30/12/2025
ရာသီတုပ်ကွေးရောဂါ သတိပြု ကာကွယ်ပါ
ဆောင်းပါးရှင်- ဒေါက်တာသန်းနိုင်စိုး
ရာသီတုပ်ကွေးရောဂါ
ရာသီတုပ်ကွေးရောဂါ (Seasonal Influenza)ဆိုသည်မှာ ကမ္ဘာတဝှမ်းတွင်ကူးစက်ပျံ့နှံ့ နေသည့် ရာသီတုပ်ကွေးဗိုင်းရပ်စ်ပိုးများကြောင့် နှစ်စဉ်ဖြစ်ပွားနေကြဖြစ်သည့် အသက်ရှူလမ်း ကြောင်းဆိုင်ရာ ကူးစက်ရောဂါဖြစ်သည်။ လူအများစုမှာ ၅ ရက်မှ ၇ ရက် အတွင်း ပြန်လည် သက်သာလာသော်လည်း တစ်ကမ္ဘာလုံးအတိုင်းအတာဖြင့် တစ်နှစ်လျှင် ရောဂါပြင်းထန်စွာ ခံစားရသည့် လူနာ ၃ သန်းမှ ၅ သန်းအထိရှိပြီး နှစ်စဉ်ရာသီတုပ်ကွေးရောဂါ နောက်ဆက်တွဲ အသက်ရှူလမ်းကြောင်း ဆိုင်ရာရောဂါများဖြင့် သေဆုံးသူ ၆ သိန်းခွဲခန့်အထိ ရှိနေသဖြင့် ပြည်သူ့ကျန်းမာရေးအတွက် အရေးကြီးသော ကူးစက်ရောဂါတစ်ခု ဖြစ်ပါသည်။
ရာသီတုပ်ကွေးရောဂါပိုးသည် အလွန်ကူးစက်မြန်ပြီး ရောဂါပိုးရှိသူ လူနာ ချောင်းဆိုး၊ နှာချေ ရာမှ ထွက်လာသော အစက်အမှုန်အမွှားများကို ရှူရှိုက်မိခြင်း၊ လက်ဖြင့်ဗိုင်းရပ်စ်ရှိနေသော မျက်နှာပြင်များကိုကိုင်တွယ်မိပြီးနောက် မိမိ၏ မျက်လုံး၊ နှာခေါင်း သို့မဟုတ် ပါးစပ်ကို ပြန်လည် ထိတွေ့မိခြင်း၊ ရောဂါကူးစက်ခံစားနေရသူနှင့် အနီးကပ်ထိတွေ့ခြင်း တို့မှတစ်ဆင့် ကူးစက်နိုင် ပါသည်။
ရာသီတုပ်ကွေးရောဂါ ရောဂါလက္ခဏာများ
ရာသီတုပ်ကွေးရောဂါ ဗိုင်းရပ်စ်ပိုးများသည် အသက်ရှူလမ်းကြောင်းရှိ ကလာပ်စည်းများ (epithelial cells) ထဲသို့ ဝင်ရောက်ပြီး ၎င်းတို့၏ မျိုးဗီဇကို အသုံးချကာ အဆမတန် ပွားများစေခြင်းဖြင့် ရောဂါ လက္ခဏာများကို ဖြစ်ပေါ်စေသည်။ ရောဂါလက္ခဏာများအနေဖြင့် ရောဂါပိုးနှင့် ထိတွေ့ပြီး ၁ ရက်မှ ၄ ရက်အတွင်း ရုတ်တရက် ကိုယ်ပူခြင်း၊ အဖျားကြီးခြင်း(၃၈°C သို့မဟုတ် ၁၀၀.၄°F နှင့်အထက်)၊ ချမ်းတုန်ခြင်း၊ လည်ချောင်းနာခြင်းနှင့် နှာရည်ယိုခြင်း၊ ချောင်းခြောက်ဆိုးခြင်း (၎င်းသည် ပြင်းထန်နိုင်ပြီး ရက်သတ္တပတ် (၂) ပတ်ကျော်အထိ ကြာမြင့် နိုင်ပါသည်)၊ ကြွက်သားနှင့် အဆစ်အမြစ်များ ကိုက်ခဲနာကျင်ခြင်း၊ ခေါင်းကိုက်ခြင်းနှင့် အလွန် အမင်း နုံးချိခြင်းတို့ဖြစ်ကြပြီး