16/04/2024
👍 Цоо шинэ, дөнгөж саяхан та бүхний гарт хүрээд буй 👑 “Фокус Дархан” сэтгүүлийн энэхүү үндсэн дугаар нь эрхэмсэг дарханчуудын түүхээс бүтсэн. Өөр өөр амьдрал тэмцэл, хүсэл тэмүүлэл, сургамж ухаарал, амжилт бахархал бүхий эдгээр найман эрхэмийн чин сэтгэлийн халуун яриаг та эндээс уншаарай!
🔥 ARTGER контент сувгийг санаачлагч, “АРТГЭР Медиа Групп” ХХК-ийн Гүйцэтгэх захирал найруулагч, продюсер Р.ЖАВХЛАНТӨГС-ийн ярилцлагаас:
"ЭРЧҮҮД, ХООЛ, ШАРСАН МАХ.., бас зарим нэг үндэсний онцлог бүхий зүйлсийг товойлгож харуулдаг. Тухайлбал МОНГОЛ БАНХАР. Энэ тодорхой зорилготой байх. Тийм үү?
- Тэгэлгүй яахав. Үндэсний хоолыг контент болгож дэлхийд танилцуулахын зэрэгцээ бусад соёлоо сурталчлах гэсэн “ARTGER”-ийн анхны концепц зорилго маань. Бид сайн дураараа “соёлын элч” болж байгаа юм. Тийм ээ.., “Сайн дураараа..” \инээв\. Тэгэхээр, эргээд эхний цэг дээрээ очъё. Яагаад 2016 оны тэр өдөр би, ерөөсөө энэ сувгийг нээж, хоолны контент эхлүүлэн, түүгээр дамжуулан соёлоо түгээх нь зөв юм байна гэж бодсон гэхээр, монгол хоол өөрөө UNIQUE and SECRET \хосгүй онцгой бас нууцлаг\ байхгүй юу. Маш өвөрмөц, содон, тайлагдаагүй ертөнц. Дэлхийд, ялангуяа барууны ертөнцөд гадныхан Монголыг бол мэднээ. Чингис хаан, Монголын эзэнт гүрний агуу түүхээр мэддэг. Гэхдээ энэ дунд хоолны сэдэв нь мөнхийн асуултын тэмдэгтэй, эргэлзээтэй явж ирсэн. Баруунд монгол барбекью ресторанууд бий. Бас барууныхны дунд “Mongolian Beaf” гэдэг хоол жор их дэлгэрсэн байдаг. Зарим нэг түүх, шастир судалгаанд Азийн халуун тогоо, Хятад HotPot-ыг Монголоос үүссэн гэсэн нь ч бий. Судлах л хэрэгтэй. Бидэнд өөрсдөө ч сайн мэддэггүй зүйлс олон байна. Тэгэхээр, монгол хоол яах аргагүй хамгийн гол сэдэв мөн.
