үйлсэд зүрх сэтгэлээ нэгтгэсэн үе үеийн ардчиллын төлөөх үйл хэргийг манлайлагчид, та бүхэнд энэ түүхэн өдрийн мэндийг хүргэе.

1990 оны Ардчилсан хувьсгал бол Монголын ард түмний өөрийн эрх чөлөө, хүний эрх, нийгмийн шударга ёсыг сонгосон түүхэн сонголт байсан. Ардчилал бол бидэнд бэлэн ирээгүй, нэгэн үеийнхэн зүтгэж авчирсан үнэт зүйл. Энэ үнэ цэнийг хамгаалж, шинээр бүтээж, улам боловсронгуй болгох нь өнөөдрийн бидний үүрэг.

Ардчиллын үзэл санааг тууштай дэмжигч намууд нэгдэн нийлж 2000 онд Ардчилсан намыг байгуулсан нь Монголын улс төрийн системд шинэ соёл, шинэ орон зайг бий болгосон чухал алхам болсон. Өнөөдөр бид тус намын 25 жилийн ойг тэмдэглэж байна. 25 жил гэдэг бол алдаа оноогоо дүгнэж, шинэ зорилго, шинэ хандлагатайгаар урагшлах мөч.

Баян-Өлгий аймаг бол ардчиллын үнэ цэнийг хамгийн өндөр түвшинд хадгалж ирсэн аймаг. Иргэдийн оролцоо, үзэл бодлын олон янз байдал, залуусын идэвх, ахмад үеийн үнэт туршлага — энэ бүхэн манай аймагт ардчиллын суурь бат бөх байгаагийн илэрхийлэл юм.

Аймгийн ИТХ-ын даргын хувьд, мөн Ардчилсан намын аймгийн хороог удирдаж буй хүний хувьд би ардчиллын суурь үнэт зүйл болох нээлттэй байдал, хариуцлага, шударга ёсыг бодлого, шийдвэр бүрдээ баримталж ирсэн. Цаашид ч иргэдтэйгээ илүү ойр, асуудлыг шууд шийдвэрлэх, төрийн хариуцлагыг бэхжүүлэх, иргэдийн оролцоог бодит болгох чиглэлд тууштай ажиллах болно.

Манай намын гол зорилго бол зөвхөн улс төрийн оролцогч байх биш, харин нийгмийн хөгжилд бодит ахиц авч ирдэг шинэчлэлийн хүч байх явдал. Бид залуусаа дэмжсэн, хариуцлагатай, шударга, ил тод улс төрийн соёлыг бүрдүүлж байж ирээдүйн 10, 20 жилийн хөгжлийн хандлагыг тодорхойлно.

Энэ ой бол өнгөрснөө дурсах төдий биш, харин хариуцлагатай ирээдүйг бүтээх шинэ эхлэл. Ардчилсан Монгол Улс, ардчилсан үнэт зүйлсээр хөгжин дэвших Баян-Өлгий аймаг — энэ бол бидний хамтын зорилго.

Ардчиллын төлөө нэгэн үзэл санаанд нэгдэж, илүү эрх чөлөөт, илүү шударга ирээдүйн төлөө хамтдаа урагшилцгаая.

БАЯН-ӨЛГИЙ АЙМГИЙН ИТХ-ЫН ДАРГА, АЙМГИЙН АРДЧИЛСАН НАМЫН ДАРГА А. БЕГАРЫС