ကလေးငယ်များတွင် ပျို့အန်ခြင်းနှင့် ဝမ်းလျှောခြင်းတို့ ဖြစ်ပွားနိုင် ပါသည်။ အထူးသဖြင့် ကိုယ်ဝန်ဆောင်မိခင်များ၊ အသက် ၅ နှစ်အောက် ကလေးငယ်များ၊ အသက် ၆၅ နှစ်နှင့်အထက် သက်ကြီးပုဂ္ဂိုလ်များနှင့် နာတာရှည် ရောဂါအခံရှိသူများ (ဥပမာ- ဆီးချို၊ နှလုံး၊ ပန်းနာရင်ကြပ်၊ ကင်ဆာ စသည်တို့) တွင် ရောဂါဖြစ်ပွား ပါက ပိုမိုပြင်းထန်စွာ ခံစား ရနိုင်ပါသည်။
ရာသီတုပ်ကွေးဗိုင်းရပ်စ်အုပ်စုများ
ရာသီတုပ်ကွေးဗိုင်းရပ်စ်အုပ်စု (A), (B), (C)နှင့် (D) ဟူ၍ (၄)မျိုးရှိသော်လည်း အမျိုး အစား (A) နှင့် (B) သည် နှစ်စဉ်ဖြစ်ပွားသော ရာသီတုပ်ကွေး ကူးစက်ပျံ့နှံ့မှုများ၏ အဓိက လက် သည် ဖြစ်သည်။ အမျိုးအစား (C) သည် များသောအားဖြင့် သာမန်အအေးမိခြင်းကိုသာ ဖြစ်စေ တတ်ပြီး အမျိုးအစား (D) သည် ကျွဲ၊ နွားများတွင်သာ အဓိက ကူးစက်စေ၍ လူများကို ကူးစက် ခြင်း မရှိသလောက်နည်းပါးပါသည်။
အမျိုးအစား (A)သည် အပြင်းထန်ဆုံးနှင့် အဖြစ်အများဆုံး ဖြစ်ပြီး ၎င်းသည် လူအချင်း ချင်းသာမက တိရစ္ဆာန်(ဥပမာ- ကြက်၊ ငှက်၊ ဝက်)တို့ ထံမှလည်း ကူးစက်နိုင်ကာ ကမ္ဘာလုံးဆိုင် ရာတုပ်ကွေးကပ်ရောဂါ(Influenza Pandemic)များ ဖြစ်စေနိုင်သော အမျိုးအစားဖြစ်သည်။ အမျိုးအစား (B)သည် အမျိုးအစား (A) လောက် မပြင်းထန်သော်လည်း အန္တရာယ်ရှိနိုင်ဆဲ ဖြစ်ပြီး ၎င်းအုပ်စုတွင် Victoria နှင့် Yamagata မျိုးနွယ်စုများ ပါဝင်သည်။
ရာသီတုပ်ကွေး ဗိုင်းရပ်စ်ပိုး အမျိုးအစား (A)သည် မျိုးဗီဇပုံစံအမြဲ ပြောင်းလဲနေ တတ်သော ဗိုင်းရပ်စ် ဖြစ်သည်။ အဆိုပါ ဗိုင်းရပ်စ်၏ အပြင်ဘက် မျက်နှာပြင်တွင် ဆူးချွန်လေး များကဲ့သို့သော ပရိုတင်းများဖြစ်သည့် H နှင့် N သည် နှစ်စဉ် ပုံစံ ပြောင်း နေသဖြင့် လူသား၏ ကိုယ်ခံအား စနစ်က ၎င်းတို့ကို အမြဲတမ်း မမှတ်မိနိုင်ပါ။ ထို့ကြောင့် ယခင်နှစ်က ရာသီတုပ်ကွေး ဖြစ်ဖူးသော်လည်း ယခုနှစ်တွင် ထပ်မံဖြစ်ပွားနိုင်ခြင်း ဖြစ်ပြီး၊ ရာသီတုပ်ကွေး ကာကွယ်ဆေး ကိုလည်း နှစ်စဉ် အသစ်ထပ်မံ ထိုးနှံရန် လိုအပ်ခြင်း ဖြစ်သည်။
