21/07/2026
The Leprosy Mission Myanmar (TLMM) ၏ ဦးဆောင်မှုဖြင့် ၂၀၂၆ ခုနှစ်၊ ဇူလိုင်လ ၁၁ ရက်နေ့က ပဲခူးတိုင်းဒေသကြီး၊ ညောင်လေးပင်မြို့ရှိ ညောင်လေးပင်ကျမ်းစာကျောင်း၌ "Leprosy Awareness Campaign" ဆွေးနွေးပွဲကို အောင်မြင်စွာ ကျင်းပပြုလုပ်ခဲ့ပါသည်။ အဆိုပါ ဆွေးနွေးပွဲသို့ ကျမ်းစာကျောင်းသား/သူ စုစုပေါင်း ၈၉ ဦး တက်ရောက်ခဲ့ကြပါသည်။
ယခု ဆွေးနွေးပွဲသည် နောင်တစ်ချိန်တွင် လူမှုပတ်ဝန်းကျင်နှင့် တိုက်ရိုက်ထိတွေ့ကာ ဒေသခံလူထုကို လမ်းညွှန်ပြသပေးမည့် ဘာသာရေးခေါင်းဆောင်လောင်းများ ဖြစ်လာကြမည့် ကျမ်းစာကျောင်းသား/သူများအတွက် အဓိကရည်ရွယ်၍ ကျင်းပခဲ့ခြင်းဖြစ်ပါသည်။ တက်ရောက်လာသူများအနေဖြင့် လူ့ခန္ဓာကိုယ်၊ အရေပြား၊ အာရုံကြောနှင့် ကိုယ်ခံအားစနစ်တို့၏ အခြေခံလုပ်ဆောင်ပုံများကို နားလည်သဘောပေါက်စေရန်၊ ဟန်းစန်းရောဂါလက္ခဏာများကို ဆင်တူရိုးမှား အရေပြားရောဂါများနှင့် ခွဲခြားသိမြင်ပြီး ရောဂါအဆင့်မရင့်မီ စောစီးစွာ ကုသမှုခံယူနိုင်ရေး လမ်းညွှန်ပေးနိုင်ရန်အပြင်၊ အနာကြီးရောဂါနှင့် ပတ်သက်၍ လူမှုပတ်ဝန်းကျင်တွင် ရှိနေသောအကြောက်တရားများ၊ အယူအဆအမှားများနှင့် ခွဲခြားဆက်ဆံမှု (Stigma) များကို ဆေးပညာဗဟုသုတများဖြင့် ချေဖျက်ပေးနိုင်ရန် ရည်ရွယ်ပါသည်။
📌 ဆွေးနွေးပွဲတက်ရောက်သူတို့၏ ရင်ဖွင့်စကားသံများ
🔹 “ယခုဆွေးနွေးပွဲသို့ မတက်ရောက်မီက ကြားဖူးနားဝ ဗဟုသုတသာရှိသဖြင့် အနာကြီးရောဂါ ခံစားနေရသူတစ်ဦးကို တွေ့မြင်ပါက ကူးစက်ခံရမည်ကို စိုးရိမ်ပြီး ကြောက်ရွံ့စိတ် ရှိခဲ့မိသည်။ ယခုအခါတွင်မူ ကြောက်ရွံ့ရန်မလိုဘဲ စောစီးစွာ ဆေးကုသမှုခံယူပါက မည်သည့်ကိုယ်လက်အင်္ဂါချို့ယွင်းမှုမျှ မရှိဘဲ ရောဂါပျောက်ကင်းနိုင်ကြောင်း သိရှိနားလည်ခဲ့ရသည်။"
🔹 "လူမှုပတ်ဝန်းကျင်အတွင်း ခွဲခြားဆက်ဆံမှုများ ကင်းဝေးစေရန်အတွက် 'အနာကြီးရောဂါသည်' ဟု ခေါ်ဝေါ်ခြင်းမပြုဘဲ 'ဟန်းစန်းရောဂါ (Hansen's disease)' ဟု ပြောင်းလဲခေါ်ဆိုသင့်ကြောင်းနှင့် MDT ဆေးသောက်သုံးနေစဉ်အတွင်း ဆေးတုံ့ပြန်မှု (Reaction) များ ဖြစ်ပေါ်လာပါက စိတ်ပျက်အားလျော့ခြင်းမရှိဘဲ သက်ဆိုင်ရာဆရာဝန်များနှင့် တိုင်ပင်ကာ ညွှန်ကြားသည့်အတိုင်း ဆေးကို စနစ်တကျ သောက်သုံးသင့်ကြောင်းကိုလည်း မှတ်မှတ်သားသား လေ့လာခွင့်ရခဲ့သည်။"
ဆွေးနွေးပွဲ ပြီးဆုံးချိန်တွင် တက်ရောက်လာသူများအနေဖြင့် ရောဂါလက္ခဏာများကို မိမိတို့ကိုယ်တိုင် တိုက်ရိုက်ကောက်ချက်ချ ဆုံးဖြတ်ခြင်းမပြုဘဲ သံသယဖြစ်ဖွယ် လက္ခဏာရှိသူများကို ကျွမ်းကျင်ဆရာဝန်များရှိရာ ဆေးရုံ၊ ဆေးခန်းများသို့ အချိန်မီ လွှဲပြောင်းပြသပေးရန်နှင့်၊ မိမိတို့ဒေသတွင် သံသယဖြစ်ဖွယ် လူနာသစ် (New Case) များ တွေ့ရှိပါက သက်ဆိုင်ရာ TLMM တာဝန်ရှိသူများထံ ဆက်သွယ်ချိတ်ဆက်ပြီး ဝိုင်းဝန်းကူညီစောင့်ရှောက်သွားရမည်ကို အသိပညာဗဟုသုတအပြည့်ဖြင့် နားလည်သဘောပေါက်သွားခဲ့ကြပါသည်။