ဗိုင်းရပ်စ်ပိုး၏မျက်နှာပြင်ရှိ ပရိုတင်း H (Hemagglutinin)သည် ဗိုင်းရပ်စ်ကို လူ၏ ဆဲလ်အတွင်းသို့ ဝင်ရောက်နိုင် အောင် တံခါးဖွင့်ပေးသည့် သော့ (Key) ကဲ့သို့ လုပ်ဆောင်ပေး သည်။ (စုစုပေါင်း H1 မှ H18 အထိ ရှိပါသည်)။ ပရိုတင်း N (Neuraminidase) သည် ဆဲလ်တစ်ခုအတွင်း ဗိုင်းရပ်စ်ပိုးများပွားများ ပြီးနောက် အခြားဆဲလ်သစ်များဆီသို့ "ပျံ့နှံ့သွားအောင်" ကူညီပေးသည်။ (စုစုပေါင်း N1 မှ N11 အထိ ရှိပါသည်)။ သို့ဖြစ်ပါ၍ ဥပမာအားဖြင့် ရာသီတုပ်ကွေး ဗိုင်းရပ်စ်ပိုး A H1N1 ဆိုသည်မှာ Hemagglutinin (H) အမျိုးအစား (၁) နှင့် Neuraminidase အမျိုးအစား (၁) ရှိသော ရာသီတုပ်ကွေး (A)အမျိုးအစား ဗိုင်းရပ်စ် ကို ဆိုလိုခြင်း ဖြစ်သည်။
ရာသီတုပ်ကွေးဗိုင်းရပ်စ်ပိုးများ၏မျိုးရိုးဗီဇနှင့် A(H3N2) Subclade - K
ရာသီတုပ်ကွေးဗိုင်းရပ်စ်ပိုးများသည် မျိုးရိုးဗီဇ အမြဲပြောင်းလဲနေကြသဖြင့် ထိုပြောင်းလဲမှု များကို သိပ္ပံပညာရှင်များက မျိုးရိုးသစ်ပင် (Family Tree) ကဲ့သို့ မျိုးစိတ် အဆင့်ဆင့် ခွဲခြား သတ်မှတ်ကြရာ မူလဗိုင်းရပ်စ်၏ မိသားစုသစ်ပင်မှ ထွက်လာသော "အကိုင်းအခက်" သို့မဟုတ် "မျိုးနွယ်စု" ကို Clade သို့မဟုတ် Subclade ဟုခေါ်ဆိုပါသည်။ ယခု မီဒီယာများတွင် ဖော်ပြ နေသည့် K ဗိုင်းရပ်စ် ဆိုသည်မှာ A(H3N2) ၏ မျိုးနွယ်စုသစ်တစ်ခု A(H3N2) Subclade K ကို အစွဲပြု၍ခေါ်ဆိုခြင်းဖြစ်၍ ၎င်းသည် ရာသီတုပ်ကွေးဗိုင်းရပ်စ်ပိုးအသစ် ပေါ်ပေါက်လာလာခြင်း မဟုတ်ဘဲ မူလရှိပြီးသား ရာသီတုပ်ကွေးဗိုင်းရပ်စ် A(H3N2)၏ မျိုးနွယ်စုသစ် တစ်ခုသာ ဖြစ်ပါသည်။ Subclade K ကဲ့သို့သော မျိုးနွယ်စုသစ်များသည် ယခင်ရှိပြီးသား ကိုယ်ခံအား သို့မဟုတ် ကာကွယ်ဆေးဟောင်းများကို ရှောင်ကွင်းနိုင်စွမ်း ပိုရှိလာတတ်သောကြောင့် ကမ္ဘာ့ ကျန်းမာရေးအဖွဲ့ (WHO)အနေဖြင့် အမြဲ စောင့်ကြည့်နေရခြင်းဖြစ်ပြီး လက်ရှိအချက်အလက် များ အရ Subclade K ဗိုင်းရပ်စ်များနှင့်စပ်လျဉ်း၍ ရောဂါပြင်းထန်မှု ပိုမိုဆိုးရွားလာသည့် လက္ခဏာကိုမူ တွေ့ရှိရခြင်း မရှိသေးကြောင်းသိရပါသည်။
ရာသီတုပ်ကွေးရောဂါ ဖြစ်ပွားမှု အခြေအနေ
ကမ္ဘာလုံးဆိုင်ရာ ရာသီတုပ်ကွေးရောဂါ ဖြစ်ပွားမှု အခြေအနေကို ကမ္ဘာ့ကျန်းမာရေးအဖွဲ့ (WHO) ၏ ၂၀၂၅ ခုနှစ်၊ ဒီဇင်ဘာလ (၁၀) ရက်နေ့ အစီရင်ခံစာအရ ၂၀၂၅ ခုနှစ်၊ စက်တင်ဘာလမှ စတင်၍ အာရှဒေသအပါအဝင် တစ်ကမ္ဘာလုံးတွင် တုပ်ကွေးကူးစက်မှု မြင့်တက်လာသော်လည်း ၎င်းသည် နှစ်စဉ်ဖြစ်ပွားနေကျ အခြေအနေထက် ပိုမိုပြင်းထန်ခြင်း မရှိပါကြောင်း၊ ယခုနှစ်တွင် Influenza A (H3N2) ဗိုင်းရပ်စ်မှာ အဓိကပျံ့နှံ့နေပြီး၊ ၎င်း၏ မျိုးနွယ်စုသစ်ဖြစ်သော Subclade K ကိုလည်း ကမ္ဘာ့နိုင်ငံ (၃၄) နိုင်ငံတွင် တွေ့ရှိထားကြောင်းသိရသည်။
Influenza A (H3N2) သည် လွန်ခဲ့သော နှစ်ပေါင်း (၅၀) ကျော်ကတည်းက ကမ္ဘာပေါ်တွင် စတင်ပျံ့နှံ့ခဲ့ပြီး ယနေ့တိုင် ရာသီတုပ်ကွေးဗိုင်းရပ်စ်ပိုးအဖြစ် တည်ရှိနေခြင်း ဖြစ်သည်။ အဆိုပါ ရာသီတုပ်ကွေး ဗိုင်းရပ်စ်ကို ၁၉၆၈ ခုနှစ်၊ ဇူလိုင်လ တွင် ဟောင်ကောင် (Hong Kong) ၌ ပထမဆုံး အကြိမ် စတင်တွေ့ရှိခဲ့ပြီး "Hong Kong Flu" ဟု လူသိများခဲ့သည်။ အခြားသော ရာသီတုပ်ကွေးရောဂါပိုးဟောင်းများ (ဥပမာ- H2N2) မှာ ပျောက်ကွယ်သွားသော်လည်း H3N2 မှာမူ နှစ်ပေါင်း (၅၇)နှစ် ကြာသည့်တိုင် ဆက်လက်ရှင်သန်နေဆဲ ဖြစ်ခြင်းမှာ မျိုးရိုးဗီဇကို အလွန်လျင်မြန်စွာ ပြောင်းလဲနိုင်စွမ်း ရှိခြင်းကြောင့် ဖြစ်ပြီး ၂၀၂၅ ခုနှစ်တွင် Influenza A (H3N2) Subclade K ကဲ့သို့သော မျိုးနွယ်စုသစ်များအထိ ဆင့်ကဲပြောင်းလဲခြင်းဖြစ်ပါသည်။ သို့ရာတွင် ထိုသို့ ဗိုင်းရပ်စ်၏မျိုးဗီဇ ပြောင်းလဲတိုင်း ၎င်းနှင့် ကိုက်ညီသော ကာကွယ်ဆေးကို နှစ်စဉ်ပြန်လည် အချိန်မီထုတ်လုပ်နိုင်သည်ဖြစ်၍ ကမ္ဘာ့ကပ်ရောဂါ ကိုဗစ်-၁၉ ကဲ့သို့ မိဘ ပြည်သူများအနေဖြင့် အထူး တလည် စိုးရိမ်စရာမလိုအပ်သည့် အခြေအနေဖြစ်ပါသည်။
မိမိတို့ မြန်မာနိုင်ငံ၏ လက်ရှိ ရာသီတုပ်ကွေးရောဂါ ဖြစ်ပွားမှု အခြေအနေအရ ၂၀၂၅ ခုနှစ် စက်တင်ဘာလမှစတင်၍ မူလ Influenza A (H3N2) ပိုးမှာ အဓိကပျံ့နှံ့နေသည့် ရာသီတုပ် ကွေး ဗိုင်းရပ်စ်ပိုးအဖြစ်တွေ့ရှိနေရသော်လည်း ဤပိုးအမျိုးအစားသည် ယခင်နှစ်များကတည်း ကပင် မြန်မာနိုင်ငံတွင် ရှိနေပြီးသားဖြစ်၍ ပြည်သူလူထုအတွင်း ကိုယ်ခံစွမ်းအား အသင့်အတင့် ရှိနေပြီးဖြစ်ပါသည်။
ရောဂါစောင့်ကြပ်ကြည့်ရှုရေးလုပ်ငန်းများ
ကျန်းမာရေးဝန်ကြီးဌာနသည် ရာသီတုပ်ကွေးရောဂါပိုးအမျိုးမျိုးကူးစက်ဖြစ်ပွားမှုအား သိရှိစေရေးအတွက် တုပ်ကွေးဆန်သောလက္ခဏာများနှင့် လတ်တလောပြင်းထန်အသက်ရှူလမ်း ကြောင်း ဆိုင်ရာလက္ခဏာများ စောင့်ကြပ်ကြည့်ရှုရေးလုပ်ငန်းအား ပြည်သူ့ဆေးရုံ (၂၄)ရုံ၌ လူနာများထံမှ ဓာတ်ခွဲနမူနာများ အပတ်စဉ်ရယူ၍ အမျိုးသား ကျန်းမာရေးဓာတ်ခွဲမှုဆိုင်ရာဌာန (ရန်ကုန်)တွင် ဓာတ်ခွဲစစ်ဆေးခြင်းအား ဆောင်ရွက်လျက်ရှိရာ ဓာတ်ခွဲစစ်ဆေးချက်များအရ ယနေ့အထိ Influenza A (H3N2) Subclade K ကို မိမိတို့နိုင်ငံတွင် တွေ့ရှိခြင်းမရှိကြောင်း သိရသည်။ ထို့ပြင် ပြည်သူ့ဆေးရုံများတွင် တက်ရောက်လာသူများတွင် ကူးစက်ရောဂါများ စောင့်ကြပ်ကြည့်ရှုခြင်း လုပ်ငန်းစဉ်အရ ပြင်းထန်ရာသီတုပ်ကွေးဖြစ်ပွားသူအရေအတွက်မှာ နှစ်စဉ် သာမန်ဖြစ်ပွားလေ့ရှိသည့် အရေအတွက်တွင်သာရှိကြောင်းတွေ့ရသည်။
ပြင်းထန်ရောဂါလက္ခဏာများ
ရာသီတုပ်ကွေးရောဂါသည် သာမန်အားဖြင့် ၅ ရက်မှ ၇ ရက်ခန့်အတွင်း ပြန်လည် သက် သာ သွားလေ့ရှိသော်လည်း အောက်ပါ ပြင်းထန်သော လက္ခဏာများ ကို ခံစားရပါက ဆေးရုံ၊ ဆေးခန်းသို့ ချက်ချင်းပြသပြီး အရေးပေါ်ကုသမှု ခံယူရပါမည် -
- အသက်ရှူရခက်ခဲခြင်း၊ အသက်ရှူရသည်မှာ မဝသကဲ့သို့ ဖြစ်ခြင်း၊ အသက်ရှူနှုန်း အလွန်မြန်ခြင်း သို့မဟုတ် အသက်ရှူလျှင် မောဟိုက်နေခြင်း၊
- ရင်ဘတ်အောင့်ခြင်း၊ ရင်ဘတ်အတွင်း တင်းကျပ်နေခြင်း သို့မဟုတ် အသက်ရှူသွင်း၊ ရှူထုတ်သည့်အခါတွင် နာကျင်ခြင်း၊
- ချောင်းဆိုးရာတွင် သလိပ်ထဲ၌ သွေးပါလာခြင်း သို့မဟုတ် အဝါရောင်၊ အစိမ်းရောင် သလိပ်များ အလွန်အများထွက်လာခြင်း၊
- အဖျား လုံးဝမကျခြင်း သို့မဟုတ် အဖျားပြန်တက်လာခြင်း (အထူးသဖြင့် အဖျားကျ သွားပြီးမှ ပြန်တက်လာခြင်း)
- အဖျားကြီး၍ တက်ခြင်း၊ သတိလစ်ခြင်း၊
- ကလေးငယ်များတွင်အသက်ရှူလျှင် ရင်ဘတ်ချိုင့်ဝင်ခြင်း (အသက်ရှူရ ခက်ခဲသော ကြောင့် နံရိုးကြားများ ချိုင့်ဝင်သည်အထိ အားစိုက်ရှူနေရခြင်း)
- အစာ သို့မဟုတ် ရေကို လုံးဝမစားသောက်ခြင်းတို့ဖြစ်ပါသည်။
အထက်ဖော်ပြပါ ပြင်းထန်ရောဂါလက္ခဏာများပေါ်ပေါက်ပါက ခံစားရပါက ပြည်သူ့ ဆေးရုံများတွင် ရာသီတုပ်ကွေးရောဂါအမျိုးမျိုးအတွက် ထိရောက်သော ရောဂါကုသဆေးနှင့် ရောဂါကုထုံးများရှိပြီးဖြစ်၍ အချိန်မီရောက်ရှိပါက ရောဂါမှ အပြည့်အဝ ပြန်လည် ကောင်းမွန် လာသည်အထိ ဆေးကုသစောင့်ရှောက်မှုများပေးအပ်နိုင်မည်ဖြစ်ပါသည်။
ရာသီတုပ်ကွေးရောဂါ သတိပြု ကာကွယ်ပါ
ကျန်းမာရေးအသိ၊ ကျန်းမာရေးသတိဖြင့် “ကြိုတင်ကာကွယ်ခြင်းသည် ကုသခြင်းထက် ကောင်းမွန်သည်” ဟုဖြစ်သည်နှင့်အညီ မိဘပြည်သူများအနေဖြင့် ရောဂါကာကွယ်ရေး နည်း လမ်းများဖြစ်သည့် -
- ဆပ်ပြာ၊ ရေ သို့မဟုတ် ရေမလို လက်သန့်ဆေးရည်ဖြင့် စနစ်တကျ လက်ဆေးခြင်း၊
- ဖျားနာခြင်းအစရှိသော သံသယလက္ခဏာရှိသူများအနေဖြင့် နှာချေချောင်းဆိုးခြင်း ခံစား နေရပါက ပါးစပ်နှာခေါင်းစည်း ဝတ်ဆင်ခြင်း၊ ပါးစပ်နှာခေါင်းစည်း မဝတ်ခင်အချိန်တွင် နှာချေ၊ ချောင်းဆိုးပါက တစ်ရှူး သို့မဟုတ် တံတောင်ကွေးဖြင့်အုပ်၍ဆိုးခြင်း၊
- ရောဂါပြင်းထန်စွာခံစားရနိုင်ခြေရှိသူများဖြစ်သည့် ကိုယ်ဝန်ဆောင်မိခင်များ၊ အသက် ၅ နှစ်အောက် ကလေးငယ်များ၊ အသက် ၆၅ နှစ်နှင့်အထက် သက်ကြီးပုဂ္ဂိုလ်များနှင့် နာတာရှည်ရောဂါအခံရှိသူများသည် ရောဂါပိုး ကူးစက်ခြင်းခံရသူ သို့မဟုတ် သံသယ လူနာများနှင့် တတ်နိုင်သရွေ့ အနီးကပ် ထိတွေ့မှုမပြုခြင်း၊
- ရောဂါပြင်းထန်စွာခံစားရနိုင်ခြေရှိသူများသည် နှစ်စဉ် နှစ်အလိုက်ထွက်ရှိသည့် ရာသီ တုပ်ကွေးကာကွယ်ဆေးထိုးနှံမှုခံယူခြင်း တို့ကို ဆောင်ရွက်ရမည်ဖြစ်ပါသည်။
သို့ဖြစ်ပါ၍ မိဘပြည်သူများအနေဖြင့် ယခုကဲ့သို့ဆောင်းရာသီအချိန်ကာလတွင် ဖြစ်ပွားမှု များပြားလေ့ရှိသည့် ရာသီတုပ်ကွေးရောဂါအမျိုးမျိုးနှင့် ယခု မီဒီယာများတွင် ဖော်ပြ နေသည့် K ဗိုင်းရပ်စ် ဆိုသည်နှင့် စပ်လျဉ်း၍ အထူးတလည်စိုးရိမ်ကြောင့်ကြရန်မလိုပဲ ကျန်းမာရေးဝန်ကြီး ဌာနမှ အချိန်နှင့်တပြေးညီ ထုတ်ပြန်ကြေညာလျက်ရှိသည့် ကျန်းမာရေးအသိပေးနှိုးဆော်ချက် များကို လိုက်နာဆောင်ရွက်၍ ကျန်းမာရေးအသိ၊ ကျန်းမာရေးသတိရှိစွာဖြငိ့ ရောဂါကာကွယ်ရေး နည်းလမ်းများကို သတိပြုဆောင်ရွက်ကြပါရန်တိုက်တွန်းလိုက်ရပါသည်။
